Canllawiau

Hawlio Rhyddhad Treth Theatr ar gyfer Treth Gorfforaeth

Gwirio a yw’ch cwmni yn gymwys i gael Rhyddhad Treth Theatr ar gyfer Treth Gorfforaeth, a’r hyn y gallwch ei hawlio.

• Gan: Cyllid a Thollau EF
• Cyhoeddwyd: 10 Chwefror 2020
• Diweddarwyd ddiwethaf: 24 Chwefror 2025 — Gweld pob diweddariad

Pwy all hawlio

Mae’n rhaid bod y canlynol yn wir am eich cwmni:

• mae’n cymryd rhan weithredol yn y gwaith cynllunio a phenderfynu

• mae’n gweithio’n uniongyrchol i drafod, contractio a thalu am hawliau, nwyddau a gwasanaethau

• mae’n gyfrifol am redeg y cynhyrchiad o’r dechrau i’r diwedd, gan gynnwys gwneud y canlynol:

  • cyflogi’r perfformwyr

  • hurio’r perfformwyr

Gwiriwch a yw’ch cwmni’n gymwys fel y cwmni cynhyrchu (yn agor tudalen Saesneg) cyn hawlio’r rhyddhad.

Gwirio a yw’r cynhyrchiad yn gymwys i gael rhyddhad treth

Gall eich cwmni hawlio’r rhyddhad os yw’r canlynol yn wir:

• mae’n llwyfannu un o’r cynyrchiadau theatr cymhwysol canlynol:

  • drama, opera, sioe gerdd neu ddarn dramatig arall sy’n adrodd stori lle mae’r perfformiadau’n fyw a bod y perfformwyr yn cyflawni perfformiadau drwy chwarae rolau

  • ballet

• prif bwrpas y gynulleidfa yw gwylio’r perfformiad

• mae’r perfformiadau i gyd, neu’r rhan fwyaf ohonynt, ar gyfer aelodau o’r cyhoedd sy’n talu, neu at ddibenion addysgol

• mae o leiaf 25% o’r ‘costau craidd’ yn cael eu gwario ar nwyddau neu wasanaethau a ddarperir o’r tu mewn i’r DU neu’r UE, Norwy, Gwlad yr Iâ a Liechtenstein, sef yr Ardal Economaidd Ewropeaidd (AEE) — o 1 Ebrill 2024 ymlaen, mae’n rhaid i o leiaf 10% o’r ‘costau craidd’ fod yn gysylltiedig â gweithgarwch yn y DU

Costau craidd yw’r hyn a wariwyd ar redeg y cynhyrchiad theatr a’i gau. Nid yw’n cynnwys unrhyw gostau a godir yn ystod rhediad y cynhyrchiad.

Ni all eich cwmni hawlio’r rhyddhad os yw’r canlynol yn wir am y cynhyrchiad:

• prif bwrpas y cynhyrchiad, neu un o’i brif bwrpasau, yw hysbysebu neu hyrwyddo nwyddau neu wasanaethau

• mae’r cynhyrchiad yn cynnwys cystadleuaeth

• mae’r cynhyrchiad yn defnyddio anifail gwyllt

• mae’r cynhyrchiad yn cynnwys golygfeydd o natur rywiol

• prif bwrpas y cynhyrchiad, neu un o’i brif bwrpasau, yw recordio’r perfformiad

• mae’r cynhyrchiad wedi’i gynhyrchu at ddibenion hyfforddi

Gallwch wirio a yw’r cynhyrchiad yn gymwys i gael y rhyddhad hwn.

Yr hyn y gallwch ei hawlio

Gallwch hawlio didyniad ychwanegol i ostwng eich elw, neu i gynyddu colled. Bydd hyn yn gostwng swm y Dreth Gorfforaeth y bydd yn rhaid i chi ei dalu.

Y didyniad ychwanegol yw’r isaf o’r naill neu’r llall o’r canlynol:

• 80% o gyfanswm y costau craidd

• swm y costau craidd a wariwyd ar nwyddau neu wasanaethau a ddarperir o’r tu mewn i’r DU neu’r AEE — o 1 Ebrill 2024 ymlaen, bydd yn rhaid nodi swm y costau craidd sy’n gysylltiedig â gweithgarwch yn y DU

Os byddwch yn gwneud colled, gall yr holl golled, neu ran ohoni, gael ei hildio yn gyfnewid am gredyd treth taladwy.

