Canllawiau

Telerau setlo tâl cuddiedig mis Tachwedd 2017

Diweddarwyd 13 August 2020

This canllawiau was withdrawn on 5 October 2020

Find the disguised remuneration settlement terms 2020.

Caiff y cyhoeddiad hwn ei dynnu’n ôl ar 1 Hydref 2020. Gwnaethom gyhoeddi fersiwn newydd ar 13 Awst 2020.

1. Trosolwg

Defnyddiwch y canllaw hwn i helpu eich cleientiaid i ddeall sut y caiff eu rhwymedigaethau eu cyfrifo os ydynt wedi defnyddio cynllun tâl cuddiedig.

Os ydych chi’n rhan o gynllun tâl cuddiedig, mae arweiniad ychwanegol ar setlo’ch materion treth.

Daeth y tâl ar fenthyciad tâl cuddiedig i rym ar 5 Ebrill 2019. Os gwnaethoch chi neu’ch cleient roi’r holl wybodaeth ofynnol i CThEM erbyn 5 Ebrill 2019, gallwch dal i setlo ei faterion treth o dan y telerau setlo hyn (telerau Tachwedd 2017), hyd yn oed os cytunir ar y setliad ar ôl 5 Ebrill 2019.

Os na wnaethoch chi neu’ch cleient roi’r wybodaeth ofynnol i CThEM erbyn 5 Ebrill 2019, neu os nad ydych yn setlo erbyn y dyddiad y mae CThEM yn ei roi yn y llythyr cynnig, ni fydd y telerau setlo hyn ar gael i’ch cleient. Er y bydd yn dal yn bosibl i’ch cleient setlo ei faterion y tu allan i delerau Tachwedd 2017, rhaid bodloni’r gofynion o ran rhoi gwybod am a thalu’r tâl ar fenthyciad.

Nid yw telerau Tachwedd 2017 ar gael i unrhyw un sy’n gwirfoddoli i setlo ar ôl 5 Ebrill 2019.

Mae’r canllaw hwn yn esbonio telerau setlo mis Tachwedd 2017 ar gyfer defnyddwyr cynlluniau tâl cuddiedig a roddodd yr holl wybodaeth ofynnol erbyn 5 Ebrill 2019, ac sydd yn y broses o setlo. Mae sut y gall eich cleient ddisgwyl setlo yn dibynnu ar y math o gynllun a ddefnyddiwyd ganddo ac a yw’n cael ei ystyried gan CThEM at ddibenion y telerau setlo hyn, fel:

• contractwr
• cyflogwr
• cyflogai

Os yw’ch cleient wedi defnyddio mwy nag un math o gynllun, bydd angen i chi edrych ar yr arweiniad ar gyfer pob math er mwyn pennu’r sefyllfa derfynol bosibl o ran setlo.

Mae CThEM yn cydnabod y gall trefniadau tâl cuddiedig fod yn eang ac amrywiol. Felly, mae’r canllaw hwn yn esbonio’r egwyddorion cyffredinol sy’n berthnasol i gynlluniau tâl cuddiedig, gan nad yw’n bosibl ymdrin â sut mae’n berthnasol ym mhob sefyllfa benodol.

Mae CThEM yn disgwyl y bydd gan y rhan fwyaf o bobl faterion treth syml, felly ni fydd yr holl arweiniad yn berthnasol i bawb. Os oes gennych unrhyw gwestiwn, cysylltwch â CThEM. Ffôn: 0300 200 1900 - ar gyfer defnyddwyr cynlluniau benthyciadau contractwyr. Ar gyfer holl ddefnyddwyr eraill y cynllun tâl cuddiedig, siaradwch â’ch cyswllt arferol yn CThEM neu e-bostiwch: gwasanaeth.cymraeg@hmrc.gov.uk.

Bydd pob setliad yn destun gweithdrefnau llywodraethu arferol sydd wedi’u teilwra yn ôl maint yr achos. Mae hyn er mwyn sicrhau cydymffurfiad â chyfrifoldebau CThEM o dan bwerau casglu a rheoli a’r Strategaeth Ymgyfreitha a Setlo.

Efallai na fydd y telerau setlo yn yr arweiniad hwn ar gael os yw apêl eich cleient wedi’i chyfeirio at dribiwnlys.

Os na wnaethoch chi neu’ch cleient roi’r holl wybodaeth ofynnol erbyn 5 Ebrill 2019, bydd y tâl ar fenthyciad ar fenthyciadau tâl cuddiedig sydd heb eu talu yn berthnasol, a bydd yn rhaid i’ch cleient roi gwybod am a thalu’r tâl ar fenthyciad.

Os rhoddwyd yr holl wybodaeth ofynnol erbyn 5 Ebrill 2019, a bod setliad wedi’i gytuno erbyn y dyddiad a bennir yn y llythyr cynnig, ni fydd angen i’ch cleient roi gwybod am na thalu’r tâl ar fenthyciad. Os na fodlonir y dyddiad hwn, ac os na fydd setliad yn cael ei gytuno, bydd yn rhaid i’ch cleient roi gwybod am a thalu’r tâl ar fenthyciad.

