Canllawiau

Gwiriadau cydymffurfio — cosbau am anghywirdebau mewn Ffurflenni Treth neu ddogfennau — CC/FS7a

Diweddarwyd 25 Chwefror 2022

Cosbau am anghywirdebau mewn Ffurflenni Treth a dogfennau

Mae’r daflen wybodaeth hon yn rhoi gwybod i chi am y cosbau y gallwn eu codi os ydych wedi anfon Ffurflen Dreth neu ddogfen arall anghywir i ni. Mae’n rhan o gyfres o daflenni gwybodaeth ynghylch gwiriadau cydymffurfio. I weld y rhestr lawn, ewch i www.gov.uk/guidance/arweiniad-a-thaflenni-gwybodaeth-cthem ac edrych o dan y pennawd ‘Gwiriadau cydymffurfio’.

Os oes angen help arnoch

Os yw’n bosibl y gall eich amgylchiadau personol neu’ch iechyd ei gwneud yn anodd i chi ddelio â ni, rhowch wybod i’r swyddog sydd wedi cysylltu â chi. Byddwn yn eich helpu ym mha ffordd bynnag y gallwn. I gael rhagor o fanylion, ewch i www.gov.uk/cael-help-cthem-cymorth-ychwanegol.

Gallwch hefyd ofyn i rywun arall ddelio â ni ar eich rhan, er enghraifft, ymgynghorydd proffesiynol, ffrind neu berthynas. Fodd bynnag, efallai y bydd dal angen i ni siarad â chi neu ysgrifennu atoch yn uniongyrchol am rai pethau. Os bydd angen i ni ysgrifennu atoch, byddwn yn anfon copi at yr unigolyn rydych wedi gofyn i ni ddelio ag ef. Os bydd angen i ni siarad â chi, caiff yr unigolyn hwnnw fod gyda chi pan fyddwn yn gwneud hynny, pe bai’n well gennych.

Pryd y gallwn godi cosb arnoch am anghywirdeb

Gallwn godi cosb arnoch os byddwch yn anfon Ffurflen Dreth neu ddogfen arall atom sy’n cynnwys anghywirdeb, a bod yr anghywirdeb:

• yn arwain at dreth heb ei thalu, treth wedi’i thanddatgan neu’i gor-hawlio

• yn esgeulus, yn fwriadol neu’n fwriadol a chudd (rydym yn cyfeirio at y rhain fel ‘ymddygiadau’. Cânt eu hesbonio nes ymlaen yn y daflen wybodaeth hon)

Os gofynnwch i rywun arall, fel cyflogai neu ymgynghorydd, wneud rhywbeth ar eich rhan, mae’n rhaid i chi wneud cymaint ag y gallwch i wneud yn siŵr nad oes anghywirdeb yn codi. Os na wnewch hyn, mae’n bosibl y codwn gosb arnoch.

Adegau pan na fyddwn yn codi cosb arnoch am anghywirdeb

Ni fyddwn yn codi cosb arnoch am anghywirdeb os cymeroch ofal rhesymol i wneud yn siŵr eich bod yn cael popeth yn iawn, ond roedd eich Ffurflen Dreth neu ddogfen arall yn dal i fod yn anghywir. Mae rhai o’r ffyrdd y gallwch ddangos eich bod wedi cymryd gofal rhesymol yn cynnwys y canlynol:

• cadw cofnodion cywir

• gwirio gydag ymgynghorydd treth, neu gyda ni, os nad ydych yn siŵr am unrhyw beth

Datgelu anghywirdeb cyn i ni ddod o hyd iddo

Os ydych yn rhoi gwybod i ni am anghywirdeb cyn bod gennych reswm i gredu ein bod wedi dod o hyd iddo, neu ar fin dod o hyd iddo, rydym yn galw hynny’n ‘ddatgeliad heb ei annog’. Os ydych yn rhoi gwybod i ni am anghywirdeb ar unrhyw adeg arall, rydym yn ei alw’n ‘ddatgeliad wedi’i annog’.

