Guidance

Working with children in the charity sector and overseas aid organisations (Welsh)

Updated 21 February 2025

Ymwadiad : Nid cyngor cyfreithiol yw hwn. Os oes angen help arnoch i sicrhau eich bod yn cydymffurfio â’r gyfraith, dylech siarad â chynghorydd cyfreithiol.

1. Cyflwyniad

Mae’r daflen hon yn esbonio cymhwysedd ar gyfer gwiriadau’r Gwasanaeth Datgelu a Gwahardd (DBS) ar gyfer pobl sy’n gweithio gyda phlant yn y sector elusennol a sefydliadau cymorth tramor. Mae’r canllawiau hyn yn berthnasol p’un a yw’r unigolion yn cael eu talu neu’n ddi-dâl.

Gall unrhyw newidiadau i rôl neu’r gweithgareddau y mae person yn eu cyflawni effeithio ar lefel y gwiriad sy’n berthnasol. Am ragor o wybodaeth, gweler ein gwefan canllaw cymhwyster.

Mae tri sefydliad yn cynnal gwiriadau cefndir troseddol yn y DU:

• Gwasanaeth Datgelu a Gwahardd (DBS)

• Disclosure Scotland (DS)

• Access Northern Ireland (ANI)

Mae gwahaniaethau yn y ddeddfwriaeth ar gyfer Cymru a Lloegr, Gogledd Iwerddon, a’r Alban. Mae hyn yn golygu y gall cymhwysedd ar gyfer gwiriadau fod yn wahanol, a gellir datgelu gwybodaeth wahanol ar draws awdurdodaethau.

Os yw unigolyn yn gwneud cais am wiriad Sylfaenol at ddefnydd personol lle nad oes penderfyniad addasrwydd yn cael ei wneud, neu os nad yw’r rôl wedi’i lleoli yn y DU, dylai ddefnyddio’r gwasanaeth yn seiliedig ar ble mae’n byw.

Ar gyfer gwiriadau Safonol a Manylach, pan yw’r penderfyniad addasrwydd yn cael ei wneud, bydd yn pennu pa sefydliad y dylid ei ddefnyddio.

Os yw’r penderfyniad addasrwydd yn cael ei wneud yng Nghymru, Lloegr, Ynysoedd y Sianel neu Ynys Manaw, dylid defnyddio’r DBS.

Pan yw’r penderfyniad addasrwydd ynghylch yr ymgeisydd i gyflawni’r rôl yn cael ei wneud yn yr Alban, yna dylid cyflwyno cais i Disclosure Scotland.  

Os yw’r penderfyniad addasrwydd yn cael ei wneud yng Ngogledd Iwerddon, dylid cyflwyno’r cais i Access NI.

Mae’r canllawiau hyn yn berthnasol i wiriadau cofnodion troseddol yng Nghymru, Lloegr, Ynysoedd y Sianel ac Ynys Manaw. Gellir cael gwybodaeth am wiriadau sydd ar gael yn yr Alban oddi wrth Disclosure Scotland. Gellir cael gwybodaeth am wiriadau sydd ar gael yng Ngogledd Iwerddon oddi wrth Access NI.

Ar gyfer rolau sydd wedi’u lleoli dramor lle mae’r penderfyniad addasrwydd yn cael ei wneud yn y DU, dylai sefydliadau ddewis pa ddarparwr i’w ddefnyddio yn seiliedig ar y canllawiau uchod.

Gall rhai troseddau tramor ymddangos yn achlysurol ar wiriadau DBS, ond nid yw hyn yn wir bob amser, ac nid oes gan y DBS fynediad at gofnodion troseddol mewn gwledydd eraill.

Mae’r DBS yn argymell yn gryf eich bod yn cynnal gwiriadau cofnodion troseddol tramor ar wahân megis Tystysgrifau Cymeriad Da lle bo’n berthnasol.

Lle gwneir y penderfyniad addasrwydd dramor, h.y. y tu allan i’r DU, gellir ceisio gwybodaeth drwy gyfundrefnau cofnodion troseddol yn y wlad benodol honno neu dystysgrif ymddygiad da gan wlad enedigol yr unigolyn. Yn y DU, byddai hon yn dystysgrif heddlu trwy ACRO.

Mae gwybodaeth am sut i gael tystysgrif ymddygiad da mewn gwahanol wledydd ar gael yma.

Os yw’r rôl yn cynnwys gweithio neu wirfoddoli gyda phlant dramor, a bod y penderfyniad recriwtio’n cael ei wneud dramor, gall yr unigolyn hefyd fod yn gymwys i gael Tystysgrif Amddiffyn Plant Ryngwladol (ICPC) os yw’n ddinesydd y DU neu wedi byw yn y DU yn flaenorol. Mae’r ICPC yn fenter ar y cyd rhwng yr Asiantaeth Troseddau Cenedlaethol ac uned genedlaethol yr heddlu, ACRO. Mae’r ICPC yn cadarnhau a oes gan unigolyn hanes troseddol ai peidio ac yn darparu manylion, gan gynnwys data perthnasol am euogfarnau a data am heb fod yn euog. Gall y dystysgrif hefyd gynnwys gwybodaeth am euogfarnau troseddol ar gyfer unrhyw droseddau a gyflawnwyd mewn gwledydd eraill. I gael rhagor o wybodaeth am yr ICPC, cyfeiriwch at gwybodaeth yr ICPC ar gyfer sefydliadau 

2. Diffiniad o elusen

Os yw’ch sefydliad wedi’i gofrestru gyda’r Comisiwn Elusennau a bod ganddo rif elusen gofrestredig, mae’n elusen. Os nad yw’ch sefydliad wedi’i gofrestru gyda’r Comisiwn Elusennau, gall fod yn elusen o hyd. Mae Deddf Elusennau 2011 yn diffinio ‘elusen’ ​​fel sefydliad sydd:

• wedi’i sefydlu at ddibenion elusennol yn unig ac

• yn ddarostyngedig i reolaeth awdurdodaeth cyfraith elusennau’r Uchel Lys

Mae’r Comisiwn Elusennau wedi cyhoeddi rhagor o wybodaeth ar ei wefan.