Nid yw talu’r tâl ar fenthyciad o reidrwydd yn setlo unrhyw rwymedigaethau cynharach a allai fod gan eich cleient. Os nad yw’ch cleient wedi setlo neu wedi rhoi’r holl wybodaeth ofynnol erbyn 5 Ebrill 2019, bydd yn rhaid iddo dalu (yn amodol ar unrhyw ryddhad trethiant dwbl:

• y tâl ar fenthyciad
• unrhyw rwymedigaeth gynharach
• unrhyw log sy’n ddyledus

2. Contractwyr

At ddibenion y telerau setlo hyn, mae contractwr yn rhywun sy’n darparu gwasanaethau i gleientiaid nad ydynt yn ymgysylltu â nhw yn uniongyrchol. Efallai eu bod yn darparu eu gwasanaethau drwy:

• cwmni ambarél
• asiantaeth
• partneriaeth
• eu cwmni eu hunain

Gellir ystyried contractwyr fel naill ai:

• yn gyflogedig - bydd ganddynt gontract cyflogaeth, yn aml yn darparu eu gwasanaethau trwy gyflogwr alltraeth

• yn hunangyflogedig - bydd ganddynt gontract ar gyfer gwasanaethau, sy’n golygu eu bod yn darparu eu gwasanaethau ar sail hunangyflogedig

Mae rheolau treth gwahanol yn berthnasol i wahanol fathau o ddefnydd o gynllun. Amlygir y prif wahaniaethau o ran y telerau setlo yn yr arweiniad hwn. Os nad ydych yn siŵr a yw’r cynllun y mae eich cleient wedi’i ddefnyddio yn golygu ei fod yn cael ei ystyried i fod yn gyflogedig neu’n hunangyflogedig, cysylltwch â CThEM.

2.1 Telerau setlo y contractwr

Bydd setliad ar sail net, bydd Treth Incwm yn gymwys i’r holl fenthyciadau tâl cuddiedig neu daliadau eraill a wneir er lles eich cleient, yn hytrach na’r swm gros a delir gan y cleient. Mae hyn yn golygu na fydd y ffioedd a ddidynnir o’r swm gros gan gyfryngwyr (treuliau’r cynllun), yn cael eu trethu fel rhan o’r incwm neu’r elw.

Mae Treth Incwm yn ddyledus ar gyfer y blynyddoedd

• pan dalwyd benthyciadau, neu pan wnaed taliadau eraill
• pan fo gan CThEM asesiad ar waith neu pan fo amser o hyd i wneud asesiad (y cyfeirir ato yn yr arweiniad hwn fel ‘blynyddoedd gwarchodedig’)

Cyfrifir y dreth ar y cyfraddau a’r haenau sy’n gymwys ym mlwyddyn y benthyciad neu’r taliad.

Er mwyn atal taliadau tâl cuddiedig rhag codi yn y dyfodol ar fenthyciadau neu daliadau a wneir o’r arian a delir i’r cynllun tâl cuddiedig yn ystod blynyddoedd gwarchodedig, rhaid i gontractwyr wneud taliad gwirfoddol.

Cyfrifir y taliad gwirfoddol hwn (y cyfeirir ato fel iawndal gwirfoddol) ar y cyfraddau a’r haenau sy’n gymwys yn y flwyddyn y gwnaed y benthyciad neu’r taliad. Unwaith y bydd contractwr yn llunio cytundeb gyda CThEM i wneud iawndal gwirfoddol, gellir ei orfodi’n gyfreithiol.

Mae llog am dalu’n hwyr yn ddyledus ar gyfer blynyddoedd gwarchodedig. Ni fydd llog am dalu’n hwyr yn daladwy ar iawndal gwirfoddol.

Lle bo’n briodol, bydd, cosbau yn gymwys.

Efallai y bydd Treth Etifeddiant yn ddyledus hefyd, yn dibynnu ar natur y cynllun a’r symiau a roddir drwy’r cynllun.

2.2 Cyfraniadau Yswiriant Gwladol - contractwyr cyflogedig

Ni fydd yn rhaid i gontractwyr cyflogedig dalu cyfraniadau Yswiriant Gwladol yn bersonol, ond gall CThEM fynd ar ôl eu cyflogwr neu barti atebol arall.

2.3 Cyfraniadau Yswiriant Gwladol - contractwyr hunangyflogedig

Bydd angen i gontractwyr hunangyflogedig dalu cyfraniadau Yswiriant Gwladol Dosbarth 2 a Dosbarth 4, fel y bo’n briodol, ar yr holl fenthyciadau tâl cuddiedig neu daliadau eraill. Efallai y bydd angen iddynt wneud taliadau iawndal gwirfoddol.

Cyfrifir cyfraniadau Yswiriant Gwladol Dosbarth 2 a Dosbarth 4 gan ddefnyddio’r cyfraddau a’r haenau yn y blynyddoedd y gwnaed y benthyciadau.

