Canllawiau

Hawlio Rhyddhad Treth Cerddorfeydd ar gyfer Treth Gorfforaeth

Gwirio a yw’ch cwmni yn gymwys i gael Rhyddhad Treth Cerddorfeydd ar gyfer Treth Gorfforaeth, a’r hyn y gallwch ei hawlio.

Gan:
Cyllid a Thollau EF
Cyhoeddwyd
10 Chwefror 2020
Diweddarwyd ddiwethaf
24 Chwefror 2025 — Gweld pob diweddariad

Pwy all hawlio

Mae’n rhaid bod y canlynol yn wir am eich cwmni: 

  • mae’n gyfrifol am redeg y cyngerdd o’r dechrau i’r diwedd, gan gynnwys cyflogi neu hurio’r perfformwyr 

  • mae’n cymryd rhan weithredol yn y gwaith cynllunio a phenderfynu 

  • mae’n gweithio’n uniongyrchol i drafod, contractio a thalu am y canlynol: 

    • hawliau 

    • nwyddau 

    • gwasanaethau 

Gwiriwch a yw’ch cwmni’n gymwys fel y cwmni cynhyrchu (yn agor tudalen Saesneg) cyn hawlio’r rhyddhad.

Gwirio a yw’r cynhyrchiad yn gymwys i gael rhyddhad treth

Gall eich cwmni hawlio’r rhyddhad os yw’n gwmni cynhyrchu cerddorfaol sy’n cynnal cyngerdd cerddorfaol cymhwysol.  

Mae cyngerdd cerddorfaol yn gymwys os yw’r canlynol yn wir: 

  • mae’r cyngerdd yn cael ei berfformio gan offerynwyr, yn gyfan gwbl neu’n bennaf, a’r offerynwyr hyn yw prif ffocws y cyngerdd, a hwnnw’n cynnwys y canlynol: 

    • cerddorfa 

    • ensemble 

    • grŵp 

    • band 

  • mae’r cyngerdd yn cynnwys o leiaf 12 offerynnwr 

  • nid yw pob un o’r offerynnau, neu nid yw’r rhan fwyaf ohonynt, yn defnyddio chwyddleisio electronig 

  • bwriedir bod y cyngerdd yn cael ei berfformio’n fyw ar gyfer aelodau o’r cyhoedd sy’n talu, neu at ddibenion addysgol 

  • mae o leiaf 25% o’r ‘costau craidd’ yn cael eu gwario ar nwyddau neu wasanaethau a ddarperir o’r tu mewn i’r DU neu’r UE, Norwy, Gwlad yr Iâ a Liechtenstein, sef yr Ardal Economaidd Ewropeaidd (AEE) – o 1 Ebrill 2024 ymlaen, mae’n rhaid i o leiaf 10% o’r ‘costau craidd’ fod yn gysylltiedig â gweithgarwch yn y DU 

Costau craidd yw’r hyn a wariwyd ar redeg y cynhyrchiad. Nid yw’n cynnwys unrhyw gostau a godir ar y cynhyrchiad ei hun. 

Ni all eich cwmni hawlio’r rhyddhad os yw’r canlynol yn wir am y cyngerdd: 

  • prif bwrpas y cyngerdd, neu un o’i brif bwrpasau, yw hysbysebu neu hyrwyddo nwyddau neu wasanaethau 

  • mae’r cyngerdd yn cynnwys cystadleuaeth 

  • prif bwrpas y cyngerdd, neu un o’i brif bwrpasau, yw recordio’r perfformiad

Gallwch wirio a yw’r cynhyrchiad yn gymwys i gael y rhyddhad hwn.

Yr hyn y gallwch ei hawlio 

Gallwch hawlio didyniad ychwanegol i ostwng eich elw, neu i gynyddu colled. Bydd hyn yn gostwng swm y Dreth Gorfforaeth y bydd yn rhaid i chi ei dalu. 