Unwaith yr ydym wedi cychwyn gwiriad, ystyrir bod datgeliad yn un heb ei annog dim ond os, yn eithriadol, fod y canlynol yn gymwys:

• mae’n ymwneud ag anghywirdeb amherthnasol

• nid oedd gennych le i gredu y byddem yn dod o hyd iddo yn ystod ein gwiriad

Mae’r gosb isaf bosibl am ddatgeliad heb ei annog yn is na’r gosb isaf bosibl am ddatgeliad wedi’i annog.

Os byddwch yn anfon Ffurflen Dreth neu ddogfen atom gan gredu ei bod yn gywir ac yn canfod yn ddiweddarach bod anghywirdeb diofal ynddi, efallai y gallwn ostwng swm y gosb i ddim, os byddwch yn gwneud datgeliad heb ei annog.

Yr hyn y gallwch ei wneud i ostwng unrhyw gosb y gallwn ei chodi

Gallwn ostwng swm unrhyw gosb a godwn arnoch, yn dibynnu ar ein barn ynghylch faint o gymorth a roesoch i ni pan fyddwch yn gwneud datgeliad. Rydym yn cyfeirio at y cymorth hwn fel ‘ansawdd y datgeliad’, neu fel ‘dweud, helpu a rhoi’.

Mae enghreifftiau o wneud datgeliad yn cynnwys:

• dweud wrthym fod rhywbeth o’i le, neu gytuno bod rhywbeth o’i le, a sut a pham y digwyddodd

• rhoi cymaint o fanylion ag y gallwch am i ba raddau y mae rhywbeth o’i le, cyn gynted â’ch bod yn gwybod amdano

• dweud wrthym a’n helpu drwy ateb ein cwestiynau’n llawn

• ein helpu i ddeall eich cyfrifon neu’ch cofnodion

• ein helpu drwy ateb ein llythyrau’n brydlon

• ein helpu drwy gytuno i fod yn bresennol mewn cyfarfodydd, neu ymweliadau, ar amser sy’n gyfleus i bawb

• ein helpu drwy wirio’ch cofnodion er mwyn pennu i ba raddau y bu anghywirdeb

• ein helpu drwy ddefnyddio’ch cofnodion preifat i nodi gwerthiannau neu incwm sydd heb eu cynnwys ar eich Ffurflen Dreth

• rhoi mynediad i ni at y dogfennau rydym wedi gofyn amdanynt, heb oedi diangen

• rhoi mynediad i ni at y dogfennau y mae’n bosibl nad ydym yn gwybod amdanynt, yn ogystal â’r rheiny y gwnaethom ofyn am gael eu gweld

Byddwn yn gostwng y gosb gan y swm uchaf posibl os ydych:

• yn dweud wrthym bopeth y gallwch ynghylch unrhyw anghywirdeb cyn gynted ag y byddwch yn gwybod amdano, neu os credwch ein bod ar fin dod o hyd iddo

• yn gwneud popeth ag y gallwch i’n helpu i’w gywiro

Os byddwch yn oedi cyn gwneud datgeliad, mae’n bosibl y bydd gennych hawl i ostyngiad o hyd, ond bydd y gostyngiad yn un llai.

Os nad oes angen unrhyw gymorth ychwanegol arnom oddi wrthych, byddwn yn rhoi rhywfaint o ostyngiad i chi am ddweud, helpu a rhoi.

Rhoi gwybod i ni am unrhyw amgylchiadau arbennig

Os ydych o’r farn y dylai’r swyddog sy’n delio â’r gwiriad ystyried amgylchiadau arbennig wrth gyfrifo’r gosb, dylech roi gwybod iddo ar unwaith.

Sut rydym yn cyfrifo swm y gosb

Mae 8 cam wrth gyfrifo swm unrhyw gosb. Caiff pob cam ei esbonio’n fanylach isod.

1. Cyfrifo swm y refeniw a gollwyd o bosibl (PLR)

Mae’r gosb yn ganran o’r PLR. PLR yw’r swm sy’n codi:

• o ganlyniad i anghywirdeb mewn Ffurflen Dreth neu ddogfen

• ad-daliad anghywir

• hawliad anghywir

Bydd y swyddog sy’n delio â’r gwiriad yn esbonio sut y cyfrifir hwn. Mae yna reolau gwahanol am gyfrifo’r PLR pan fo materion yn ymwneud â rhyddhad grŵp, colledion, ad-daliadau neu amseru cyfrifyddu yn arwain at dreth wedi’i hoedi. Os oes angen i chi wybod rhagor, cysylltwch â’r swyddog sy’n delio â’r gwiriad.

