رہنمائی

پیدائشی پیدائشی عارضہ قلب: والدین کے لئے معلومات (Urdu)

اپ ڈیٹ کردہ 23 اپریل 2025

جائزه

اگر 20-ہفتوں کے اسکین  (بعض اوقات وسط حمل کا اسکین بھی کہا جاتا ہے) کے بعد آپ کے بچے کو پیدائشی عارضہ قلب (CHD) ہونے کا شبہ آپ کے ہو گا تو یہ معلومات مفید ہو گی۔ یہ آپ کو اور آپ کے ہیلته‍پروفیشنلز کو آپ کی اور آپ کے بچے کی دیکھ بھال کے اگلے مراحل سے گزرنے میں مدد فراہم کرے گا۔ ان معلومات کو ہیلته‍‍پروفیشنلز کے ساتھ آپ کی بات چیت کی حمایت کرنی چاہیے، لیکن اسے تبدیل نہیں کرنا چاہیے۔

یہ معلوم ہونا پریشان کن ہو سکتا ہے کہ آپ کے بچے کی نشوونما میں کوئی مسئلہ ہو سکتا ہے ۔ یہ یاد رکھنا ضروری ہے کہ آپ اکیلے نہیں ہیں۔

ہم آپ کو ایک سپیشلسٹ ٹیم کے پاس بھیجیں گے جو اپنی پوری کوشش کرے گی تاکہ:

• آپکے بچے کے عارضے اور علاج کے بارے میں مزید درست معلومات فراہم کریں۔
• آپ کے کسی بھی سوال کا جواب دیں.
• اگلے اقدامات کی منصوبہ بندی کرنے میں آپ کی مدد کریں۔

پیدائشی عارضہ قلب کے بارے میں

پیدائشی عارضہ قلب (CHD) کو سمجھنے کے لیے، یہ سمجھنا مفید ہو سکتا ہے کہ صحت مند دل کیسے کام کرتا ہے۔

دل تقریباً آپ کی مٹھی کے سائز کا ایک عضلہ ہے۔ اس کا کام پورے جسم کو خون بھیجنا ہے۔ یہ خون جسم کو درکار آکسیجن اور غذائی اجزاء فراہم کرتا ہے۔ دل کا دائیں جانب خون پھیپھڑوں تک پہنچاتا ہے جہاں آکسیجن کو بڑهایا جاتا ہے۔ بائیں جانب پھیپھڑوں سے باقی جسم تک خون پمپ کرتا ہے۔

دل اور خون کی وه شریانیں جو دل کے اندر اور باہر آتی جاتی ہیں (تصویر ٹآئنی ٹکرز سے)

پیدائشی عارضہ قلب سے مراد دل کی مختلف حالتیں ہیں جو حاملہ ہونے کے پہلے چند ہفتوں میں پیش آتی ہیں۔

پیدائشی عارضہ قلب کے 3 اہم قسمیں ہوتی ہیں: ایسے عارضے جو متاثر کرتے ہیں:

• بچے کے دل کی ساخت کو
• دل کے کام کرنے کو
• دل کی دھڑکن کی تال کو

کم سنگین عاضے میں بچے کے دل میں تنگ ایسے والوز یا سوراخ شامل ہوسکتے ہے جو خون کو غلط طریقے سے بہنے اور مکس کرنے دیتا ہے۔

زیادہ سنگین صورتوں میں، جسے ‘کریٹیکل پیدائشی عارضہ قلب’ کہا جاتا ہے، بچے کے دل کے کچھ حصے غائب ہو سکتے ہیں یا اچھی طرح سے تشکیل نہیں پاتے۔ پیدائشی عارضہ قلب والے بچوں میں ایک چوتھائی تک (25%) سنگین پیدائشی عارضہ قلب ہے۔

وجوہات

ہم بالکل نہیں جانتے کہ پیدائشی عارضہ قلب کی کیا وجہ ہے۔ یہ کسی ایسی چیز کی وجہ سے نہیں ہوتا جو آپ نے کیا ہے یا نہیں کیا ہے۔ یہ عارضہ عام طور پر اس لیے ہوتی ہے کیونکہ بچے کی ابتدائی نشوونما کے دوران کچھ واقع ہوتا ہے۔ یہ بعض اوقات دیگر طبی عارضوں سے منسلک ہوتا ہے، جیسے کہ وہ جو آپ کے بچے کے کروموسوم (جینیاتی معلومات) اور دل کو متاثر کرتے ہیں۔ آپ ایک سپیشلسٹ ٹیم کے ساتھ اپنے انفرادی حالات پر تبادلہ خیال کر سکیں گے۔