3. Diffiniad o wirfoddolwr

At ddibenion y Gwasanaeth Datgelu a Gwahardd, mae’r diffiniad o wirfoddolwr wedi’i nodi yn Rheoliadau Deddf yr Heddlu 1997 (Cofnodion Troseddol) 2002. Os yw rôl yn gymwys am wiriad Safonol neu Fanylach gan y Gwasanaeth Datgelu a Gwahardd, rhaid i’r elusen sicrhau ei bod yn bodloni’r meini prawf a nodir yn y diffiniad. isod cyn cyflwyno cais DBS rhad ac am ddim:

• person sy’n cymryd rhan mewn gweithgaredd sy’n cynnwys treulio amser, yn ddi-dâl (ac eithrio costau teithio a mân dreuliau cymeradwy eraill), yn gwneud rhywbeth sydd â’r nod o fod o fudd i ryw drydydd parti heblaw, neu’n ychwanegol at, berthynas agos

Os yw’r rôl yn bodloni dwy ran y diffiniad hwn, gellir marcio’r blwch ‘gwirfoddolwr’ ar y cais a bydd y cais yn rhad ac am ddim.

Nid yw rhywun sy’n gwneud gwaith di-dâl fel rhan o gwrs astudio a fyddai’n arwain at gymhwyster yn cael ei ystyried yn wirfoddolwr at ddibenion y DBS. Nid yw profiad gwaith y bwriedir iddo wneud rhywun yn fwy cyflogadwy ychwaith yn cael ei ystyried yn waith gwirfoddol.

4. Cymhwysedd ar gyfer gwiriadau DBS

Rheolir mynediad at wiriadau DBS Safonol a Manylach gan y gyfraith.

Nid yw’r gyfraith yn dweud pryd y mae’n ‘rhaid’ cynnal gwiriad DBS Safonol neu Fanylach, ond mae’n nodi pryd y ‘gellir gwneud cais am wiriad DBS’. Gall sefydliadau gynhyrchu eu canllawiau eu hunain yn nodi pryd y maent am ofyn am wiriadau DBS, ond rhaid i’r canllawiau hyn gydymffurfio â’r gyfraith sy’n caniatáu gwneud cais am wiriad DBS.

Gall unrhyw un wneud cais am eu gwiriad DBS Sylfaenol eu hunain trwy ein gwefan – nid oes rhaid iddo fod at ddibenion recriwtio ac nid oes angen bodloni unrhyw feini prawf cymhwysedd.

Dim ond pan fydd rhywun yn cyflawni’r gweithgareddau a fyddai’n eu gwneud yn gymwys i gael gwiriad fel rhan o’u cyfrifoldebau beunyddiol y dylid gwneud cais am wiriadau DBS Safonol a Manylach. Ni ddylid gwneud cais amdanynt oherwydd y gallai rhywun wneud y gwaith hwnnw rywbryd yn y dyfodol, neu rhag ofn y bydd argyfwng yn golygu bod yn rhaid iddynt wneud hynny. 

Mae Deddf Diogelu Grwpiau Hyglwyf 2006 yn nodi, pan fo plentyn rhwng 16 a 17 oed ac mewn unrhyw fath o waith cyflogedig neu ddi-dâl, nad yw’r rheini sy’n addysgu, yn hyfforddi, yn cyfarwyddo, yn gofalu amdanynt neu’n eu goruchwylio, neu’r rhai sy’n rhoi cyngor ac arweiniad iddynt fel rhan o’u cyflogaeth mewn gweithgaredd a reoleiddir gyda phlant. Mae hyn yn golygu nad ydynt yn gymwys i gael gwiriad Safonol neu Fanylach gan y Gwasanaeth Datgelu a Gwahardd. Os yw’r plentyn o dan 16 oed ac mewn unrhyw fath o gyflogaeth, yna byddai’r person sy’n ei addysgu neu’n ei hyfforddi mewn gweithgaredd a reoleiddir (os bodlonir yr amod cyfnod).

5. Gweithio neu wirfoddoli i elusen

Nid yw pob rôl ynghylch gweithio neu wirfoddoli i elusen yn gymwys i gael gwiriad Safonol neu Fanylach gan y Gwasanaeth Datgelu a Gwahardd.

Mae cymorth ar sut i ganfod a oes cymhwysedd ar gael ar ein gwefan.

Dyma rai enghreifftiau o wahanol fathau o rolau elusen:

5.1 Ymddiriedolwyr elusennau plant

Gellir gofyn i unrhyw ymddiriedolwr elusen plant wneud cais am wiriad DBS Manylach yn y gweithlu plant. Ar gyfer y rôl ymddiriedolwr, nid oes cymhwysedd ar gyfer gwiriad Rhestr Gwahardd Plant.

At ddibenion y DBS, mae elusen yn elusen plant os yw gweithwyr neu wirfoddolwyr yr elusen yn cynnwys y rhai sy’n gwneud gwaith sy’n dod o fewn y diffiniad cyfreithiol o weithgaredd a reoleiddir gyda phlant. Diffinnir gweithgaredd a reoleiddir gyda phlant yn Atodiad A y daflen hon.

Fodd bynnag, gall ymddiriedolwr elusen plant hefyd gyflawni rolau eraill ar gyfer yr elusen honno. Cyn iddynt gael eu penodi, (neu os bydd eu rôl yn newid) dylai sefydliadau asesu unrhyw gyfrifoldebau eraill yn ôl y meini prawf cymhwysedd i weld a yw’r gweithgareddau sy’n cael eu gwneud yn dod o dan y diffiniad o weithgaredd a reoleiddir gyda phlant. Byddai hyn yn caniatáu iddynt ofyn i’r ymddiriedolwr wneud cais am wiriad DBS Manylach yn y gweithlu plant gyda gwiriad Rhestr Gwahardd Plant. Os yw’r ymddiriedolwr hefyd mewn gweithgaredd a reoleiddir, dylai’r ddwy rôl gael eu gwneud yn glir yn y maes ‘swydd y gwneir cais amdani’.

5.2 Gweithwyr manwerthu elusennol

Gall unrhyw un sy’n gweithio ym maes manwerthu, e.e. siopau elusen, wneud cais am wiriad DBS Sylfaenol – p’un a ydynt yn gweithio gyda phlant ai peidio. Mae p’un a all sefydliadau wneud cais am wiriadau DBS Safonol neu Fanylach ar eu gweithwyr yn dibynnu ar bwy maen nhw’n gweithio gyda nhw, pa weithgareddau maen nhw’n eu gwneud ar eu rhan a pha mor aml maen nhw’n eu gwneud.  

