Diddymu’r tollau dros Afon Hafren yn lledaenu ffyniant ar draws de ddwyrain Cymru
Marchnad eiddo Casnewydd yn tyfu.
Mae’r newyddion heddiw mai marchnad eiddo Casnewydd sydd wedi symud gyflymaf ym Mhrydain wedi cael ei groesawu gan Ysgrifennydd Gwladol Cymru, Alun Cairns.
Mae’r ffigurau a gyhoeddwyd gan y safle eiddo Rightmove yn dystiolaeth bellach o sut mae economi Cymru yn mynd o nerth i nerth, gyda hwb sylweddol lleihau’r tollau dros Afon Hafren ac ymrwymiad Llywodraeth y DU i’w diddymu ar ddiwedd y flwyddyn.
Roedd pol piniwn pwysig a gynhaliwyd yn Uwchgynhadledd Twf yr Hafren gyntaf Llywodraeth y DU ym mis Ionawr wedi datgelu bod 97% o’r cynadleddwyr yn teimlo y byddai diddymu’r tollau dros Afon Hafren o fudd i Gymru ac mae cwmnïau ar y naill ochr a’r llall o’r ffin eisoes yn elwa o dynnu’r TAW oddi ar y tollau yn gynharach ym mis Ionawr.
Dywedodd Alun Cairns, Ysgrifennydd Gwladol Cymru:
Pan gefais i swydd Ysgrifennydd Gwladol Cymru fy mlaenoriaeth gyntaf oedd diddymu’r tollau dros Afon Hafren ac anfon neges uniongyrchol i ddiwydiant, i deithwyr ac i dwristiaid yn y DU ac yn fyd-eang bod Cymru ar agor i fusnes. Mae penderfyniad Llywodraeth y DU yn ymwneud â lledaenu ffyniant ar draws rhanbarth economaidd naturiol sydd wedi cael ei llesteirio’n ddifrifol gan y tollau ers dros hanner canrif.
Gyda’r tollau’n cael eu diddymu yn nes ymlaen eleni, mae hi’n grêt gweld y trawsnewid yn rhagolygon economaidd a diwylliannol De Cymru a De Orllewin Cymru sydd eisoes ar waith. Dyma fegis dechrau cyfres o bolisïau a fydd yn gweld De Cymru i gyd yn elwa o ymyriad gweithredol gan Lywodraeth y DU.
Diddymu’r tollau fydd yr ysgogiad economaidd mwyaf ers degawdau a bydd yn trawsnewid rhagolygon economaidd a diwylliannol de Cymru a de orllewin Lloegr, gan ei gwneud hi’n haws cynnal busnes, cynyddu mewnfuddsoddiad a thwristiaeth a chreu swyddi.
Nodiadau i olygyddion
- Cynhaliwyd Uwchgynhadledd Twf yr Hafren ym mis Ionawr yng Ngwesty’r Celtic Manor pan ddaeth dros 300 o westeion o’r naill ochr a’r llall i’r ffin ynghyd i ymuno â’r Ysgrifennydd Gwladol i drafod cyfleoedd i dyfu ar draws y ffin ar ôl diddymu’r tollau dros Afon Hafren.
- Bydd Ysgrifennydd Gwladol Cymru yn nodi dwy flynedd yn ei swydd ddydd Llun 19 Mawrth ac mae diddymu’r tollau yn llwyddiant allweddol yn ystod ei gyfnod yn y swydd.