2.4 Ffioedd y Llys Sirol

Os cyhoeddodd CThEM hawliad Llys Sirol i fynd ar drywydd rhwymedigaeth cyfraniadau Yswiriant Gwladol o ganlyniad i gontractwr yn defnyddio cynllun tâl cuddiedig, bydd angen cynnwys y ffi ar gyfer cyhoeddi’r hawliad hwnnw yn swm y setliad.

2.5 Benthyciadau a hawlir o dan ddeddfwriaeth buddiannau

Gall y swm sy’n cael ei setlo gael ei ostwng gan unrhyw Dreth Incwm y mae’r contractwr wedi’i thalu oherwydd iddo ddatgan buddiant ar sail cael benthyciad buddiannol. Mae’r gostyngiad hwn ar gael dim ond os yw’r flwyddyn dreth honno mewn pryd i gael ei diwygio neu i wneud hawliad am ryddhad gordaliad.

2.6 Setliadau blaenorol

Roedd rhai cynlluniau benthyciadau contractwyr yn seiliedig ar gyflogaeth yn gweithredu hyd at 5 Ebrill 2011. Os yw rhywun wedi setlo ei ddefnydd o’r cynlluniau hyn erbyn 16 Mawrth 2016, nid oes angen iddo dalu unrhyw Dreth Incwm neu gyfraniadau Yswiriant Gwladol pellach i gael rhyddhad rhag tâl tâl cuddiedig yn y dyfodol (gan gynnwys y tâl ar fenthyciad). Nid yw hyn yn berthnasol i unrhyw gynllun yr oedd wedi gofyn i CThEM ei eithrio o’r setliad.

Ar gyfer unrhyw setliad a ddechreuodd ar ôl 16 Mawrth 2016, neu unrhyw setliad ar gyfer cynllun a weithredir ar ôl 5 Ebrill 2011, bydd symiau’r rhyddhad rhag tâl tâl cuddiedig yn cael eu cyfyngu i’r rhai a bennir yn y cytundeb setlo.

3. Cyflogwyr

Mae cyflogwr, at ddibenion y telerau setlo hyn, yn rhywun sydd wedi ymrwymo i gynllun tâl cuddiedig i wobrwyo ei gyflogeion.

3.1 Telerau setlo y cyflogwr

Bydd angen i gyflogwr dalu Treth Incwm a chyfraniadau Yswiriant Gwladol Dosbarth 1 cynradd ac eilaidd ar y swm a gyfrannwyd i’r cynllun neu, yn dibynnu ar y ffeithiau, y swm a ddyrannwyd o fewn y cynllun. Bydd angen iddo dalu ar gyfer pob blwyddyn lle mae gan CThEM naill ai:

• dyfarniad TWE neu hawliad cyfraniadau Yswiriant Gwladol gwarchodol ar waith (fel sy’n briodol)
• amser i wneud penderfyniad o’r fath neu gyflwyno hawliad gwarchodol (blynyddoedd gwarchodedig)

Er mwyn atal taliadau tâl cuddiedig rhag codi yn y dyfodol ar gyfraniadau i, neu ddyraniadau a wnaed o fewn y cynllun yn ystod blynyddoedd nad ydynt wedi eu gwarchod, rhaid iddo wneud taliad gwirfoddol (iawndal gwirfoddol).

Y taliad hwn yw’r Dreth Incwm a chyfraniadau Yswiriant Gwladol sy’n ddyledus ar y cyfraniad i’r cynllun, neu’r dyraniad oddi fewn iddo, yn ystod y blynyddoedd hynny.

Ni fydd yn rhaid i gyflogwr dalu Treth Incwm a chyfraniadau Yswiriant Gwladol ar unrhyw gyfraniadau neu ddyraniadau:

• lle mae Treth Incwm a chyfraniadau Yswiriant Gwladol eisoes wedi’u talu
• mewn rhai amgylchiadau lle maent wedi cael eu defnyddio i dalu treuliau’r cynllun, er enghraifft, ffioedd ymddiriedolwyr

Os yw’r weithred ymddiriedolaeth yn caniatáu hynny, a bod y cyfraniadau Yswiriant Gwladol Dosbarth 1 eilaidd yn cael eu talu i CThEM o’r arian a gyfrannwyd i’r cynllun, bydd CThEM yn trin y cyfraniad i’r cynllun fel enillion ynghyd â chyfraniadau Yswiriant Gwladol Dosbarth 1 eilaidd ar yr enillion hynny. Bydd hyn yn lleihau swm yr enillion y mae Treth Incwm a chyfraniadau Yswiriant Gwladol yn daladwy arnynt.

Cyfrifir Treth Incwm a chyfraniadau Yswiriant Gwladol gan ddefnyddio’r cyfraddau a’r haenau yn ystod y blynyddoedd y cyfrannodd y cyflogwr i’r cynllun neu pan ddyrannwyd y symiau o fewn y cynllun, yn dibynnu ar y ffeithiau.