2. Pennu ein barn ar yr ‘ymddygiad’

Pan fo anghywirdeb, byddwn yn gweithio gyda chi er mwyn canfod beth wnaeth ei achosi. Rydym yn cyfeirio at hwn fel yr ‘ymddygiad’. Bydd y math o ymddygiad yn effeithio ar p’un a fyddwn yn codi cosb a swm y gosb. Mae 4 math gwahanol o ymddygiad.

Gofal rhesymol

Mae gan bawb gyfrifoldeb i gymryd gofal rhesymol am eu materion treth. Bydd yr hyn a gaiff ei ystyried yn ‘ofal rhesymol’ yn dibynnu ar allu ac amgylchiadau pob cwsmer.

Os oedd rhywbeth ynghylch eich iechyd neu’ch amgylchiadau personol a oedd yn golygu ei bod yn anodd i chi gymryd gofal rhesymol, dywedwch wrth y swyddog sy’n cynnal y gwiriad. Bydd dweud wrtho am hynny’n ei alluogi i gymryd hyn i ystyriaeth wrth ystyried a wnaethoch gymryd gofal rhesymol.

Os cymeroch ofal rhesymol i gael pethau’n iawn, ond roedd eich Ffurflen Dreth neu’ch dogfen yn dal i gynnwys anghywirdeb, ni fyddwn yn codi cosb arnoch.

Mae rhai o’r ffyrdd y gallwch gymryd gofal rhesymol yn cynnwys:

• cadw digon o gofnodion i lenwi Ffurflenni Treth yn gywir

• cadw’r cofnodion hynny’n ddiogel

• ein holi ni, neu ymgynghorydd treth, os nad ydych yn siŵr am unrhyw beth, a dilyn unrhyw gyngor a roddir

Esgeulus

Dyma pan wnaethoch fethu â chymryd gofal rhesymol i gael pethau’n iawn.

Bwriadol

Dyma pan oeddech yn gwybod fod Ffurflen Dreth neu ddogfen yn anghywir pan wnaethoch ei chyflwyno i ni. Mae enghreifftiau o anghywirdebau bwriadol yn cynnwys gwneud y canlynol yn fwriadol:

• gorddatgan eich treuliau busnes

• tanddatgan eich incwm

• talu cyflogau heb roi cyfrif am gyfraniadau Talu Wrth Ennill ac Yswiriant Gwladol

Anghywirdebau bwriadol a chudd

Dyma pan oeddech yn gwybod bod Ffurflen Dreth neu ddogfen yn anghywir a gwnaethoch gymryd camau i guddio’r anghywirdeb oddi wrthym, naill ai cyn neu ar ôl i chi ei hanfon atom. Un enghraifft o gymryd camau i guddio anghywirdeb yw creu anfoneb ffug ar gyfer prynu stoc nad yw’n bodoli.

3. Penderfynu a yw’r datgeliad yn un heb ei annog neu wedi’i annog

Mae hyn yn pennu canran isaf bosibl y gosb y gallwn ei chodi. Rhoddir esboniad manylach yn yr adran ‘Datgelu anghywirdeb cyn i ni ddod o hyd iddo’ yn y daflen wybodaeth hon.

4. Penderfynu ar ystod y gosb

Mae canran y gosb yn syrthio i mewn i un o 6 ystod. Mae’r ystod y mae’n syrthio iddo’n dibynnu ar y math o ymddygiad, ac a oedd y datgeliad ‘wedi’i annog’ neu ‘heb ei annog’. Mae’r tabl canlynol yn dangos y 6 ystod cosb.