پیدائشی عارضہ قلب ہر 1,000 (0.8%) میں سے تقریباً 8  بچوں میں ہوتا ہے۔

ہم پیدائشی عارضہ قلب کو کیسے معلوم کرتے ہیں

ہم پیدائشی عارضہ قلب کے لیے ’20 ہفتے کے اسکین‘ پر اسکرین کرتے ہیں (18+0  سے 20+6 ہفتوں کے حمل کے درمیان)۔ بعض اوقات ہم اسے حمل کے پہلے یا بعد میں اسکین کے دوران نوٹس کرتے ہیں۔ بچے کی پیدائش سے پہلے دل کے تمام حالات نہیں دیکھے جا سکتے۔

فالو اپ ٹیسٹ اور اپوائنٹمنٹس

جیسا کہ اسکین کا نتیجہ یہ بتاتا ہے کہ آپ کے بچے کو پیدائشی عارضہ قلب ہے، ہم آپ کو حاملہ ماؤں اور ان کے بچوں کی پیدائش سے پہلے ان کی دیکھ بھال کرنے والے ماہرین کی ایک ٹیم کے پاس بھیج رہے ہیں۔ وہ اس ہسپتال میں مقیم ہو سکتے ہیں جہاں آپ فی الحال قبل از پیدائش کی دیکھ بھال حاصل کر رہی ہیں، یا کسی دوسرے ہسپتال میں۔ یہ یقینی طور پر معلوم کرنے کے لیے کہ آیا آپ کے بچے کو یہ عارضہ لاحق ہے یا نہیں آپ کو دوسرے اسکین کی ضرورت ہوگی۔ سپیشلسٹ ٹیم اس بات کی تصدیق کر سکے گی کہ آیا آپ کے بچے کو پیدائشی عارضہ قلب ہے اور اس کا کیا مطلب ہو سکتا ہے۔

سپیشلسٹ ٹیم سے ملنے سے پہلے جو سوالات آپ پوچھنا چاہتی ہیں انہیں لکھنا مفید ہو سکتا ہے۔

سپیشلسٹ ٹیم آپ کو اضافی ٹیسٹ کی پیشکش کر سکتی ہے، جیسے کہ کوریونک ویلس سیمپلنگ (CVS) یا ایمنیوسینٹیسس۔

اگر آپ کے بچے کو پیدائشی عارضہ قلب CHD ہے، تو سپیشلسٹ ٹیم آپ کے بچے کی نگرانی کے لیے آپ کو اضافی الٹراساؤنڈ اسکین پیش کرے گی۔  وہ آپ کو آپ کے بچے کی پیدائش سے پہلے اس کی صحت کی مزید تفصیلی نگرانی کی پیشکش بھی کر سکتے ہیں۔ بعض صورتوں میں، سپیشلسٹ ٹیم تجویز کر سکتی ہے کہ آپ بچے کو اپنی مقررہ تاریخ سے پہلے جنم دیں۔

علاج

آپ اور آپ کے بچے کی دیکھ بھال کرنے والی ٹیم میں فیٹیل کارڈیالوجسٹ (دل کے سپیشلسٹ) جیسے ماہرین شامل ہوں گے، جو آپ کے بچے کی دیکھ بھال میں مدد کریں گے۔ وہ آپ سے عارضے، ممکنہ پیچیدگیوں، علاج اور یہ کہ آپ اپنے بچے کی پیدائش کے لیے کیسے تیاری کر سکتی ہیں کے بارے میں بات کریں گے۔

پیدائشی عارضہ قلب والے کچھ بچوں کو پیدا ہونے کے بعد آپریشن کی ضرورت ہوگی، دوسروں کو نہیں ہوگی۔

سنگین پیدائشی عارضہ قلب والے بچوں کو ایک ایسی یونٹ میں خصوصی طبی امداد کی ضرورت ہوگی جو پیدائشی عارضہ قلب والے بچوں کی دیکھ بھال میں تجربہ کار ہو۔  ان بچوں کو پیدائش کے بعد، عام طور پر اپنی پہلی سالگرہ سے پہلے آپریشن کی ضرورت ہوگی۔

آپ کے بچے کو ہسپتال میں جتنا وقت گزارنے کی ضرورت ہے اس کا انحصار بچے پر ہوتا ہے اور یہ ہفتوں سے مہینوں تک مختلف ہوتا ہے۔ یہ ایسی چیزوں پر منحصر ہے جیسے آپ کے بچے کو کس قسم کے آپریشن کی ضرورت ہے، صحت یاب ہونے کا وقت، آیا کوئی پیچیدگیاں یا اس سے وابستہ عارضے ہیں، آپ کا بچہ کس طرح کهلایا جارہا ہے اور آیا اسے سانس لینے میں کسی اضافی مدد کی ضرورت ہے۔ سپیشلسٹ ٹیم آپ کے انفرادی حالات کے لحاظ سے آپ کو مزید معلومات دینے کے قابل ہوگی۔