Bydd angen i gyflogwr dalu llog am dalu’n hwyr ar gyfer unrhyw flynyddoedd gwarchodedig. Mae hyn yn unol â’r llawlyfr Arweiniad Gweithredol o ran Cydymffurfiad COG908170 a COG915075. Ni fydd llog am dalu’n hwyr yn daladwy ar iawndal gwirfoddol.

Lle bo’n briodol, bydd cosbau yn gymwys.

Mewn rhai amgylchiadau, bydd angen talu Treth Etifeddiant. Bydd hyn yn dibynnu ar natur y cynllun a’r symiau a roddir drwyddo.

Gellir gostwng y swm sy’n ddyledus er mwyn setlo gan unrhyw gyfraniadau Yswiriant Gwladol a delir gan y cyflogwr, neu Dreth Incwm a delir gan ei gyflogeion, ar sail cael benthyciad buddiannol o’r cynllun a datgan buddiant. Mae’r gostyngiad hwn ar gael dim ond os bydd y flwyddyn dreth y datganwyd y buddiant ynddi mewn pryd i gael ei diwygio neu er mwyn hawlio gordaliad.

Bydd angen i gyflogeion lenwi gorchmynion hefyd, sy’n caniatáu i’w had-daliadau treth gael eu gosod yn erbyn rhwymedigaeth y cyflogwr. Bydd CThEM yn rhoi copi o’r gorchmynion i’r cyflogwr.

Os yw’r Ffurflen Dreth Gorfforaeth berthnasol ar agor neu’n gallu cael ei diwygio, bydd cyflogwyr yn gallu gwneud didyniad ar gyfer y cyfraniad gwreiddiol a’r ffi a dalwyd i’r hyrwyddwr am ymuno â’r cynllun.

Bydd cyflogwyr yn gallu hawlio didyniad at ddibenion Treth Gorfforaeth ar gyfer y Dreth Incwm a chyfraniadau Yswiriant Gwladol y maent yn eu talu o dan y cytundeb setlo. O dan y Llawlyfr Incwm Busnes BIM47090, bydd y didyniad hwn ar gael yn y flwyddyn y gwnaed y cyfraniad, os yw’r flwyddyn honno’n dal ar agor neu y gellir ei diwygio, neu yn y flwyddyn agored ddilynol gynharaf.

3.2 Caniatáu didyniadau at ddibenion Treth Gorfforaeth ar gyfer cyfraniadau gan gyflogwr i gynllun lle na hawliwyd didyniadau

Yn hanesyddol, mae rhai trefniadau tâl cuddiedig lle na hawliwyd didyniad Treth Gorfforaeth ar gyfer y cyfraniad i’r cynllun pan wnaed y cyfraniad. Mewn rhai achosion, nid oes ymchwiliad agored ar gyfer y flwyddyn berthnasol ac mae’r terfyn amser ar gyfer rhyddhad gordaliad wedi dod i ben. Erbyn hynny, felly, does dim ffordd statudol o hawlio rhyddhad ar gyfer y cyfraniad yn y flwyddyn y gwnaeth y cyflogwr y cyfraniad.

Mewn achosion o’r fath, os caiff cam perthnasol o dan Ran 7A o Ddeddf Treth Incwm (Enillion a Phensiynau) 2003 ei sbarduno yn y flwyddyn gyfredol, a bod y Dreth Incwm a chyfraniadau Yswiriant Gwladol sy’n ddyledus ar y cam perthnasol hwnnw yn cael eu talu, gall CThEM hefyd ganiatáu i’r cyflogwr wneud didyniad ar gyfer Treth Gorfforaeth yn y flwyddyn gyfredol ar gyfer y cyfraniad gwreiddiol cyfatebol.

3.3 Penderfyniadau Rheoliad 80

Mewn rhai achosion, mae CThEM wedi cyhoeddi penderfyniadau Rheoliad 80 (Rheoliadau Treth Incwm (TWE) 2003) i godi treth ar y gyfradd sylfaenol (BR) yn unig ar dâl cuddiedig. Gall hyn fod oherwydd nad oedd gan CThEM ddigon o wybodaeth i allu gwneud penderfyniad arall neu, mewn rhai achosion prin iawn, oherwydd bod cod treth BR wedi’i roi i gyflogai.

Er mwyn atal taliadau tâl cuddiedig rhag codi yn y dyfodol, gan gynnwys y tâl ar fenthyciad, mae angen talu treth BR ac unrhyw dreth gyfradd uwch. Ni fydd llog am dalu’n hwyr yn daladwy ar swm y dreth gyfradd uwch a dalwyd.

3.4 Adran 222 a 223 o Ddeddf Treth Incwm (Enillion a Phensiynau) 2003

Os yw defnyddio cynllun tâl cuddiedig neu setlo rhwymedigaethau o’r cynllun yn arwain at dâl Treth Incwm a chyfraniadau Yswiriant Gwladol oherwydd adran 222 neu 223 o’r Ddeddf hon, bydd angen setlo hyn hefyd. Ar gyfer y ddau, mae’r tâl treth yn codi ar y cyflogai, nid y cyflogwr.