Er mwyn i rywun sy’n gweithio ym maes manwerthu fod yn gymwys i wneud cais am wiriad DBS Safonol neu Fanylach, rhaid iddo fod yn ymgymryd â gweithgareddau sy’n bodloni’r meini prawf cymhwysedd ar gyfer y gwiriadau hynny. Mewn amgylchiadau penodol a ddisgrifir isod, mae oedran y plentyn yn effeithio ar gymhwysedd.

Lle mae gan rywun gyfrifoldeb penodol am:

• addysgu, hyfforddi, cyfarwyddo, gofalu am neu oruchwylio plentyn sydd o dan 16 oed mewn perthynas â’i gyflogaeth neu

• darparu cyngor neu arweiniad i blentyn o dan 16 oed ar ei les emosiynol, addysgol neu gorfforol mewn perthynas â’i gyflogaeth a

• maent yn gwneud hyn ar fwy na 3 diwrnod mewn unrhyw gyfnod o 30 diwrnod

gweithgaredd a reoleiddir yw hwn.

Lle mae gan rywun gyfrifoldeb penodol am:

• addysgu, hyfforddi, cyfarwyddo, gofalu am, neu oruchwylio plentyn sy’n 16 neu 17 oed mewn perthynas â’i gyflogaeth neu

• darparu cyngor neu arweiniad i blentyn sy’n 16 neu 17 oed ar ei les emosiynol, addysgol neu gorfforol mewn perthynas â’i gyflogaeth

nid yw hwn yn weithgaredd a reoleiddir

Mae rheolwr neu oruchwylydd arferol o ddydd i ddydd gweithiwr siop sydd mewn gweithgaredd a reoleiddir gyda phlant hefyd mewn gweithgaredd a reoleiddir gyda phlant. Mae hyn yn golygu y gellir gofyn i’r rheolwr neu’r goruchwyliwr wneud cais am wiriad DBS Manylach yn y gweithlu plant, gan gynnwys gwiriad Rhestr Gwahardd Plant.

Cyfeiriwch at ein [canllawiau] (http://www.gov.uk/government/collections/dbs-eligibility-guidance) ar gymhwysedd ar gyfer unigolion sy’n gweithio yn y Gweithlu Plant ar ein gwefan am ragor o wybodaeth.

5.3 Senario 1

Mae gweithiwr siop elusen yn gyfrifol am hyfforddi a goruchwylio bachgen 15 oed sy’n gwirfoddoli yn y siop 2 ddiwrnod yr wythnos fel rhan o leoliad gwobr Dug Caeredin. Mae hi mewn gweithgaredd a reoleiddir gyda phlant. Mae hyn yn golygu y gellir gofyn iddi wneud cais am wiriad DBS Manylach yn y gweithlu plant gyda gwiriad Rhestr Gwahardd Plant. Yn y sefyllfa hon, byddai goruchwyliwr y gweithiwr siop hefyd mewn gweithgaredd a reoleiddir a gellir gofyn iddo wneud cais am yr un lefel o wiriad DBS. 

Os mai dim ond un diwrnod y mis y mae’r gweithiwr siop elusen yn ei wneud, gellir dal i ofyn iddi wneud cais am wiriad DBS Manylach yn y gweithlu plant, ond byddai hyn heb wiriad y Rhestr Gwahardd Plant.

Nid yw pobl eraill sy’n gweithio yn y siop ochr yn ochr â’r plentyn 15 oed yn gymwys i gael gwiriad Safonol neu Fanylach gan y Gwasanaeth Datgelu a Gwahardd. Gallant wneud cais am wiriad DBS Sylfaenol.

5.4 Senario 2

Mae gweithiwr siop elusen yn gyfrifol am hyfforddi a goruchwylio person ifanc 17 oed 2 ddiwrnod yr wythnos. Mae’r gyfraith yn dweud nad yw’r gweithgareddau y mae’n eu gwneud yn weithgaredd a reoleiddir gyda phlant oherwydd bod yr unigolyn yn 17 oed ac mewn gwaith.

Nid yw hi’n gwneud unrhyw beth arall a fyddai’n ei gwneud yn gymwys i gael gwiriad Safonol neu Fanylach gan y Gwasanaeth Datgelu a Gwahardd. Mae hyn yn golygu y gellir gofyn iddi wneud cais am wiriad DBS Sylfaenol.

Digwyddiadau Codi Arian

Fel gweithgaredd ei hun, yn gyffredinol nid yw codi arian ar gyfer elusen yn gwneud unigolyn yn gymwys ar gyfer gwiriad Safonol neu Fanylach y Gwasanaeth Datgelu a Gwahardd oni bai bod y meini prawf yn adrannau 1, 2, 3, neu 4 o Atodiad A yn cael eu bodloni a bod rhywun arall yn gwneud penderfyniad addasrwydd ynghylch y codwr arian. Yn yr achos hwn, byddai codwyr arian mewn gweithgaredd a reoleiddir gyda phlant ac felly yn gymwys i gael gwiriad DBS Manylach yn y gweithlu plant gan gynnwys gwiriad Rhestr Gwahardd Plant. Pe byddent yn bodloni’r meini prawf perthnasol yn adrannau 2, 3 neu 4 ond eu bod yn cyflawni’r rôl yn llai aml, ni fyddent mewn gweithgaredd a reoleiddir, ond byddent yn dal yn gymwys i gael gwiriad Manylach y Gwasanaeth Datgelu a Gwahardd, ond heb wiriad Rhestr Gwahardd Plant.

Gallai rhywun sy’n trefnu digwyddiad, e.e. taith gerdded noddedig neu rediad 5k lle mai dim ond plant sy’n cymryd rhan, fod yn wirfoddolwr neu’n gyflogai i’r elusen, felly gallai fod yn gymwys i’r elusen ofyn am wiriad DBS os yw’n cyflawni’r gweithgareddau a grybwyllir yn Senario Un. Os nad yw’n cyflawni’r gweithgareddau hyn, gall yr elusen ofyn i’r unigolyn wneud cais am wiriad DBS Sylfaenol.

Fel cyfranogwr yn y math hwn o ddigwyddiad, ni fydd unigolyn yn gwirfoddoli i’r elusen nac yn cael ei gyflogi ganddi, felly ni all yr elusen ofyn am wiriadau Safonol neu Fanylach gan y DBS ar yr unigolion hyn.