Y gyfradd bresennol ar gyfer ildio colledion yw 45%. Gallwch ildio colledion ar gyfradd uwch o 50% os yw’ch cynhyrchiad ar daith.

Mae’r cyfraddau presennol yn destun cynnydd dros dro. Y gyfradd safonol yw 20%, a 25% ar gyfer cynyrchiadau sydd ar daith.

Er mwyn i’ch cynhyrchiad gael ei ystyried fel un sydd ar daith, mae’n rhaid i o leiaf un o’r canlynol fod yn wir:

• yn ystod camau cyntaf y cynhyrchiad, mae’n rhaid eich bod yn bwriadu perfformio’r cynhyrchiad mewn o leiaf 6 safle ar wahân

• bydd o leiaf 14 perfformiad, a bydd y rhain yn cael eu perfformio mewn o leiaf 2 safle ar wahân

Pryd y gallwch hawlio

Gallwch wneud hawliad am Ryddhad Treth Theatr, diwygio’ch hawliad neu ei dynnu, hyd at un flwyddyn ar ôl dyddiad cyflwyno Ffurflen Dreth y Cwmni.

Ar gyfer cyfnodau cyfrifyddu sy’n dechrau ar neu ar ôl 1 Ebrill 2024, gallwch wneud hawliad am Ryddhad Treth Theatr, diwygio’ch hawliad neu ei dynnu, hyd at 2 flynedd ar ôl diwedd y cyfnod cyfrifyddu y mae’n berthnasol iddo.

Mae’n bosibl y gall CThEF dderbyn hawliadau hwyr o dan rai amgylchiadau.

Sut i hawlio

Gallwch hawlio’r rhyddhad ar eich Ffurflen Dreth y Cwmni (yn agor tudalen Saesneg).

O fis Ebrill 2025 ymlaen, mae’n rhaid i chi gynnwys tudalen atodol CT600P ar gyfer y diwydiannau creadigol gyda’ch Ffurflen Dreth y Cwmni.

Bydd angen i chi gyfrifo’r canlynol:

• didyniadau ychwanegol sy’n ddyledus i’ch cwmni

• unrhyw gredyd taladwy sy’n ddyledus i’ch cwmni

O 1 Ebrill 2024 ymlaen, mae’n rhaid i bob hawliad gynnwys ffurflen gwybodaeth ychwanegol (yn agor tudalen Saesneg). Mae’n rhaid i chi ddefnyddio’r ffurflen hon i gyflwyno’r dystiolaeth angenrheidiol er mwyn ategu’ch hawliad.

Ar gyfer pob cynhyrchiad, mae’n rhaid i chi roi’r canlynol:

• teitl y cynhyrchiad

• dyddiad dechrau’r cynhyrchiad

• datganiad o’r costau craidd, wedi’u rhannu fel y ganlyn:

  • costau yn y DU neu’r AEE

  • costau nad ydynt yn y DU neu’r AEE

• dadansoddiad o’r costau fesul categori

Os ydych yn hawlio’r gyfradd rhyddhad ar gyfer cynyrchiadau ar daith, bydd hefyd angen i chi roi nifer y perfformiadau a fydd yn cael eu cynnal ym mhob safle, a dyddiadau’r perfformiadau hyn.

Rhagor o wybodaeth

Gallwch gael rhagor o wybodaeth, gan gynnwys enghreifftiau o sut y mae’r rhyddhad yn cael ei gyfrifo, yn y Llawlyfr Rhyddhad Treth Theatr (yn agor tudalen Saesneg).

Cyhoeddwyd ar 10 Chwefror 2020
Diweddarwyd ddiwethaf ar 24 Chwefror 2025 + show all updates

1. 24 Chwefror 2025

   Guidance added to check if the production qualifies for the tax relief. Added in information about CT600P supplementary page.

2. 19 Ionawr 2024

   From 1 April 2024 the rule for core costs used on goods or services provided from within the UK or European Economic Area (EEA) is changing. At least 10% of the core costs must relate to activities in the UK.

3. 31 Ionawr 2022

   The 'How to claim' section has been updated with a link to 'Support your claim for creative industry tax reliefs' which explains how to provide evidence to support your creative industry reliefs claim.

4. 26 Ionawr 2021

   Information updated about core expenditure.

5. 10 Chwefror 2020

   First published.