طویل مدتی صحت

پیدائشی عارضہ قلب وسیع اور متنوع عارضه ہے۔ اگر صحت کے دیگر مسائل بھی ہوں تو اس کا علاج کرنا سیدھا، یا پیچیدہ (اور زیادہ سنگین) ہوسکتا ہے۔ آپ اور آپ کے بچے کے لیے ممکنہ نقطہ نظر آپ کے انفرادی حالات پر منحصر ہوگا۔ صورتحال جو بھی ہو ماہر ٹیم آپ کی مدد کرے گی۔

آپ کے بچے کی دیکھ بھال کرنے والی سپیشلسٹ ٹیم اپنی پوری کوشش کرے گی کہ:

• آپ کے کسی بھی سوال کا جواب دے
• اگلے اقدامات کی منصوبہ بندی کرنے میں آپ کی مدد کریں

اگلے اقدامات اور انتخاب

آپ حمل کے دوران آپ کی دیکھ بھال کرنے والی ٹیم سے اپنے بچے کے پیدائشی عارضہ قلب اور اپنے آپشنز کے بارے میں بات کر سکتی ہیں۔ ان میں اپنا حمل جاری رکھنا یا اپنا حمل ختم کرنا شامل ہوگا۔ ہوسکتا ہے آپ پیدائشی عارضہ قلب کے بارے میں مزید جاننا چاہیں گی۔ اس صورتحال میں والدین کی مدد کرنے کا تجربہ رکهنے والی کسی سپورٹ آرگنائزیشن  سے بات کرنا مددگار ثابت ہو سکتا ہے۔

اگر آپ اپنا حمل جاری رکھنے کا فیصلہ کرتی ہیں، تو سپیشلسٹ ٹیم آپ کی مدد کرے گی که:

• اپنی دیکھ بھال اور اپنے بچے کی پیدائش کا منصوبہ بنائیں
• اپنے بچے کو گھر لے جانے کی تیاری کریں۔

اگر آپ اپنا حمل ختم کرنے کا فیصلہ کرتی ہیں، تو آپ کو اس بارے میں معلومات دی جائیں گی کہ اس میں کیا شامل ہے اور آپ کی مدد کیسے کی جائے گی۔ آپ کو اپنے حمل کو کہاں اور کیسے ختم کرنا ہے اس کے انتخاب کی پیشکش کی جانی چاہیے اور آپ اور آپ کے خاندان کے لیے انفرادی مدد فراہم کی جانی چاہیے۔

صرف آپ جانتی ہیں کہ آپ اور آپ کے خاندان کے لیے بہترین فیصلہ کیا ہے۔ آپ جو بھی فیصلہ کریں گی، آپ کے ہیلتھ کیئر پروفیشنلز آپ کی مدد کریں گے۔

مستقبل کے حمل

مستقبل کے حمل پیدائشی عارضہ قلب سے متاثر ہونے کا امکان نہیں ہے۔

مزید معلومات

اینٹی نیٹل ریزلٹس اینڈ چوائسز(ARC) ایک قومی خیراتی ادارہ ہے جو اسکریننگ اور تشخیص اور حمل جاری رکھنے یا نہ کرنے کے بارے میں فیصلے کرنے میں لوگوں کی مدد کرتا ہے۔

 برٹش ہارٹ فاؤنڈیشن (BHF)  کے پاس دل اور دوران خون کی بیماریوں اور ان کے خطرے کے عوامل کے بارے میں سادہ معلومات ہیں۔

 چلڈرن ہارٹ فیڈریشن  والدین کی زیرقیادت ایک خیراتی ادارہ ہے جو پارٹنر گروپس کے ساتھ کام کر رہا ہے تاکہ برطانیہ میں دل کی لاحق شده یا پیدائشی بیماری والے بچوں اور نوجوانوں کی زندگی کو بہتر بنایا جا سکے۔

NHS.UK کے پاس عارضوں، علامات اور علاج کے لیے ایک مکمل گائیڈ ہے، بشمول اس کے که کیا کرنا ہے اور کب مدد حاصل کرنی ہے۔

 ٹائنی ٹکرز  برطانیہ میں ایک خیراتی تنظیم ہے جس کا مقصد معیارات کو بہتر بنانے، خصوصی تربیت فراہم کرنے اور تعلیم اور معلومات میں اضافہ کے امتزاج کے ذریعے پیدائشی عارضہ قلب میں مبتلا بچوں کی جلد سراغ، تشخیص اور دیکھ بھال کو بہتر بنانا ہے۔

 ان والدین کے لیے معلومات جنہیں کوریونک ویلس سیمپلنگ (CVS) یا امنیوسینٹیسس ڈائیاگنوسٹک ٹیسٹ کی پیشکش کی جاتی ہے  ۔

 NHS انگلینڈ آپ کی اسکریننگ کی معلومات کو کس طرح استعمال اور حفاظت کرتا ہے  یہاں معلوم کریں.

اسکریننگ سے دستبردار ہونے کا طریقہ کیا ہے  یہاں معلوم کریں ۔