6. Rolau mewn Ysgolion

6.1 Gwirfoddoli mewn ysgolion

Gall y rhai sy’n gwirfoddoli mewn ysgolion fod yn gymwys i gael gwiriad Safonol neu Fanylach gan y Gwasanaeth Datgelu a Gwahardd, yn dibynnu ar y gweithgareddau y maent yn eu cyflawni ac a ydynt yn cael eu goruchwylio gan rywun sydd mewn gweithgaredd a reoleiddir.

Os yw’r unigolion sy’n gwirfoddoli mewn ysgolion yn cyflawni unrhyw un o’r gweithgareddau yn rhannau 1 i 4 yn y diffiniad yn Atodiad A, maent mewn gweithgaredd a reoleiddir gyda phlant a gall yr elusen neu’r ysgol ofyn am wiriad DBS Manylach yn y gweithlu plant gyda gwiriad Rhestr Gwahardd Plant.

Os ydynt yn bodloni’r meini prawf yn rhan 4, ond eu bod yn cael eu goruchwylio gan rywun arall sydd mewn gweithgaredd a reoleiddir gyda phlant, yna nid ydynt mewn gweithgaredd a reoleiddir eu hunain. Fodd bynnag, maent yn dal yn gymwys i gael gwiriad DBS Manylach yn y gweithlu plant, ond heb wiriad Rhestr Gwahardd Plant.

6.2 Gweithwyr cyflogedig mewn ysgolion

Gellir gofyn i aelodau corff llywodraethu’r ysgol, gan gynnwys y clerc, wneud cais am wiriad DBS Manylach yn y gweithlu plant heb wiriad o’r Rhestr Gwahardd Plant.

Bydd y rhai sy’n addysgu, hyfforddi, cyfarwyddo, gofalu am, goruchwylio, darparu cyngor neu arweiniad i blant, mewn gweithgaredd a reoleiddir os ydynt yn cyflawni’r gweithgareddau hyn am fwy na 3 diwrnod mewn unrhyw gyfnod o 30 diwrnod. Mae hyn yn golygu y gellir gofyn iddynt wneud cais am wiriad DBS Manylach yn y gweithlu plant gyda gwiriad o’r Rhestr Gwahardd Plant. Os ydynt yn cyflawni’r gweithgareddau’n llai aml, gallant wneud cais am wiriad DBS Manylach heb wirio’r Rhestr Gwahardd Plant.

Gellir gofyn hefyd i bobl eraill mewn ysgolion nad ydynt yn cyflawni’r gweithgareddau uchod, e.e. glanhawyr a staff gweinyddol wneud cais am wiriad Manylach y Gwasanaeth Datgelu a Gwahardd gyda gwiriad o’r Rhestr Gwahardd Plant os ydynt yn bodloni’r meini prawf yn rhan 4 o Atodiad A.

7. Elusennau sy’n darparu gofal i blant

Mae unrhyw un sy’n darparu gofal personol neu ofal iechyd gan, neu o dan gyfarwyddyd neu oruchwyliaeth gweithiwr gofal iechyd proffesiynol mewn gweithgaredd a reoleiddir gyda phlant ni waeth pa mor aml y maent yn gwneud hyn. Gellir gofyn iddynt wneud cais am wiriad DBS Manylach yn y gweithlu plant gyda gwiriad o’r Rhestr Gwahardd Plant.

Gellir gofyn i’r rhai sy’n darparu unrhyw fath o driniaeth neu therapi i blant nad yw’n ofal personol neu’n ofal iechyd, er enghraifft, therapïau cyflenwol megis aciwbigo, hypnosis, tylino, wneud cais am wiriad DBS Manylach yn y gweithlu plant heb wiriad o’r Rhestr Gwahardd Plant os ydynt yn gwneud y gwaith hwn gyda phlant am fwy na 3 diwrnod mewn unrhyw gyfnod o 30 diwrnod. 

8. Rolau cwnsela a mentora

Bydd unrhyw rôl, boed yn gyflogedig neu’n ddi-dâl, sy’n cynnwys darparu cwnsela neu fentora i blant sy’n ymwneud â’u llesiant corfforol, emosiynol neu addysgol, mewn gweithgaredd a reoleiddir os caiff ei chyflawni’n ddigon aml, h.y. ar fwy na 3 diwrnod mewn unrhyw gyfnod o 30 diwrnod, neu unwaith ar unrhyw adeg rhwng 2am a 6am (gyda chyfle i ddod i gysylltiad wyneb yn wyneb â phlant). Mae hyn yn rhoi cymhwysedd ar gyfer gwiriad DBS Manylach yn y gweithlu plant gyda gwiriad Rhestr Gwahardd Plant. Eto, byddai unrhyw un sy’n rheoli neu’n goruchwylio cwnselydd yn rheolaidd o ddydd i ddydd hefyd mewn gweithgaredd a reoleiddir ac yn gymwys i gael yr un lefel o wiriad DBS.

Os yw’r cwnsela neu’r mentora’n cael ei ddarparu’n llai aml, ni fydd y cwnselydd mewn gweithgaredd a reoleiddir ond gellir gofyn iddo wneud cais am wiriad DBS Manylach yn y gweithlu plant, ond heb wiriad Rhestr Gwahardd Plant. Nid yw hyn yn ymestyn i unrhyw un sy’n rheoli neu’n goruchwylio’r cwnselydd yn y senario hwn.

9. Swyddi  ffydd

Fel gyda bron pob swydd elusen, nid yw rolau ffydd yn cael eu henwi mewn deddfwriaeth ac felly nid ydynt yn gymwys yn awtomatig i gael gwiriad Safonol neu Fanylach gan y Gwasanaeth Datgelu a Gwahardd.

Dylai’r rhai sy’n gwneud penderfyniadau addasrwydd ystyried y gweithgareddau y mae’r bobl sy’n gweithio neu’n gwirfoddoli i sefydliadau ffydd yn eu cyflawni, ar gyfer pwy y maent yn eu cyflawni, ymhle y cânt eu cynnal a pha mor aml, er mwyn pennu cymhwysedd.

Bydd canllawiau ar ein gwefan, gan gynnwys ein hofferyn cymhwysedd electronig a chanllawiau gweithlu, yn eich helpu i benderfynu a yw rôl yn gymwys, ac os felly, pa lefel o wiriad DBS sy’n addas.

9.1 Senario 3

Gellir gofyn i weithwyr neu wirfoddolwyr sy’n gweithio’n uniongyrchol i feithrinfa mewn neuadd eglwys, h.y. gofalu am neu oruchwylio plant am fwy na 3 diwrnod mewn unrhyw gyfnod o 30 diwrnod, wneud cais am wiriad DBS Manylach yn y gweithlu plant gyda gwiriad o’r Rhestr Gwahardd Plant. Mae hyn yn unol â threfn gofrestru’r Swyddfa Safonau Addysg (Ofsted).

