‘Mae angen Diwygio Lles yng Nghymru’
Stephen Crabb AS, Gweinidog Swyddfa Cymru yn siaradwr gwadd yn seminar Fforwm Polisi Cymru
Jobcentre Plus
Bydd Stephen Crabb AS, Gweinidog Swyddfa Cymru yn dweud heddiw yn ei araith yn seminar Fforwm Polisi Cymru, fod diwygiadau lles Llywodraeth y DU yn “gyfle unwaith mewn oes i dorri’r cylch dibyniaeth ac i ddod â gwerth a phwrpas gwirioneddol yn ôl i’r system lles” (13 Chwefror 2014).
Bydd y Gweinidog, a fydd yn annerch cynadleddwyr yng Nghaerdydd, yn amlinellu’r prif egwyddorion sy’n llywio’r diwygiadau lles yng Nghymru. Bydd hefyd yn galw ar bob lefel o’r Llywodraeth i gydweithio gyda “diddordeb a rennir mewn gweld cyflwr economaidd ein cenedl yn gwella,” gan nodi na ddylai’r diwygiadau lles “fod yn fan dall i Lywodraeth Cymru”.
Dywedodd Stephen Crabb, Gweinidog Swyddfa Cymru cyn siarad yn y seminar:
Er bod y nifer fwyaf erioed o bobl allan yn gweithio heddiw, mae tua 200,000 o bobl yma yng Nghymru o hyd sydd erioed wedi gweithio diwrnod yn eu bywyd. Mae hynny’n drasiedi i bob un o’r unigolion hynny ac mae’n drasiedi i’n cenedl ni. Mae angen i wlad fach fel Cymru fanteisio i’r eithaf ar bob sgil, talent a photensial sydd gennym ni.
Disgwylir i Mr Crabb ddweud “mai’r peth cyfrifol i’w wneud yw peidio ag annog llai o ddiwygiadau lles yng Nghymru” a bod “angen y diwygiadau lles yng Nghymru gymaint ag unrhyw le arall yn y DU.
Yn ystod ei araith, bydd y Gweinidog yn dweud y dylai’r egwyddorion arweiniol ar gyfer proses ddiwygio lwyddiannus fod yn seiliedig ar y canlynol:
Dyletswydd foesol i ddarparu rhwyd diogelwch a llwybr allan o dlodi
Darparu ystod lawn o gymorth, canllawiau a chymhellion sy’n rhoi’r cyfle i bobl wella eu hamgylchiadau a dychwelyd at y rhyddid sy’n gysylltiedig â bywyd annibynnol.
Adfer gwerth gweithio, a rhoi mwy o gymhelliant i bobl weithio
Newid y sefyllfa fel bod pobl bob amser yn cael cymhelliant ariannol i weithio o gymharu â’r dewis amgen o gael budd-daliadau.
System budd-daliadau sy’n adlewyrchu’r realiti sy’n gysylltiedig â’r farchnad lafur fodern
Mae Credyd Cynhwysol yn annog pobl ac yn eu cefnogi i gymryd eu camau cyntaf yn ôl i’r gwaith, gan gynyddu eu horiau wrth iddynt feithrin hyder a sgiliau.
Pontio’r bwlch rhwng y rhai sy’n dibynnu ar fudd-daliadau a’r rhai sy’n gweithio
Cau’r bwlch rhwng y dewisiadau y mae’n rhaid i’r rhai sy’n gweithio eu gwneud a’r dewisiadau a gaiff eu gwneud gan bobl sy’n cael budd-daliadau e.e. math o eiddo a maint yr eiddo, rheoli arian.
Bydd y Gweinidog yn pwysleisio’r rôl bwysig sydd gan San Steffan, Llywodraeth Cymru a Llywodraeth Leol i’w chwarae o ran cefnogi’r diwygiadau lles, gan ychwanegu bod y diwygiadau lles yma i aros: “fyddwn ni ddim yn troi’r cloc yn ôl nac yn dychwelyd at y math o system lles nad yw’n annog gwaith caled ac nad yw’n meithrin symudedd cymdeithasol”.
Bydd yn dweud “gydag uchelgais a rennir ar gyfer diwygio lles, bydd yr effeithiau y gall y diwygiadau hyn eu cael ar sefyllfa economaidd a chymdeithasol y genedl yn drawsffurfiol”.
Yn dilyn y seminar, bydd y Gweinidog yn ymweld â Chyngor Bwrdeistref Caerffili, lle mae cynllun peilot Credyd Cynhwysol yn darparu gwersi pwysig ar gyfer rhoi diwygiadau lles ar waith yn llwyddiannus yng Nghymru. Drwy roi arweiniad a chyngor ar ddyledion i wella sefyllfa ariannol y tenantiaid eu hunain, bydd y Gweinidog yn clywed gan yr awdurdod lleol yn uniongyrchol am ei rôl allweddol yn y broses o ddiwygio lles.
Nodiadau Olygyddion
- Bydd Mr Crabb yn cyflwyno ei araith am 09:05awr ar 13 Chwefror 2014 yng nghynhadledd Fforwm Polisi Cymru – “Cynhadledd ar Ddiwygio Lles a Thlodi yng Nghymru”