Ar gyfer adran 222, mae angen bod yna ymchwiliad agored ar gyfer y flwyddyn gynharach berthnasol i’r cyflogai unigol ac, os yw’r flwyddyn ar agor, mae CThEM yn disgwyl i dreth adran 222 gael ei chyfrif yn y setliad. Gwneir hyn drwy ei chynnwys gan y cyflogwr neu drwy ddiwygio Ffurflen Dreth bersonol yr unigolyn. Os yw’r flwyddyn honno ar gau neu os na ellir ei diwygio, nid oes angen talu treth adran 222.

Ni fydd tâl adran 222 yn codi, os oes ymrwymiad y gellir ei orfodi’n gyfreithiol yn ei le ar ran yr ymddiriedolwr o fewn 90 diwrnod i’r dyraniad gael ei wneud, i ddigolledu’r cyflogwr am unrhyw dreth a chyfraniadau Yswiriant Gwladol sy’n ddyledus o ganlyniad i’r dyraniad. Mae hyn oherwydd bod CThEM yn derbyn bod hyn yn gwneud iawn at ddiben adran 222 (os yw’r ymddiriedolwr neu’r cyflogai yn cyfrif am y dreth a’r cyfraniadau Yswiriant Gwladol).

Mae adran 223 yn dâl blwyddyn gyfredol ar gyfer y cyfnod pan delir Treth Incwm gan y cyflogwr ac ni chaiff ei diddynnu oddi ar y cyflogai. O ganlyniad, ym mhob cytundeb setlo lle mae adran 223 yn gymwys, bydd CThEM mewn pryd i gasglu unrhyw dollau adran 223 sy’n ddyledus.

Pan fydd y cyflogwr yn setlo naill ai tâl adran 222 neu 223 ar ran y cyflogai, bydd hyn yn arwain at dâl Treth Incwm a chyfraniadau Yswiriant Gwladol pellach y bydd angen ei gynnwys hefyd yn swm y setliad.

3.5 Ffioedd y Llys Sirol

Os cyhoeddodd CThEM hawliad Llys Sirol i fynd ar drywydd y rhwymedigaeth cyfraniadau Yswiriant Gwladol o ganlyniad i gontractwr yn defnyddio cynllun tâl cuddiedig, bydd angen cynnwys y ffi ar gyfer cyhoeddi’r hawliad hwnnw yn swm y setliad.

3.6 Setliadau Blaenorol

Mae llawer o gyflogwyr wedi setlo eu rhwymedigaethau Treth Incwm a chyfraniadau Yswiriant Gwladol i gyd, neu ran ohonynt, sy’n deillio o’u defnydd o gynllun tâl cuddiedig fel rhan o Gyfle Setliad Ymddiriedolaeth Buddiannau’r Cyflogeion (EBTSO), a ddaeth i ben yn 2015. Setlodd llawer o rai eraill eu rhwymedigaethau i gyd, neu ran ohonynt, cyn 1 Ebrill 2017 i elwa ar y rhyddhad Rhan 7A ar y twf mewn buddsoddiadau y darperir ar ei gyfer ym Mharagraff 59 o Atodlen 2 i Ddeddf Cyllid 2011.

Ar yr amod bod telerau talu’r cytundebau hynny’n cael eu bodloni, ni fydd Treth Incwm na chyfraniadau Yswiriant Gwladol cyflogedig pellach i’w talu ar gyfer cyfraniadau, neu ddyraniadau, a gynhwysir yn y setliadau hynny. Bydd hyn yn golygu na fydd unrhyw dâl Rhan 7A, gan gynnwys tâl ar fenthyciad, yn berthnasol i fenthyciadau a wneir o’r cyfraniadau neu’r dyraniadau hynny.

Fodd bynnag, ar gyfer setliadau rhwymedigaethau Treth Incwm a chyfraniadau Yswiriant Gwladol cyflogedig a wnaed ers i’r EBTSO gau, bydd tâl Rhan 7A posibl ar unrhyw dwf ar y cyfraniadau Yswiriant Gwladol Dosbarth 1 eilaidd a ddelir yn y cynllun. Pan wnaed y setliadau hynny ar ôl 31 Mawrth 2017, bydd tâl tâl cuddiedig posibl ar unrhyw dwf a ddelir yn y cynllun.

Lle nad oedd ond setliad rhannol, gall y cyflogwr dal i setlo’r rhwymedigaethau sy’n weddill yn awr, ar yr amod bod y wybodaeth ofynnol wedi’i rhoi erbyn 5 Ebrill 2019.