Ni ellir gofyn i bobl eraill sy’n gweithio neu’n gwirfoddoli ar dir yr eglwys tra bod y feithrinfa ar agor, ond nad ydynt yno i weithio i’r feithrinfa, wneud cais am wiriad Safonol neu Fanylach gan y Gwasanaeth Datgelu a Gwahardd oherwydd eu bod yno ar yr un pryd â’r plant, ond gall yr eglwys ofyn iddynt wneud cais am wiriad DBS Sylfaenol os ydynt yn teimlo bod hyn yn angenrheidiol.  

Mae hyn hefyd yn berthnasol i gyfleusterau gofal plant a leolir o fewn safleoedd eraill, e.e. meithrinfeydd mewn swyddfa neu gampfa.

9.2 Senario 4

Hyd yn oed os yw côr yn cynnwys plant ac oedolion, os yw arweinydd y côr yn bodloni’r meini prawf yn rhan 2 neu ran 4 o Atodiad A, oherwydd bod disgwyl i blant fynychu, maent mewn gweithgaredd a reoleiddir gyda phlant.

Mae hyn yn golygu y gall yr eglwys wneud cais am wiriad DBS Manylach yn y gweithlu plant gyda gwiriad Rhestr Gwahardd Plant. Ni ddylent ofyn am wiriad DBS yn y gweithlu oedolion oni bai bod y meini prawf perthnasol a nodir yn y daflen Gweithio gydag Oedolion yn y Sector Elusennol yn cael eu bodloni.

9.3 Senario 5

Gall elusennau sy’n darparu addysg mewn lleoliadau crefyddol ofyn i’r rhai sy’n gyfrifol am addysgu, hyfforddi, cyfarwyddo, gofalu am, goruchwylio, neu ddarparu cyngor neu arweiniad i blant i wneud cais am wiriad Manylach gan y DBS.

Os ydynt yn darparu’r gweithgareddau hyn am fwy na 3 diwrnod mewn unrhyw gyfnod o 30 diwrnod, neu unwaith ar unrhyw adeg rhwng 2am a 6am (gyda’r cyfle i ddod i gysylltiad wyneb yn wyneb â phlant), maent mewn gweithgaredd a reoleiddir a gallant hefyd gofyn am wiriad o’r Rhestr Gwahardd Plant.

10. Gyrru ar gyfer elusen neu fel gwirfoddolwr

Dim ond mewn amgylchiadau penodol iawn y mae gyrwyr yn gymwys ar gyfer gwiriadau Safonol neu Fanylach y Gwasanaeth Datgelu a Gwahardd. Nid yw p’un a yw’r gwaith yn gyflogedig neu’n ddi-dâl yn newid pa lefel o wiriad DBS sydd ar gael. Ym mhob achos, rhaid gyrru fel rhan o drefniant trydydd parti ffurfiol, er enghraifft, gwasanaeth bws ysgol, ac nid trefniant personol rhwng ffrindiau neu gymdogion.

Mae gyrwyr yn cyflawni gweithgaredd a reoleiddir gyda phlant os ydynt yn gyrru cerbyd a ddefnyddir ar gyfer cludo plant yn unig, gan gynnwys eu gofalwyr neu oruchwylwyr, ac yn gwneud hyn am fwy na 3 diwrnod mewn unrhyw gyfnod o 30 diwrnod. Os yw’r gyrrwr yn bodloni’r meini prawf hyn, gellir gofyn iddo wneud cais am wiriad DBS Manylach yn y gweithlu plant gyda gwiriad Rhestr Gwahardd Plant.

Os ydynt yn gyrru cerbyd sy’n cael ei ddefnyddio ar gyfer cludo plant yn unig, gan gynnwys eu gofalwyr neu oruchwylwyr ond yn llai aml, nid ydynt mewn gweithgaredd a reoleiddir, ond maent yn dal yn gymwys i gael gwiriad DBS Manylach yn y gweithlu plant, heb wiriad Rhestr Gwahardd Plant.

11. Gweithwyr llinell gymorth ffôn

Gall ymdrinwyr galwadau llinell gymorth fod yn gymwys i gael gwiriad DBS Safonol neu Fanylach yn dibynnu a ydynt yn darparu cyngor neu arweiniad fel rhan o’u rôl, i bwy y maent yn ei ddarparu, a pha mor aml y maent yn ei ddarparu. Nid yw p’un a yw’r rôl yn un cyflogedig neu ddi-dâl yn effeithio ar ba lefel o wiriad DBS y gellir gofyn iddynt wneud cais amdano.

11.1 Senario 6

Mae llinell gymorth elusen yn cael ei sefydlu yn gyfan gwbl neu’n bennaf ar gyfer plant ac mae’n rhoi cyngor i blant ar eu lles emosiynol, corfforol ac addysgol. Os yw’r ymdrinwyr galwadau llinell gymorth yn rhoi’r cyngor a’r arweiniad hwn am fwy na 3 diwrnod mewn unrhyw gyfnod o 30 diwrnod, yna mae hwn yn weithgaredd a reoleiddir gyda phlant. Gall yr elusen wneud cais am wiriad DBS Manylach yn y gweithlu plant gyda gwiriad Rhestr Gwahardd Plant ar gyfer unrhyw un sy’n delio â galwadau llinell gymorth sy’n gwneud y gwaith hwn.

Os yw ymdriniwr galwadau’r llinell gymorth yn rhoi cyngor ac arweiniad i blant yn llai aml, maent yn dal yn gymwys i gael gwiriad DBS Manylach, ond mae hyn heb wiriad Rhestr Gwahardd Plant.

Gall llinellau cymorth a sefydlir i unrhyw aelod o’r cyhoedd eu cyrchu, h.y. nad ydynt wedi’u hanelu’n benodol at blant, ofyn i’w gweithwyr neu wirfoddolwyr wneud cais am wiriad DBS Sylfaenol yn unig.

