Cynghorion gorau DVLA ar gyfer osgoi sgamiau
Cyngor i fodurwyr ar sut i adnabod ac osgoi sgamiau, gan gynnwys e-byst a negeseuon testun.
Mae DVLA yn atgoffa modurwyr sut y gallant gadw eu hunain yn ddiogel rhag sgamiau cerbydau a thrwyddedau gyrru. Mae’r ffigurau diweddaraf yn dangos bod bron i 20,000 o gwsmeriaid wedi galw canolfan gyswllt DVLA yn 2024 i roi gwybod am weithgarwch twyllodrus.
Gyda thwyllwyr yn defnyddio ffyrdd sy’n fwyfwy soffistigedig i dwyllo eu dioddefwyr, ni fu erioed mor bwysig i fodurwyr fod yn wyliadwrus ac yn ymwybodol o sut i adnabod e-byst, negeseuon testun, gwefannau a galwadau twyllodrus.
Dyma gynghorion gorau DVLA ar sut i gadw’n ddiogel ar-lein.
Defnyddiwch GOV.UK yn unig
Yr unig le i gael mynediad i wybodaeth swyddogol ynghylch DVLA a’i gwasanaethau yw GOV.UK. Gallai defnyddio unrhyw wefan arall olygu y codir mwy o arian arnoch am wasanaethau sydd naill ai’n rhatach neu’n rhad ac am ddim ar GOV.UK. Gall gwefannau eraill fod yn dwyllodrus hyd yn oed, felly ein cyngor ni yw defnyddio GOV.UK bob amser wrth drafod gyda DVLA.
Peidiwch byth â rhannu gwybodaeth eich trwydded yrru na’ch cerbyd ar-lein
Mae cael eich trwydded yrru yn garreg filltir fawr, ac efallai y cewch eich temtio i rannu eich trwydded sgleiniog newydd neu V5CW (llyfr log) ar gyfryngau cymdeithasol.
Fodd bynnag, mae’r ddwy ddogfen yn cynnwys manylion adnabod allweddol y gall sgamwyr eu defnyddio i ddwyn eich hunaniaeth neu hyd yn oed glonio’ch cerbyd. A chyn ichi ei wybod, gallech fod yn derbyn dirwyon parcio, taliadau atal tagfeydd neu oryrru nad oeddech yn gyfrifol amdanynt.
Byddwch yn wyliadwrus o e-byst a negeseuon testun yn gofyn ichi gadarnhau manylion personol
Bydd twyllwyr yn aml yn anfon e-byst neu negeseuon testun at ddioddefwyr diarwybod yn gofyn iddynt gadarnhau manylion personol, megis gwybodaeth banc neu wybodaeth dalu. Efallai y byddant hyd yn oed yn anfon negeseuon sy’n honni bod gennych hawl i gael ad-daliad treth cerbyd sylweddol.
Ni fydd DVLA byth yn gofyn ichi am fanylion eich cyfrif banc nac yn gofyn ichi gadarnhau manylion talu. Dim ond os oes gennych ymholiad byw gyda ni y byddwn yn gofyn ichi gadarnhau eich manylion personol drwy e-bost neu neges destun.
Ac mae ad-daliadau treth cerbyd yn cael eu cyhoeddi’n awtomatig - byth drwy e-bost gyda dolen!
Os byddwch yn derbyn un o’r e-byst neu’r negeseuon testun hyn, peidiwch â chlicio ar unrhyw ddolenni. Yn lle hynny, rhowch wybod i’r Ganolfan Seiberddiogelwch Genedlaethol a dilëwch y neges ar unwaith.
Byddwch yn wyliadwrus o wefannau sy’n dynwared DVLA
Mae sgamwyr yn creu gwefannau sy’n ceisio dynwared DVLA a gallant ymddangos yn gyfreithlon. Bydd y gwefannau hyn yn aml yn codi ffioedd ychwanegol am wasanaethau y gallwch eu cael am ddim neu am gost is ar GOV.UK, gan gynnwys ceisiadau am drwydded yrru, trafodion treth cerbyd a thaliadau Parth Aer Glân. Os oes angen ichi ddefnyddio’r gwasanaethau hyn neu unrhyw wasanaethau eraill y llywodraeth, chwiliwch amdanynt bob amser ar GOV.UK.
Sut i roi gwybod am sgamiau ar-lein
Os byddwch yn dod ar draws unrhyw un o’r sgamiau hyn neu unrhyw weithgaredd amheus arall, gallwch chwarae eich rhan i’n helpu i frwydro yn erbyn twyll drwy:
-
roi gwybod am e-byst gwe-rwydo i’r National Cyber Security Centre
-
rhoi gwybod i Action Fraud am sgamiau ar-lein
-
rhoi gwybod am hysbysebion camarweiniol i chwilotwyr
Mae’r mwyafrif o’n gwasanaethau ar gael ar-lein yn GOV.UK. I gael y wybodaeth ddiweddaraf am DVLA, gallwch gofrestru ar gyfer ein hysbysiadau e-bost.