Mae rhai cyflogwyr, gan gynnwys rhai defnyddwyr Cynlluniau Budd-daliadau Ymddeol a Ariannwyd gan Gyflogwyr, wedi setlo ar sail gwrthod y rhyddhad Treth Gorfforaeth, nad oedd yn cynnwys talu Treth Incwm neu gyfraniadau Yswiriant Gwladol. Mae’r cyflogwyr hyn hefyd yn dod o dan gwmpas Rhan 7A, gan gynnwys y tâl ar fenthyciad. Efallai y byddant yn gallu atal y tâl ar fenthyciad rhag bod yn daladwy os sbardunir tâl Rhan 7A.

4. Cyflogeion

At ddibenion y telerau setlo hyn, cyflogai yw rhywun sydd wedi cael ei dalu drwy gynllun tâl cuddiedig a wnaed gan ei gyflogwr, ac nid yw’n gontractwr. Os nad yw ei gyflogwr eisoes wedi setlo, ac nad yw’n dymuno setlo, gall y cyflogai setlo hebddo ond bydd angen iddo fod yn rhan o’r cytundeb. Ni all trydydd parti, er enghraifft yr ymddiriedolwr, setlo ar ran y cyflogai.

4.1 Telerau setlo y cyflogai

Bydd yn rhaid i’r cyflogai dalu’r un swm o Dreth Incwm a chyfraniadau Yswiriant Gwladol fel pe bai ei gyflogwr yn setlo ar y swm a gyfrannwyd i’r cynllun neu, yn dibynnu ar y ffeithiau, y swm a ddyrannwyd o fewn y cynllun er ei fudd. Os nad yw’r cyflogwr yn bodoli mwyach, ni fydd yn rhaid i’r cyflogai dalu unrhyw gyfraniadau Yswiriant Gwladol.

Bydd yn rhaid talu llog am dalu’n hwyr ar gyfer unrhyw flynyddoedd lle mae CThEM wedi anfon penderfyniad TWE neu hawliad am gyfraniadau Yswiriant Gwladol gwarchodol i’r cyflogwr, neu lle mae CThEM mewn pryd i wneud penderfyniad neu hawliad o’r fath. Mae hyn yn unol â’r Arweiniad Gweithredol o ran Cydymffurfiad COG908170 a COG915075. Ni chodir llog am dalu’n hwyr pan wneir iawndal gwirfoddol.

Lle bo’n briodol, bydd yn rhaid talu cosbau.

Gall Treth Etifeddiant fod yn ddyledus hefyd, yn dibynnu ar natur cynllun y cyflogwr a’r symiau a roddir drwy’r ymddiriedolaeth.

Gall cyflogeion ostwng swm y setliad gan unrhyw Dreth Incwm y maent wedi’i thalu oherwydd iddynt ddatgan buddiant ar sail cael benthyciad buddiannol. Mae’r gostyngiad hwn ond ar gael os yw’r flwyddyn dreth honno mewn pryd i gael ei diwygio neu i wneud hawliad am ryddhad gordaliad.

Ni all cyflogeion ostwng swm y setliad gan unrhyw ryddhad Treth Gorfforaeth neu ad-daliad cyfraniadau Yswiriant Gwladol Dosbarth 1A y gallai fod gan eu cyflogwr hawl iddynt o ganlyniad iddynt setlo eu rhwymedigaeth.

Mae yna hefyd wybodaeth am setliadau blaenorol.

5. Rhyddhad trethiant dwbl

Gall cynlluniau tâl cuddiedig arwain at fwy nag un rhwymedigaeth Treth Incwm a chyfraniadau Yswiriant Gwladol ar yr un incwm sylfaenol. Er enghraifft, gall rhwymedigaeth godi pan fydd y swm yn cael ei gyfrannu at y cynllun ac eto ar ddyddiad diweddarach pan fydd tâl Rhan 7A yn codi.

Mae Rhan 7A yn cynnwys darpariaethau rhyddhad cynhwysfawr i sicrhau nad oes trethiant dwbl ar yr un swm neu ased. Mae’r rhain yn gweithio drwy nodi rhwymedigaethau Treth Incwm sy’n deillio o’r un symiau sylfaenol o incwm neu symiau sy’n gorgyffwrdd. Mae pa bynnag rwymedigaeth Treth Incwm, ynghyd â llog am dalu’n hwyr, sy’n cael ei thalu gyntaf yn creu taliad ar gyfrif tybiannol (NPoA). Mae hyn yn rhyddhau’r rhwymedigaeth orgyffwrdd arall, gan gynnwys llog, hyd at swm yr NPoA.

Mae S23H ITTOIA 2005 yn cynnwys y darpariaethau i atal trethiant dwbl incwm hunangyflogedig.

6. Cosbau

Gall cosbau fod yn berthnasol pan fydd person wedi cyflwyno Ffurflen Dreth sy’n cynnwys anghywirdeb a hynny’n arwain at danddatganiad o rwymedigaeth treth neu gyfraniadau Yswiriant Gwladol (atodlen 24 o Ddeddf Cyllid 2007). Nid oes cosb yn daladwy os gwnaed yr anghywirdeb er i’r person gymryd gofal rhesymol.