11.2 Cymedroli ystafell sgwrsio rhyngrwyd

Gellir gofyn i gymedrolwyr ystafelloedd sgwrsio a sefydlwyd i’w defnyddio’n bennaf gan blant wneud cais am wiriad DBS Manylach yn y gweithlu plant gyda gwiriad Rhestr Gwahardd Plant os ydynt yn ei wneud at ddiben amddiffyn y plant ac os ydynt yn gwneud hyn yn ddigon aml. Rhaid i’r cymedrolwyr hyn wneud un neu fwy o’r canlynol:

• bod yn monitro cynnwys y gwasanaeth

• gallu dileu neu atal ychwanegu cynnwys at y gwasanaeth

• rheoli mynediad i’r gwasanaeth

Rhaid i gymedrolwyr hefyd:

• cael mynediad i gynnwys y gwasanaeth

• dod i gysylltiad â’r plant sy’n defnyddio’r gwasanaeth, boed hynny ar-lein neu wyneb yn wyneb

• gwneud hyn ar fwy na 3 diwrnod mewn unrhyw gyfnod o 30 diwrnod

Os nad ydynt yn gwneud hyn yn ddigon aml ond yn bodloni’r holl amodau eraill, gellir dal i ofyn iddynt wneud cais am wiriad Manylach DBSyn y gweithlu plant, ond heb wiriad y Rhestr Gwahardd Plant.

Nid oes unrhyw gymhwysedd i ofyn i bobl sy’n adeiladu’r ystafelloedd sgwrsio neu’r gwefannau wneud cais am wiriad Safonol neu Fanylach gan y DBS. Gellir gofyn i bobl yn y rolau hyn wneud cais am wiriad DBS Sylfaenol.

12. Elusennau maethu a mabwysiadu

Mabwysiadu – nid yw mabwysiadu plentyn yn weithgaredd a reoleiddir, ond gall y rhai sy’n trefnu’r mabwysiadu ofyn i ddarpar rieni mabwysiadol ac unrhyw aelodau o’r cartref sy’n 18 oed a hŷn wneud cais am wiriad DBS Manylach yn y gweithlu plant gyda gwiriad Rhestr Gwahardd Plant.

Gofalwr maeth – gellir gofyn i ofalwyr maeth wneud cais am wiriad DBS Manylach yn y gweithlu plant gyda gwiriad Rhestr Gwahardd Plant. Mae hyn oherwydd bod gofal maeth wedi’i enwi yn Neddf Diogelu Grwpiau Hyglwyf (SVGA) 2006 fel gweithgaredd a reoleiddir gyda phlant. Mae’r gofalwr maeth yn cael ei dalu ac felly nid oes ganddo hawl i gael gwiriad am ddim.

Aelodau aelwyd sy’n maethu– gan eu bod yn byw gyda rhywun sy’n cyflawni gweithgaredd a reoleiddir yn eu cartref, mae aelodau’r cartref sy’n 18 oed a hŷn yn gymwys i gael cais i wneud cais am wiriad DBS Manylach yn y gweithlu plant gyda gwiriad Rhestr Gwahardd Plant. Fodd bynnag, nid yw aelodau aelwydydd mewn gweithgaredd a reoleiddir. Oherwydd bod y gofalwr maeth yn cael ei dalu, ni fydd y cais hwn yn rhad ac am ddim. Mewn amgylchiadau maethu preifat, gellir gofyn am wiriad DBS ar gyfer aelodau o’r cartref sy’n 16 oed a hŷn.

Gofalwyr seibiant a rolau cymorth wrth gefn – os cânt eu henwi a’u hasesu fel rhan o’r trefniant cofrestru maethu cyffredinol a’u bod yn bodloni gofynion gweithgaredd a reoleiddir (gweler Atodiad A), gellir gofyn i ofalwyr seibiant a’r rheini mewn rolau cymorth wrth gefn wneud cais am Wiriad Manylach DBS yn y gweithlu plant gyda gwiriad Rhestr Gwahardd Plant. Oherwydd bod y gofalwr maeth yn cael ei dalu, nid yw’r ceisiadau hyn yn rhad ac am ddim. Mae hyn ni waeth a yw’r ymgeiswyr yn cael eu talu i ddarparu’r seibiant neu rolau ategol.

Os nad yw’r rolau hyn yn cael eu henwi a’u hasesu fel rhan o’r cofrestriad maethu a’u bod yn drefniant personol yn unig gyda’r rhieni maeth, yna nid oes cymhwysedd ar gyfer gwiriad Safonol neu Fanylach y DBS.

Staff gwasanaeth neu asiantaeth maethu neu fabwysiadu - gellir gofyn i’r rhai sy’n gweithio ym maes maethu neu fabwysiadu sydd â chyswllt â’r plant neu fynediad at wybodaeth sensitif neu bersonol am blant i wneud cais am wiriad DBS Safonol.

Aelodau panel maethu neu fabwysiadu – gellir gofyn i aelodau panel maethu neu fabwysiadu wneud cais am wiriad DBS Manylach yn y gweithlu plant heb wiriad o’r Rhestr Gwahardd Plant. 

13. Elusennau a sefydliadau cymorth sy’n gweithio dramor

Os yw rhywun yn gyflogedig neu’n gwirfoddoli i weithio dramor i elusen, efallai y bydd yn gymwys i gael gwiriad DBS os yw’r penderfyniad addasrwydd yn cael ei wneud yng Nghymru neu Loegr.

Gellir gofyn am wiriad DBS Sylfaenol ar gyfer unrhyw waith cymorth tramor a gall rhai rolau fod yn gymwys ar gyfer lefel gwahanol o wiriad.

Os yw unigolyn yn byw ar hyn o bryd, neu wedi byw yn y gorffennol, y tu allan i’r DU, mae’n bosibl na fydd gwiriad DBS yn rhoi darlun cyflawn o’u cofnod troseddol oherwydd na all DBS gael mynediad at gofnodion troseddol a gedwir dramor.

Gelwir gwiriadau cofnodion troseddol tramor yn ‘Dystysgrifau o Gymeriad Da’. Mae’r broses ar gyfer cael y gwiriadau hyn yn amrywio o wlad i wlad a bydd yn rhaid i chi wneud cais yn y wlad ei hun neu i’r Llysgenhadaeth berthnasol yn y DU. I gael rhagor o wybodaeth am sut i gael gwiriad cofnodion troseddol dramor, cyfeiriwch at: Gwiriadau cofnodion troseddol ar gyfer ymgeiswyr tramor.

Os yw sefydliad yn gofyn am dystysgrif cymeriad da ar gyfer unigolyn o’r DU, cyfeirir at hyn fel tystysgrif heddlu a gellir ei chael trwy ACRO.