Math o ymddygiad	Datgeliad heb ei annog	Datgeliad wedi’i annog
Gofal rhesymol	Dim cosb	Dim cosb
Esgeulus	0% i 30%	15% i 30%
Bwriadol	20% i 70%	35% i 70%
Yn fwriadol ac yn guddiedig	30% i 100%	50% i 100%

5. Cyfrifo’r gostyngiadau ar gyfer ansawdd y datgeliad (a elwir hefyd yn ‘dweud, helpu a rhoi’)

Mae’r gostyngiad a rown yn dibynnu ar faint o gymorth a rowch i ni. Ar gyfer:

• dweud, rydym yn rhoi hyd at 30%

• helpu, rydym yn rhoi hyd at 40%

• rhoi mynediad at gofnodion, rydym yn rhoi hyd at 30%

Wrth ystyried ansawdd y datgeliad, byddwn hefyd yn ystyried pa mor hir y mae wedi ei gymryd i chi ddatgelu’r anghywirdeb. Os yw wedi cymryd amser hir i chi, (megis 3 blynedd neu fwy), i wneud datgeliad, byddwn fel arfer yn cyfyngu ar y gostyngiad mwyaf a rown am ansawdd y datgeliad i 10 pwynt canran yn uwch na lleiafswm y gosb. Mae hyn yn golygu na fyddwch yn cael budd o’r ganran gosb isaf sydd fel arfer ar gael.

6. Cyfrifo cyfradd ganrannol y gosb

Pennir cyfradd ganrannol y gosb gan ystod y gosb a’r gostyngiad ar gyfer ansawdd y datgeliad.

Enghraifft

Daethom o hyd i anghywirdeb esgeulus nad oedd y cwsmer wedi rhoi gwybod i ni amdano, cyn i ni ddechrau ein gwiriad. Pan wnaethom roi gwybod iddo am yr anghywirdeb, roedd yn cytuno â ni. Roedd hwn yn ddatgeliad wedi’i annog.

Ystod y gosb am anghywirdeb esgeulus gyda datgeliad wedi’i annog yw 15% i 30% o’r PLR.

Roedd y gostyngiad ar gyfer ansawdd y datgeliad (dweud, helpu a rhoi) yn 70%.

Camau	Enghraifft o gyfrifiad
I gyfrifo cyfradd ganrannol y gosb, yn gyntaf byddwn yn cyfrifo’r gwahaniaeth rhwng cyfraddau canrannol isaf ac uchaf y gosb.	30% llai 15% = 15
Yna, byddwn yn didynnu canran y gostyngiad oddi wrth ganran uchaf y gosb y gallwn ei chodi.	15 × 70% = 10.5%
Mae hyn yn rhoi cyfradd ganrannol y gosb i ni.	30% llai 10.5% = 19.5%

7. Cyfrifo swm y gosb

I gyfrifo swm y gosb, rydym yn lluosi’r PLR â chyfradd ganrannol y gosb. Yn yr enghraifft uchod, £3,000 yw’r PLR. Mae hyn yn golygu taw £585 yw’r gosb (£3,000 × 19.5% = £585).

8. Ystyried gostyngiadau eraill

Ar ôl cyfrifo swm y gosb, byddwn yn cymryd i ystyriaeth gostyngiadau eraill sy’n angenrheidiol. Mae hyn, yn ei dro, yn rhoi swm y gosb a godwn.

Sut y gallwn ohirio cosb

Gallwn ohirio cosb am anghywirdeb esgeulus os yw’r canlynol yn gymwys:

• rydym yn gallu gosod amodau i’ch helpu i osgoi cosbau yn y dyfodol

• rydym o’r farn y gallwch fodloni’r amodau hyn

Gallwn ohirio cosb am hyd at uchafswm o 2 flynedd. Fel arfer, bydd y cyfnod gohirio mor fyr â phosibl er mwyn eich galluogi i fodloni’r amodau. Os byddwn yn gohirio’ch cosb, ni fydd yn rhaid i chi dalu os byddwch yn bodloni’r amodau, heblaw eich bod yn dod yn agored i gosb arall am anghywirdeb yn ystod y cyfnod gohirio.