Mae cosbau yn seiliedig ar swm ychwanegol y dreth a chyfraniadau Yswiriant Gwladol sy’n daladwy o ganlyniad i gywiro’r anghywirdeb ar y Ffurflen Dreth. Gall cynlluniau tâl cuddiedig arwain at ddefnyddwyr yn cyflwyno mwy nag un Ffurflen Dreth anghywir sy’n cynnwys tanddatganiad o dreth ar yr un incwm neu enillion.

Os oes mwy nag un Ffurflen Dreth anghywir a rhwymedigaeth treth yn ymwneud â’r un person ac enillion, a bod y rheolau rhyddhad trethiant dwbl cynhwysfawr yn Rhan 7A yn gymwys, bydd CThEM ond yn codi un gosb am anghywirdeb.

Bydd CThEM yn dilyn yr un dull os yw’r gosb yn daladwy o dan adran 98A (4) neu adran 95 o Ddeddf Rheoli Trethi 1970, lle mae trethdalwr wedi bod yn esgeulus neu’n dwyllodrus wrth gyflwyno Ffurflen Dreth y dylid ei chyflwyno cyn 1 Ebrill 2009.

7. Treth Etifeddiant

Mae llawer o gynlluniau tâl cuddiedig yn defnyddio ymddiriedolaeth fel y trydydd parti, ac felly gall taliadau Treth Etifeddiant godi.

Yn fras, gall tâl Treth Etifeddiant godi pan fo taliad, neu warediad, yn arwain at golli gwerth i ymddiriedolaeth. Mae hyn yn cynnwys taliadau neu ddosbarthiadau llwyr i fuddiolwyr, ac achlysuron pan nad yw eiddo wedi’i setlo bellach yn cael ei ddal mewn ymddiriedolaeth sy’n cydymffurfio ag adran 86 o Ddeddf Treth Etifeddiant 1984 (IHTA84).

Mae hefyd yn cynnwys lle mae benthyciad yn cael ei ryddhau ac mewn rhai amgylchiadau lle gwneir benthyciad, yn ogystal ag achlysuron eraill pan godir tâl lle gwneir taliadau a dosbarthiadau i gyfranogwyr a setlwyr.

Efallai y bydd taliadau Treth Etifeddiant yn cael rhyddhad os yw’r taliad gan yr ymddiriedolaeth sy’n arwain at y tâl hefyd yn cael ei drin fel incwm. Felly, os yw arian sy’n gadael yr ymddiriedolaeth neu’n symud i is-ymddiriedolaeth hefyd yn cael ei drin fel incwm ar yr un pryd, efallai y bydd rhyddhad yn erbyn y tâl Treth Etifeddiant yn ddyledus.

Fodd bynnag, bydd angen talu unrhyw dâl Treth Etifeddiant os nad yw arian sy’n gadael ymddiriedolaeth yn incwm ar yr un pryd. Er enghraifft, gall taliadau godi o dan adran 72 IHTA84 os caiff cyfraniad i ymddiriedolaeth ei drethu fel enillion ar yr adeg honno a bod eich cleient wedi trosglwyddo arian i is-ymddiriedolaeth fwy na 3 mis ar ôl y dyddiad hwnnw.

Nid oes unrhyw ryddhad o dan adran 70 (3) IHTA84 gan nad yw’r arian a drosglwyddwyd yn incwm, ar yr ail ddyddiad hwnnw, ac ni fydd yn dod yn incwm at ddibenion rhyddhad Treth Etifeddiant.

Gall taliadau pellach godi o dan adran 64 IHTA84 lle mae symiau wedi’u dal mewn strwythur ymddiriedolaeth sy’n cydymffurfio ag IHTA84 heb fod yn adran 86 am fwy na 10 mlynedd. Cyfrifir y dreth hon ar werth yr asedau a ddelir yn yr ymddiriedolaeth ar 10fed pen-blwydd y setliad. Bydd angen i’ch cleient gytuno ar werth yr asedau a’r dreth sy’n ddyledus gyda CThEM gan fod yn rhaid ei chynnwys mewn unrhyw swm setliad.

Os yw’ch cleient yn bwriadu diddymu ei strwythur yn syth ar ôl setlo gyda CThEM, mae CThEM yn hapus i gyfrifo taliadau ymadael Treth Etifeddiant. Bydd y rhain yn cael eu cyfrifo ar werth yr asedau sy’n gadael yr ymddiriedolaeth a bydd angen i CThEM gytuno ar y gwerth hwnnw os yw’ch cleient eisiau cynnwys y trethi o ddirwyn yr ymddiriedolaeth i ben fel rhan o swm y setliad.

Mewn rhai amgylchiadau, gall fod taliadau ‘mynediad’ Treth Etifeddiant ar gyfranogwyr cwmnïau caeedig pan fydd y cwmni’n trosglwyddo gwerth, fel arfer pan wneir taliad i ymddiriedolaeth.

Rhaid i rwymedigaethau Treth Etifeddiant sy’n dod yn ddyledus ar y dyddiad y bydd eich cleient yn setlo gyda CThEM gael eu talu fel rhan o swm y setliad.