13.1 Senario 7

Mae sefydliad yn recriwtio meddygon i ddarparu gofal iechyd i blant yn Sambia. Bydd y penderfyniad addasrwydd yn cael ei wneud yn Llundain. Os ydynt yn recriwtio unigolion o Gymru, Lloegr, Ynysoedd y Sianel neu Ynys Manaw, gallant ofyn iddynt wneud cais am wiriad DBS Manylach yn y gweithlu plant gyda gwiriad Rhestr Gwahardd Plant. Mae hyn oherwydd bod darparu gofal iechyd fel gweithiwr gofal iechyd proffesiynol a reoleiddir yn weithgaredd a reoleiddir. Os yw’r penderfyniad yn cael ei wneud dramor, gellir gofyn am ICPC yn lle gwiriad DBS. Os yw’r unigolyn wedi byw neu weithio mewn gwledydd eraill o’r blaen, gellid hefyd ofyn am dystysgrif ymddygiad da gan y gwledydd perthnasol hynny.

13.2 Senario 8

Mae’r un sefydliad hefyd yn recriwtio meddygon yn Zambia i ddarparu gofal iechyd i blant. Mae’r penderfyniad addasrwydd yn dal i gael ei wneud yn Llundain felly gall y sefydliad ofyn iddynt wneud cais am wiriad DBS Manylach yn y gweithlu plant gyda gwiriad Rhestr Gwahardd Plant. Mae hyn oherwydd bod darparu gofal iechyd fel gweithiwr gofal iechyd proffesiynol a reoleiddir yn weithgaredd a reoleiddir. Os nad yw’r unigolyn yn Sambia erioed wedi ymweld â’r DU, mae gwiriad DBS yn annhebygol o roi darlun cywir o’i gofnod troseddol. Y mae felly yn ddoeth gofyn am dystysgrif cymeriad da o’u mamwlad. 

13.3 Senario 9 

Mae mudiad yn Lloegr yn recriwtio gwirfoddolwyr i helpu i adeiladu canolfan gymunedol yn Belize. Os yw’r penderfyniad addasrwydd yn cael ei wneud yng Nghymru, Lloegr, Ynysoedd y Sianel neu Ynys Manaw gellir gofyn iddynt gael gwiriad DBS Sylfaenol gan nad yw’r gwaith y byddant yn ei wneud yn caniatáu ar gyfer gwiriad DBS Safonol neu Fanylach. Os yw’r penderfyniad addasrwydd yn cael ei wneud yn Belize, yna gallant ofyn am dystysgrif heddlu trwy

ACRO os yw’r unigolyn yn dod o’r DU neu dystysgrif cymeriad da o’u mamwlad.

14. ATODIAD A – Diffiniad o weithgaredd a reoleiddir gyda phlant

Mae gweithgaredd a reoleiddir yn rhywbeth na ddylai person sydd wedi’i wahardd ei wneud. Os yw rhywun wedi’i gynnwys ar y Rhestr Gwahardd Plant, ni ddylent wneud cais i weithio mewn rôl sy’n cynnwys gweithgaredd a reoleiddir gyda phlant.

Os yw rhywun sy’n gwybod ei fod wedi’i wahardd o weithgaredd a reoleiddir gyda phlant yn gwneud cais am waith sy’n bodloni’r diffiniad o weithgaredd a reoleiddir isod, mae’n cyflawni trosedd; fel y mae unrhyw un sy’n caniatáu iddynt weithio mewn rôl sy’n cynnwys gweithgaredd a reoleiddir gan wybod eu bod wedi’u gwahardd. Gallai’r ddau fod yn agored i hyd at 5 mlynedd o garchar a/neu ddirwy.

Gelwir sefydliad sydd ag unrhyw nifer o rolau sy’n bodloni’r diffiniad o weithgaredd a reoleiddir yn ‘ddarparwr gweithgaredd a reoleiddir’. Mae gan y sefydliadau hyn ddyletswydd gyfreithiol i wneud atgyfeiriadau i’r DBS pan ydynt yn credu bod person wedi achosi niwed neu’n peri risg o niwed yn y dyfodol i grwpiau agored i niwed, gan gynnwys plant. Rhaid iddynt hefyd ddarparu gwybodaeth i’r DBS pan ofynnir iddynt wneud hynny gennym a gallent gael dirwy oni bai bod ganddynt esgus rhesymol dros beidio â darparu’r wybodaeth.

Gall gweithgaredd a reoleiddir ddisgyn i un o 4 rhan isod:

14.1 Rhan 1

Dim ond unwaith y mae angen gwneud y gweithgareddau canlynol i fod yn weithgaredd a reoleiddir gyda phlant:

• darparu gofal personol – sef:

• cymorth corfforol gyda, neu annog ac yna goruchwylio plentyn mewn cysylltiad â bwyta neu yfed oherwydd bod y plentyn ei angen oherwydd ei salwch neu anabledd neu

 - darparu unrhyw fath o hyfforddiant, cyfarwyddyd, neu arweiniad i blentyn mewn perthynas â bwyta neu yfed oherwydd bod ei angen ar y plentyn oherwydd ei salwch neu anabledd neu

• cymorth corfforol gyda, neu annog ac yna goruchwylio plentyn mewn cysylltiad â mynd i’r toiled, ymolchi neu wisgo oherwydd bod y plentyn ei angen oherwydd ei oedran, salwch, neu anabledd neu

• darparu unrhyw fath o hyfforddiant, cyfarwyddyd, neu arweiniad i blentyn mewn perthynas â mynd i’r toiled, ymolchi neu wisgo oherwydd bod ei angen ar y plentyn oherwydd ei oedran, salwch neu anabledd

• darparu gofal iechyd gan, neu o dan gyfarwyddyd neu oruchwyliaeth gweithiwr gofal iechyd proffesiynol a reoleiddir.