Yn ystod y cyfnod gohirio, mae’n rhaid i chi wneud yn siŵr nad ydych yn anfon unrhyw Ffurflenni Treth eraill atom sy’n cynnwys anghywirdebau. Os gwnewch hyn, gallech fod yn agored i gosb arall am anghywirdeb yn ystod y cyfnod gohirio. Os ydych yn dod yn agored i gosb arall am anghywirdeb yn ystod y cyfnod gohirio, bydd yn rhaid i chi dalu’r gosb a ohiriwyd yn flaenorol.

Mae rhagor o wybodaeth am hyn yn nhaflen wybodaeth CC/FS10, ‘Gohirio cosbau am wallau esgeulus mewn Ffurflenni Treth neu ddogfennau’. Ewch i www.gov.uk a chwilio am ‘CC/FS10’. Ni allwn ohirio cosbau am unrhyw fath arall o ymddygiad.

Sut y byddwn yn rhoi gwybod i chi am gosb

Byddwn yn ysgrifennu atoch i roi gwybod faint yw’r gosb a sut rydym wedi’i chyfrifo. Os oes unrhyw beth ynglŷn â’r gosb nad ydych yn cytuno ag ef, neu os ydych o’r farn bod gwybodaeth nad ydym eisoes wedi’i chymryd i ystyriaeth, dylech roi gwybod i ni ar unwaith.

Ar ôl cymryd i ystyriaeth unrhyw beth y cawsom wybod gennych, byddwn wedyn yn gwneud y naill neu’r llall o’r canlynol:

• anfon hysbysiad o asesiad o gosb atoch

• eich gwahodd i ymrwymo i gontract gyda ni i dalu’r gosb, ynghyd â’r dreth a’r llog

O dan rai amgylchiadau, efallai y bydd yn rhaid i chi dalu llog ar y gosb hefyd os nad ydych yn ei thalu mewn pryd.

Pan fydd yn rhaid i swyddog cwmni, o bosibl, dalu rhan o gosb y cwmni, neu’r gosb gyfan, am anghywirdeb bwriadol

Mae’n bosibl y bydd yn rhaid i swyddog cwmni dalu rhan o gosb y cwmni, neu’r gosb gyfan, os yw’r gosb yn ddyledus o ganlyniad i’w weithredoedd, a bod un neu fwy o’r canlynol yn gymwys:

• mae wedi, neu wedi ceisio, elwa’n bersonol o anghywirdeb bwriadol

• mae’r cwmni’n ansolfent, neu rydym o’r farn ei fod ar fin bod yn ansolfent — hyd yn oed os na wnaeth y swyddog elwa’n bersonol o’r anghywirdeb bwriadol

Os bydd y cwmni’n talu’r gosb, ni fyddwn yn gofyn i’r swyddogion unigol ei thalu.

Mae swyddog cwmni yn gyfarwyddwr, cyfarwyddwr cysgodol, ysgrifennydd y cwmni neu reolwr y cwmni, neu’n aelod o bartneriaeth atebolrwydd cyfyngedig.

Os ydych wedi gwneud rhywbeth yn anghywir yn fwriadol

Gallwn gynnal ymchwiliad troseddol gyda’r bwriad o erlyn os ydych wedi gwneud rhywbeth o’i le yn fwriadol, megis:

• rhoi gwybodaeth i ni gan wybod ei bod yn anwir, boed ar lafar neu ar bapur

• cam-gyfleu’n anonest faint o dreth sydd arnoch, neu hawlio taliadau nad oes gennych hawl iddynt

Rheoli diffygdalwyr difrifol

Os cawsoch eich materion treth yn anghywir yn fwriadol, a’n bod yn canfod hyn yn ystod y gwiriad, efallai y byddwn yn monitro’ch materion treth yn fanylach. Mae gennym raglen fonitro fanylach o’r enw ‘rheoli diffygdalwyr difrifol’. I gael rhagor o wybodaeth, darllenwch daflen wybodaeth CC/FS14, ‘Rheoli diffygdalwyr difrifol’. Ewch i www.gov.uk a chwilio am ‘CC/FS14’.