8. Llog sydd wedi cronni

Mae llawer o gynlluniau tâl cuddiedig yn cynnwys benthyciad i’r cyflogai gan drydydd parti. Mae rhai o’r benthyciadau hyn yn dwyn llog ac yn ei gwneud yn ofynnol i’r sawl sy’n cael benthyg (y cyflogai) dalu llog i’r sawl sy’n rhoi benthyg, yr ymddiriedolwr. Yn aml, mae’r llog hwn heb ei dalu ac mae naill ai’n cronni neu’n cael ei ychwanegu at falans y benthyciad (wedi’i gyfalafu).

Pan fydd cynllun tâl cuddiedig yn cael ei gau, gall yr ymddiriedolwr ryddhau neu ddileu balans y benthyciad sy’n weddill. Bydd hyn yn arwain at dâl Rhan 7A ar y llog sydd wedi cronni ac sydd wedi’i gyfalafu, p’un a yw hyn wedi’i dalu ai peidio.

Fel rhan o’r telerau setlo hyn, bydd CThEM yn caniatáu rhyddhad yn erbyn y tâl Rhan 7A a fyddai fel arall yn codi mewn cysylltiad â llog sydd wedi cronni. Mae hyn ond yn berthnasol lle mae’r ymddiriedolaeth wedi cau, neu wedi ei diddymu, fel rhan o’r setliad.

Mae Treth Etifeddiant yn gymwys i gyfalaf yn yr ymddiriedolaeth, ond yn gyffredinol caiff ei dileu pan fydd tâl Treth Incwm yn codi ar yr un trafodiad. Mae rhai sefyllfaoedd lle gall yr ymddiriedolwyr ryddhau, neu ddileu dyled, gan arwain at Dreth Etifeddiant er bod tâl Treth Incwm yn ddyledus. Yn absenoldeb tâl Treth Incwm, mae Treth Etifeddiant yn ddyledus.

Fel rhan o’r telerau setlo hyn, ni thelir Treth Etifeddiant ar log sydd wedi cronni. Mae hyn yn berthnasol dim ond pan fydd yr ymddiriedolaeth wedi cau neu wedi ei diddymu fel rhan o’r setliad. Mae hyn yn amodol ar bob rhwymedigaeth Treth Etifeddiant arall sydd eisoes yn ddyledus, neu a fydd yn codi wrth gau’r ymddiriedolaeth neu ei diddymu, yn cael eu talu fel rhan o’r setliad.

Mae’r driniaeth hon o ran Rhan 7A a Threth Etifeddiant yn berthnasol i log ar fenthyciadau a wneir i gyflogeion neu gontractwyr. Gall hefyd fod yn berthnasol i log ar fenthyciadau a wneir i’r cwmni sy’n cyflogi, os na thalwyd y llog ac na ofynnwyd am ddidyniad treth ar gyfer y llog.

Pan fo arian a ychwanegir i ymddiriedolaeth wedi’i fuddsoddi mewn unrhyw ffordd arall, bydd unrhyw dwf mewn buddsoddiadau yn agored i dâl Rhan 7A a Threth Etifeddiant fel rhan o’r setliad, neu pan fydd yr arian yn cael ei ddosbarthu o’r ymddiriedolaeth.

9. Taliadau cyfalaf a buddiannau

Mae’r adran hon yn ymwneud â thaliadau cyfalaf a buddiannau a gafwyd gan fuddiolwyr lle mae incwm buddsoddi wedi codi o fewn yr ymddiriedolaeth.

Os yw’ch cleient yn cael taliad cyfalaf gan yr ymddiriedolaeth a bod incwm perthnasol heb ei baru, gall y taliad cyfalaf fod yn agored i Dreth Incwm o dan adran 731 o Ddeddf Treth Incwm 2007 i’r graddau y gellir ei baru â’r incwm perthnasol.

Ar gyfer y rhan fwyaf o drefniadau tâl cuddiedig, ni fydd unrhyw dwf cyfalaf yn agored i Dreth Enillion Cyfalaf. Fodd bynnag, lle gellir paru’r dosbarthiad cyfalaf yn erbyn incwm perthnasol sy’n codi o fewn y strwythur, efallai y bydd rhwymedigaeth Treth Incwm o dan adran 731 ar y dosbarthiad.

Lle nad oes unrhyw dwf ar y cyfraniad gwreiddiol i’r cynllun, neu os yw’r twf yn gyfyngedig i log sydd wedi cronni ar fenthyciadau i gyflogeion, ni fydd rhwymedigaeth Treth Incwm o dan adran 731.

Os cyrhaeddir setliad ar y sail bod cam perthnasol o dan Rhan 7A wedi digwydd ar ôl 5 Ebrill 2011, a bod ei werth yn cynnwys incwm ac enillion yr ymddiriedolaeth, bydd y rhain yn cael eu trethu fel rhan o’r tâl tâl cuddiedig.