Rhagair y Gweinidogion: cynnig i ychwanegu asid ffolig at flawd
Updated 21 September 2021
© Crown copyright 2021
This publication is licensed under the terms of the Open Government Licence v3.0 except where otherwise stated. To view this licence, visit nationalarchives.gov.uk/doc/open-government-licence/version/3 or write to the Information Policy Team, The National Archives, Kew, London TW9 4DU, or email: psi@nationalarchives.gov.uk.
Where we have identified any third party copyright information you will need to obtain permission from the copyright holders concerned.
This publication is available at https://www.gov.uk/government/consultations/adding-folic-acid-to-flour/rhagair-y-gweinidogion-cynnig-i-ychwanegu-asid-ffolig-at-flawd
Bob blwyddyn yn y DU, mae tua 1,000 o achosion o feichiogrwydd yn cael eu heffeithio gan namau ar y tiwb nerfol sy’n medru newid bywydau.
Mae’r namau geni hyn yn digwydd pan na fydd rhannau o fadruddyn y cefn yn datblygu’n iawn, gan effeithio ar yr ymennydd, asgwrn y cefn neu fadruddyn y cefn. Gall rhai o’r achosion fod yn angheuol, ac mae nifer yn arwain at gymhlethdodau iechyd i’r plentyn drwy gydol ei oes.
Ceir tystiolaeth gref y gellir osgoi llawer o namau ar y tiwb nerfol trwy gynyddu cymeriant asid ffolig menywod.
Mae tystiolaeth ddiweddar yn achosi pryder gan fod llai a llai o fenywod yn bodloni’r lefelau sy’n cael eu hargymell drwy eu deiet yn unig.
Y cyngor ar hyn o bryd i fenywod sy’n ceisio beichiogi, neu sy’n debygol o feichiogi, yw cymryd atchwanegiad dyddiol o asid ffolig. Fodd bynnag, rydym yn gwybod bod tua hanner yr achosion o feichiogrwydd yn y DU heb eu cynllunio.
Mae hyn wedi arwain at alwadau i gyfnerthu blawd ag asid ffolig. Gwelir cyfnerthu fel y ffordd fwyaf effeithiol o gyrraedd at y rhai â’r cymeriant isaf sef, yn gyffredinol, menywod iau o ardaloedd difreintiedig.
Fel gweinidogion ac Ysgrifennydd Parhaol sy’n gyfrifol am iechyd y cyhoedd yn ein 4 gwlad, rydym oll am gymryd camau i helpu i atal y risg di-angen hwn i iechyd y newyddanedig.
Rydym wedi dod ynghyd i gynnal yr ymgynghoriad hwn gyda’n gilydd, oherwydd bydd unrhyw gamau sy’n cael eu cymryd yn effeithio ar ddiwydiannau sy’n gweithredu ar draws y DU yn gyfan.
Gobeithio y bydd aelodau’r cyhoedd a sefydliadau trydydd sector yn ogystal â’r diwydiant a’r gymuned wyddonol yn ymateb.
Byddwn yn ystyried pob barn er mwyn sicrhau y bydd unrhyw gamau sy’n cael eu cymryd yn sicrhau’r manteision mwyaf posibl i iechyd ac yn osgoi unrhyw effaith negyddol.
Diolch ymlaen llaw am eich ymatebion.
Llofnodwyd gan
Seema Kennedy, Aelod o Senedd y DU, Is-ysgrifennydd Gwladol Seneddol dros Iechyd (Iechyd y Cyhoedd a Gofal Sylfaenol)
Vaughan Gething, Aelod o Gynulliad Cymru, y Gweinidog Iechyd a Gwasanaethau Cymdeithasol
Joe FitzPatrick, Aelod o Senedd yr Alban, Gweinidog Iechyd y Cyhoedd, Chwaraeon a Llesiant
Richard Pengelly, Ysgrifennydd Parhaol yr Adran Iechyd, Gogledd Iwerddon