Cyhoeddi manylion diffygdalwyr bwriadol

Efallai y byddwn yn cyhoeddi’ch manylion os ydych wedi cael eich materion treth yn anghywir yn fwriadol, ond ni fyddwn yn gwneud hyn os ydym wedi rhoi’r gostyngiad mwyaf posibl i chi ar gyfer y gosb. I gael rhagor o wybodaeth, darllenwch daflen wybodaeth CC/FS13, ‘Cyhoeddi manylion diffygdalwyr bwriadol’. Ewch i www.gov.uk a chwilio am ‘CC/FS13’.

Os ydych yn anghytuno

Os oes rhywbeth nad ydych yn cytuno ag ef, rhowch wybod i ni.

Os byddwn yn gwneud penderfyniad y gallwch apelio yn ei erbyn, byddwn yn ysgrifennu atoch ynghylch y penderfyniad ac yn rhoi gwybod i chi beth i’w wneud os ydych yn anghytuno. Fel arfer, bydd gennych 3 opsiwn. Cyn pen 30 diwrnod, gallwch wneud y canlynol:

• anfon gwybodaeth newydd at y swyddog sy’n delio â’r gwiriad, a gofyn iddo ei hystyried

• cael eich achos wedi’i adolygu gan un o swyddogion CThEF na fu’n ymwneud â’r mater cyn hyn

• trefnu bod tribiwnlys annibynnol yn gwrando ar eich apêl ac yn penderfynu ar y mater

Pa un bynnag opsiwn a ddewiswch, gallwch hefyd ofyn i un o swyddogion arbenigol CThEF weithredu fel hwylusydd diduedd er mwyn helpu i ddatrys yr anghydfod. Gelwir hyn yn ‘Dull Amgen o Ddatrys Anghydfod’ (ADR).

Dim ond ar gyfer anghydfodau sy’n ymwneud â meysydd treth penodol y mae ADR ar gael. Bydd y swyddog sy’n delio â’r gwiriad yn rhoi gwybod i chi a yw ADR ar gael ar gyfer eich anghydfod. I gael rhagor o wybodaeth am apeliadau ac ADR, darllenwch y taflenni gwybodaeth canlynol:

• HMRC1, ‘Penderfyniadau Cyllid a Thollau EF: beth i’w wneud os anghytunwch’

• CC/FS21, ‘Dull Amgen o Ddatrys Anghydfod’

Ewch i www.gov.uk a chwilio am ‘HMRC1’ neu ‘CC/FS21’.

Eich hawliau os ydym yn ystyried cosbau

Mae’r Confensiwn Ewropeaidd ar Hawliau Dynol yn rhoi hawliau pwysig penodol i chi. Os ydym yn ystyried cosbau, byddwn yn rhoi gwybod i chi. Byddwn hefyd yn rhoi gwybod i chi fod yr hawliau hyn yn gymwys, ac yn gofyn i chi gadarnhau eich bod yn eu deall. Mae’r hawliau hyn fel a ganlyn:

• os byddwn yn gofyn unrhyw gwestiynau i chi i’n helpu i benderfynu p’un a ddylid codi cosb arnoch, mae gennych yr hawl i beidio â’u hateb

• mae faint o gymorth a rowch i ni pan fyddwn yn ystyried cosbau yn fater i chi benderfynu yn ei gylch yn llwyr

• wrth benderfynu a ydych am ateb ein cwestiynau neu beidio, efallai yr hoffech gael cyngor gan ymgynghorydd proffesiynol — yn enwedig os nad oes un gennych yn barod

• os ydych yn anghytuno â ni ynglŷn â’r cosbau y credwn eu bod yn ddyledus, gallwch apelio

• mae gennych yr hawl i wneud cais am gynhorthwy cyfreithiol a ariennir er mwyn delio ag unrhyw apêl yn erbyn rhai cosbau penodol

• mae gennych yr hawl i ddisgwyl i ni ddelio â mater sy’n ymwneud â chosbau heb oedi afresymol

Mae rhagor o wybodaeth am yr hawliau hyn yn nhaflen wybodaeth CC/FS9, ‘Y Ddeddf Hawliau Dynol a chosbau’.

Ewch i www.gov.uk a chwilio am ‘CC/FS9’.

