Mae'r gwasanaeth cyfrifon ar-lein a ffurflen dreth y cwmni yn cau
Bydd y gwasanaeth ffeilio ar-lein ar y cyd yn cau ar 31 Mawrth 2026.
Mae Tŷ’r Cwmnïau a CThEF yn cau’r gwasanaeth ffeilio ar-lein ar y cyd ar 31 Mawrth 2026.
Mae cwmnïau wedi defnyddio’r gwasanaeth hwn i ffeilio eu cyfrifon a Ffurflenni Treth y Cwmni ar yr un pryd gyda Thŷ’r Cwmnïau a CThEF, ond bydd yn cau ymhen 12 mis.
O 1 Ebrill 2026, gall cwmnïau ffeilio eu cyfrifon blynyddol gyda Thŷ’r Cwmnïau gan ddefnyddio meddalwedd trydydd parti, ein gwasanaethau gwe neu ffeilio papur. Fodd bynnag, bydd angen i chi ddefnyddio meddalwedd i ffeilio eich Ffurflen Dreth y Cwmni gyda CThEF.
Y rheswm dros gau’r gwasanaeth
Mae’r gwasanaeth yn cau oherwydd ei fod bellach wedi dyddio. Nid yw bellach yn bodloni’r safonau digidol modern, gwell gofynion treth gorfforaeth na’r newidiadau i gyfraith cwmnïau’r DU o dan y Ddeddf Troseddau Economaidd a Thryloywder Corfforaethol (ECCTA).
Mae cau’r gwasanaeth hefyd yn atgyfnerthu’r newidiadau mawr sy’n digwydd yn Nhŷ’r Cwmnïau, wrth i ni weithredu mesurau pellach a nodir yn y Ddeddf Troseddau Economaidd a Thryloywder Corfforaethol a chyflwyno prosesau newydd fel Gwiriad Hunaniaeth (IDV).
Beth sydd angen i chi ei wneud
Rydym yn argymell lawrlwytho a chadw o leiaf 3 blynedd o ffeilio cyfrifon ar gyfer eich cwmni. Ni fyddwch yn gallu cael mynediad at unrhyw ddogfennau blaenorol ar y gwasanaeth hwn ar ôl 1 Ebrill 2026.
Dechreuwch ystyried eich opsiynau ffeilio meddalwedd. Bydd angen i chi ddod o hyd i ddarparwr meddalwedd addas a all ddiwallu eich anghenion ffeilio ar gyfer Tŷ’r Cwmnïau a CThEF.
Darganfyddwch fwy am yr hyn sydd angen i chi ei wneud i baratoi ar gyfer cau’r gwasanaeth ar-lein i ffeilio eich cyfrifon a Ffurflen Dreth y Cwmni
Symud i ffeilio cyfrifon trwy feddalwedd yn unig
Yn y dyfodol, dim ond trwy ddefnyddio meddalwedd trydydd parti y gallwch ffeilio eich cyfrifon gyda Thŷ’r Cwmnïau.
Er bod ffyrdd eraill o ffeilio cyfrifon gyda ni ar hyn o bryd, gall y rhan fwyaf o gwmnïau wneud y newid i ddefnyddio meddalwedd nawr.
Mae ffeilio cyfrifon trwy feddalwedd yn rhoi’r hyblygrwydd mwyaf i chi arddangos data ariannol eich cwmni. Gall hefyd roi amrywiaeth o ymarferoldeb i chi i gefnogi rhedeg eich busnes. Mae llawer o ddarparwyr meddalwedd yn cynnig ystod o becynnau cyfrifeg i’ch helpu i baratoi a ffeilio cyfrifon – gallwch ddod o hyd i feddalwedd ar gyfer ffeilio dogfennau’r cwmni.
Yn y dyfodol, mi fydd y newid hwn yn cefnogi ein nod o alluogi gwasanaeth ffeilio cwbl ddigidol. Bydd hefyd yn ein helpu i gyflawni ein blaenoriaeth sefydliadol i atal troseddau economaidd a dod â’r DU yn unol ag arfer gorau rhyngwladol.
Ein nod yw rhoi o leiaf 21 mis o rybudd i gwmnïau cyn i’r newid hwn ddod i rym.
Cofrestrwch ar gyfer ein cylchlythyrau i gael y wybodaeth ddiweddaraf am ein gwasanaethau.