Y didyniad ychwanegol yw’r isaf o’r naill neu’r llall o’r canlynol: 

  • 80% o gyfanswm y costau craidd 

  • swm y costau craidd a wariwyd ar nwyddau neu wasanaethau a ddarperir o’r DU neu’r AEE – o 1 Ebrill 2024 ymlaen, bydd yn rhaid nodi swm y costau craidd sy’n gysylltiedig â gweithgarwch yn y DU 

Os byddwch yn gwneud colled, gall yr holl golled, neu ran ohoni, gael ei hildio yn gyfnewid am gredyd treth taladwy, a hynny ar gyfradd o 25%. 

Pryd y gallwch hawlio 

Gallwch wneud hawliad am Ryddhad Treth Cerddorfeydd, diwygio’ch hawliad neu ei dynnu, hyd at un flwyddyn ar ôl dyddiad cyflwyno Ffurflen Dreth y Cwmni. 

Ar gyfer cyfnodau cyfrifyddu sy’n dechrau ar neu ar ôl 1 Ebrill 2024, gallwch wneud hawliad am Ryddhad Treth Cerddorfeydd, diwygio’ch hawliad neu ei dynnu, hyd at 2 flynedd ar ôl diwedd y cyfnod cyfrifyddu y mae’n berthnasol iddo. 

Mae’n bosibl y gall CThEF dderbyn hawliadau hwyr o dan rai amgylchiadau.

Sut i hawlio

Gallwch hawlio’r rhyddhad treth ar eich Ffurflen Dreth y Cwmni (yn agor tudalen Saesneg).

O fis Ebrill 2025 ymlaen, mae’n rhaid i chi gynnwys tudalen atodol CT600P ar gyfer y diwydiannau creadigol gyda’ch Ffurflen Dreth y Cwmni.

Bydd angen i chi gyfrifo’r canlynol:

  • didyniadau ychwanegol sy’n ddyledus i’ch cwmni

  • unrhyw gredyd taladwy sy’n ddyledus i’ch cwmni

O 1 Ebrill 2024 ymlaen, mae’n rhaid i bob hawliad gynnwys ffurflen gwybodaeth ychwanegol (yn agor tudalen Saesneg). Mae’n rhaid i chi ddefnyddio’r ffurflen hon i gyflwyno’r dystiolaeth angenrheidiol er mwyn ategu’ch hawliad.

Mae’n rhaid i chi hefyd roi’r canlynol:

  • enw a chyfeiriad pob lleoliad ar gyfer pob perfformiad

  • datganiad o’r costau craidd, wedi’u rhannu fel y ganlyn:

    • costau yn y DU neu’r AEE

    • costau nad ydynt yn y DU neu’r AEE

  • dadansoddiad o’r costau fesul categori

  • dyddiad dechrau’r cynhyrchiad

Gallwch ddewis bod mwy nag un cyngerdd yn cael eu trin fel un cyngerdd. Os gwnaethoch y dewis hwn, dylech nodi dyddiad eich dewis ar Ffurflen Dreth y Cwmni.

Mae’n rhaid i’r dewis hwn gael ei wneud cyn y naill neu’r llall o’r dyddiadau canlynol (p’un bynnag sydd hwyraf): 

  • dyddiad y cyngerdd cyntaf yn y gyfres 

  • dyddiad y gwnaethoch yr hawliad cyntaf sy’n ymwneud â chyngerdd yn y gyfres

Dylech anfon dewisiadau o’r fath drwy e-bost i: creative.industries@hmrc.gov.uk.

Rhagor o wybodaeth

Gallwch gael rhagor o wybodaeth, gan gynnwys enghreifftiau o sut y mae’r rhyddhad yn cael ei gyfrifo, yn y Llawlyfr Rhyddhad Treth Cerddorfeydd (yn agor tudalen Saesneg).

Updates to this page

Cyhoeddwyd ar 10 Chwefror 2020
Diweddarwyd ddiwethaf ar 24 Chwefror 2025 + show all updates

  1. Guidance added to check if the production qualifies for the tax relief. Added in information about CT600P supplementary page.

  2. From 1 April 2024 the rule for core costs used on goods or services provided from within the UK or European Economic Area (EEA) is changing. At least 10% of the core costs must relate to activities in the UK.

  3. The 'How to claim' section has been updated with a link to 'Support your claim for creative industry tax reliefs' which explains how to provide evidence to support your creative industry reliefs claim.

  4. First published.

Print this page

Cynnwys

Cynnwys cysylltiedig