Pa drethi a chyfnodau treth y mae’r rheolau cosbi hyn yn berthnasol iddynt

Mae’r rheolau cosbi hyn yn berthnasol i’r trethi canlynol ar gyfer Ffurflenni Treth neu ddogfennau a oedd fod i gael eu hanfon atom ar neu ar ôl 1 Ebrill 2009, ac maent yn ymwneud â chyfnod treth sy’n dechrau ar neu ar ôl 1 Ebrill 2008:

• Treth Enillion Cyfalaf

• Cynllun y Diwydiant Adeiladu

• Treth Gorfforaeth

• Treth Incwm (gan gynnwys Hunanasesiad)

• Yswiriant Gwladol Dosbarthiadau 1 a 4

• Talu Wrth Ennill (TWE)

• TAW

Mae’r rheolau cosbi hyn yn berthnasol ar gyfer y trethi canlynol o ran Ffurflenni Treth neu ddogfennau a oedd fod i gael eu hanfon atom ar neu ar ôl 1 Ebrill 2010, ac maent yn ymwneud â chyfnod treth sy’n dechrau ar neu ar ôl 1 Ebrill 2009:

• Ardoll Agregau

• Toll Teithwyr Awyr

• Toll Alcohol

• Toll Trwydded Peiriannau Diddanu (hyd at 31 Ionawr 2013)

• Treth Cyflogres Banc

• Toll Bingo

• Ardoll Newid yn yr Hinsawdd

• Tollau Ecseis (Daliad a Symudiadau)

• Toll Hapchwarae

• Toll Olewau Hydrocarbon

• Treth Etifeddiant

• Treth Premiwm Yswiriant

• Treth Dirlenwi

• Toll y Loteri

• Treth Refeniw Petroliwm

• Toll Cronfa Fetio

• Toll Hapchwarae o Bell

• Ardoll y Diwydiant Diodydd Ysgafn (o 6 Ebrill 2018 ymlaen)

• Treth Dir y Tollau Stamp

• Treth Tollau Stamp Wrth Gefn

• Treth Tybaco

Mae’r rheolau cosbi hyn yn berthnasol ar gyfer y trethi canlynol o ran Ffurflenni Treth neu ddogfennau sy’n ymwneud â’r cyfnodau canlynol:

• Yswiriant Gwladol Dosbarth 1A ar gyfer P11D(b) (Ffurflenni Treth ar gyfer y flwyddyn dreth a ddaeth i ben ar 5 Ebrill 2011 a blynyddoedd hwyrach)

• Toll Peiriannau Hapchwarae (ar gyfer cyfnodau treth sy’n dechrau ar neu ar ôl 1 Chwefror 2013)

• Treth Flynyddol ar Anheddau wedi’u Hamgáu (ar gyfer cyfnodau treth sy’n dechrau ar neu ar ôl 1 Ebrill 2013)

• Ardoll Brentisiaethau (ar gyfer blynyddoedd treth yn dechrau ar neu ar ôl 6 Ebrill 2017)

• Ardoll y Diwydiant Diodydd Ysgafn (ar gyfer cyfnodau sy’n dechrau ar neu ar ôl 6 Ebrill 2018)

• Treth Gwasanaethau Digidol (ar gyfer cyfnodau sy’n dechrau ar neu ar ôl 1 Ebrill 2020)

• Treth Gwasanaethau Digidol (ar gyfer cyfnodau sy’n dechrau ar neu ar ôl 1 Ebrill 2022)

Rhagor o wybodaeth

Ein hysbysiad preifatrwydd

Mae ein hysbysiad preifatrwydd yn nodi’r safonau y gallwch eu disgwyl gennym pan fyddwn yn gofyn am wybodaeth neu’n cadw gwybodaeth amdanoch. Ewch i www.gov.uk a chwilio am ‘HMRC Privacy Notice’.

Os nad ydych yn fodlon ar ein gwasanaeth

Rhowch wybod i’r person neu’r swyddfa rydych wedi bod yn delio â nhw. Byddant yn ceisio unioni pethau. Os ydych yn dal i fod yn anfodlon, byddant yn rhoi gwybod i chi sut i wneud cwyn ffurfiol.