14.2 Rhan 2

Mae angen cyflawni’r gweithgareddau canlynol am fwy na 3 diwrnod mewn unrhyw gyfnod o 30 diwrnod, neu unwaith ar unrhyw adeg rhwng 2am a 6am (gyda’r cyfle i ddod i gysylltiad wyneb yn wyneb â phlant) i fod yn weithgaredd a reoleiddir gyda phlant:

• addysgu, hyfforddi, neu gyfarwyddo plant, oni bai ei fod yn atodol i addysgu, hyfforddi neu gyfarwyddo pobl nad ydynt yn blant. Os yw’r unigolyn sy’n gwneud y gweithgareddau hyn yn cael ei oruchwylio gan rywun arall sydd mewn gweithgaredd a reoleiddir gyda phlant, yna nid yw mewn gweithgaredd a reoleiddir ei hun felly mae dim ond yn gymwys i gael gwiriad DBS Manylach heb wiriad Rhestr Gwahardd Plant

• gofalu am blant neu eu goruchwylio, oni bai bod y gofal neu’r oruchwyliaeth yn atodol i ofalu am neu oruchwylio pobl nad ydynt yn blant

• darparu unrhyw fath o gyngor neu arweiniad yn gyfan gwbl neu’n bennaf i blant sy’n ymwneud â’u llesiant corfforol, emosiynol neu addysgol. Nid yw hyn yn cynnwys unrhyw un sy’n darparu cyngor cyfreithiol i blant

Nid oes angen i unigolion fod mewn cysylltiad â’r un plant dros y cyfnod hwn - gall fod gydag unrhyw nifer o wahanol grwpiau neu unigolion.

14.3 Rhan 3

Mae angen cyflawni’r gweithgareddau canlynol ar fwy na 3 diwrnod mewn unrhyw gyfnod o 30 diwrnod i fod yn weithgaredd a reoleiddir gyda phlant:

• cymedroli ystafell sgwrsio rhyngrwyd sy’n debygol o gael ei defnyddio’n gyfan gwbl neu’n bennaf gan blant

• gyrru cerbyd yn benodol ar gyfer plant, gan gynnwys unrhyw un sy’n goruchwylio neu’n gofalu am y plant, fel rhan o drefniant trydydd parti ffurfiol.

Mae’r gweithgareddau canlynol hefyd yn weithgaredd a reoleiddir gyda phlant:

 - rheoli neu oruchwylio person sy’n cyflawni gweithgaredd a reoleiddir gyda phlant o ddydd i ddydd

• bod yn ofalwr maeth

14.4 Rhan 4

Os nad yw gweithwyr neu wirfoddolwyr elusen yn cyflawni unrhyw rai o’r gweithgareddau a esbonnir yn rhannau 1-3, gallent fod yn cyflawni gweithgaredd a reoleiddir gyda phlant o hyd os ydynt yn gwneud eu gwaith mewn sefydliadau penodol ac yn bodloni meini prawf penodol.

Y sefydliadau yw:

• sefydliad addysgol sydd yn gyfan gwbl neu’n bennaf ar gyfer darparu addysg amser llawn i blant

• uned atgyfeirio disgyblion

• academi darpariaeth amgen yn Lloegr yn unig

• darparwr addysg feithrin

• canolfan gadw i blant

• gwasanaeth llety diogel i blant yng Nghymru yn unig

• cartref plant neu gartref a ddarperir o dan Ddeddf Plant 1989

• cartref gofal sydd yn gyfan gwbl neu’n bennaf ar gyfer plant yng Nghymru yn unig

• canolfan blant (a reolir gan neu ar ran, neu o dan drefniadau a wnaed gydag, awdurdod lleol yn Lloegr, y trefnir bod gwasanaethau plentyndod cynnar ar gael drwyddi, a lle y darperir gweithgareddau i blant ifanc, drwy gyfrwng darpariaeth blynyddoedd cynnar neu fel arall )

• safleoedd gofal plant perthnasol

Os yw’r gweithwyr elusen yn gweithio yn unrhyw un o’r sefydliadau a restrir uchod, rhaid iddynt hefyd fodloni’r holl feini prawf isod: 

-maent yn gweithio yno am fwy na 3 diwrnod mewn unrhyw gyfnod o 30 diwrnod, neu unwaith dros nos rhwng 2am a 6am gyda chyfle i ddod i gysylltiad wyneb yn wyneb â’r plant a

• maent yn cael y cyfle, oherwydd eu swydd/rôl, i ddod i gysylltiad â’r plant yn y sefydliad a

• maent yn gweithio yno at ddiben y sefydliad a

• nid gwaith dros dro neu achlysurol ydyw ac

• os ydynt yn ddi-dâl, i fod yn weithgaredd a reoleiddir ni ddylai gael ei oruchwylio gan rywun arall sydd mewn gweithgaredd a reoleiddir. Os ydynt mewn rôl â thâl, gallant gael eu goruchwylio gan rywun arall a dal i fod mewn gweithgaredd a reoleiddir. Mae’r meini prawf hyn wedi’u hanelu at rolau ategol, e.e. staff gweinyddol, glanhawyr ac ati.

Gwaith gyda phlant – lle nad yw unigolyn mewn gweithgaredd a reoleiddir ond yn dal i fod mewn cysylltiad â phlant, gallant fod yn gymwys o hyd i gael gwiriad DBS Manylach heb wiriad Rhestr Gwahardd Plant. Disgrifir hyn fel gwaith gyda phlant. Mae hyn yn cynnwys sefyllfaoedd lle byddai’r unigolyn mewn gweithgaredd a reoleiddir ond nad yw’n gwneud y gweithgaredd yn ddigon aml. Gallwch gael rhagor o wybodaeth am hyn ar ein gwefan.

15. Dolenni a Chysylltiadau

Mae rhagor o wybodaeth ar gael ar wefan y DBS. Efallai y bydd y tudalennau canlynol yn ddefnyddiol i chi:

www.gov.uk/find-out-dbs-check (ein hofferyn cymhwysedd)

www.gov.uk/government/publications/dbs-workforce-guidance

Mae gwybodaeth am weithgareddau a reoleiddir gyda phlant hefyd ar gael gan yr Adran Addysg (DfE). www.gov.uk/government/publications/new-disclosure-and-barring-services

Mae gwybodaeth am weithgareddau a reoleiddir gydag oedolion hefyd ar gael gan yr Adran Iechyd a Gofal Cymdeithasol (DHSC)  

www.gov.uk/government/publications/new-disclosure-and-barring-services 

Mae cyflogwyr y GIG yn darparu ystod o ganllawiau sector-benodol ar eu gwefan ac mae ganddynt offeryn cymhwysedd ar gyfer rolau GIG

www.nhsemployers.org/case-studies-and-resources/2017/04/dbs-eligibility-toll 

Ymholiadau cyffredinol: customerservices@dbs.gov.uk 

Cysylltiadau corfforaethol: communications@dbs.gov.uk 

Ffôn: 0300 020 0190

Llinell Gymraeg: 0300 020 0191

Minicom: 0300 020 0192

Gwefan: www.gov.uk/dbs