Rhoi gwybod am newidiadau sy’n effeithio ar eich credydau treth

Gallai’ch credydau treth godi, gostwng neu ddod i ben os oes newidiadau yn eich bywyd teuluol neu’ch bywyd gwaith.

Mae’n rhaid i chi roi gwybod i Gyllid a Thollau EF (CThEF) am unrhyw newidiadau yn eich amgylchiadau.

Gwnewch hyn cyn gynted â phosibl er mwyn gwneud yn siŵr eich bod yn cael y swm cywir o gredydau treth. Bydd yn rhaid i chi ad-dalu’r arian os ydych wedi cael gordaliad.

Os bydd eich credydau treth yn dod i ben, ni allwch hawlio credydau treth eto.

Mae’r canllaw hwn hefyd ar gael yn Saesneg.

Newidiadau y mae’n rhaid i chi roi gwybod amdanynt

Rhowch wybod i CThEF ar unwaith os yw’r canlynol yn wir:

• mae’ch amgylchiadau byw yn newid, er enghraifft, rydych yn dechrau perthynas neu’n dod â pherthynas i ben, yn symud i mewn gyda phartner newydd, yn priodi neu’n ffurfio partneriaeth sifil, yn gwahanu’n barhaol neu’n ysgaru
• mae’ch plentyn neu’ch partner yn marw (does dim rhaid i chi roi gwybod i CThEF os ydych wedi defnyddio’r gwasanaeth Tell Us Once)
• mae’ch plentyn yn stopio mynd i ofal plant am 4 wythnos neu fwy pan fyddai fel arfer yn mynd
• mae’ch costau gofal plant yn dod i ben, yn gostwng £10 neu fwy yr wythnos, neu rydych yn dechrau cael cymorth gyda nhw
• mae’ch plentyn yn gadael y cartref, er enghraifft mae’n symud allan neu’n cael ei roi dan ofal
• mae’ch plentyn yn cael ei roi yn y ddalfa
• mae’ch plentyn sydd dros 16 oed yn gadael addysg neu hyfforddiant cymeradwy, neu wasanaeth gyrfaoedd (yn agor tudalen Saesneg)
• nid yw’ch darparwr gofal plant yn gofrestredig neu’n gymeradwy mwyach (yn agor tudalen Saesneg)
• mae’ch oriau gwaith yn disgyn o dan 30 awr yr wythnos (wedi’u cyfuno os ydych yn gwpl gyda phlant)
• mae’ch oriau gwaith yn disgyn neu’n mynd dros yr isafswm sydd ei angen i fod yn gymwys (yn agor tudalen Saesneg)

Mae’n rhaid i chi hefyd roi gwybod i CThEF ar unwaith os yw’r canlynol yn berthnasol i chi:

• rydych yn mynd dramor am 8 wythnos neu fwy
• rydych yn gadael y DU yn barhaol neu’n colli’r hawl i breswylio yn y DU
• rydych yn dechrau gweithio llai nag 16 awr yr wythnos wrth hawlio costau gofal plant – heblaw am rai amgylchiadau
• rydych wedi bod ar streic am fwy na 10 diwrnod yn olynol

Os ydych yn cael credydau treth nad oes gennych hawl iddynt, bydd angen i chi ad-dalu’r arian (yn agor tudalen Saesneg). Efallai y bydd yn rhaid i chi hefyd dalu cosb.

Dyddiad cau ar gyfer rhoi gwybod

Mae’n rhaid i chi roi gwybod am y newidiadau hyn cyn pen 1 mis. Os byddwch yn rhoi gwybod am newidiadau ar unwaith, mae’n llai tebygol y bydd y swm anghywir yn cael ei dalu i chi.

Gallech gael dirwy o hyd at £300 os na rowch wybod am rai newidiadau cyn pen mis, a dirwy o hyd at £3,000 os rhowch wybodaeth anghywir.

Os gwnaethoch amcangyfrif eich incwm pan wnaethoch adnewyddu’ch credydau treth – er enghraifft oherwydd eich bod yn hunangyflogedig – rhowch wybod i CThEF beth yw’ch incwm gwirioneddol erbyn 31 Ionawr.

Newidiadau eraill y dylech roi gwybod amdanynt

Mae’n llai tebygol y bydd effaith ar eich credydau treth, er enghraifft drwy gronni gordaliad, os byddwch yn rhoi gwybod i CThEF cyn gynted â’ch bod yn:

• cael unrhyw newid mewn incwm (rhowch wybod am hyn ar unwaith os yw’n codi neu’n gostwng gan £2,500 neu fwy)
• cynyddu eich oriau gwaith i 30 awr neu fwy yr wythnos (ar y cyd os ydych yn gwpl gyda phlant)
• cael babi neu’n cymryd cyfrifoldeb dros blentyn arall
• dechrau neu’n rhoi’r gorau i hawlio budd-daliadau i chi eich hun neu aelod o’r teulu, neu os yw’r budd-daliadau hynny’n newid
• dechrau cael budd-dal anabledd (mae’n bosibl y byddwch yn gymwys i’r elfen anabledd o gredydau treth, hyd yn oes os yw’ch credydau treth wedi dod i ben)
• dechrau neu’n stopio bod ag anabledd sy’n eich rhoi dan anfantais wrth geisio am swydd
• cael tystysgrif sy’n profi bod eich plentyn yn ddall neu fod ei dystysgrif yn dod i ben
• dechrau talu am ofal plant cofrestredig neu gymeradwy (yn agor tudalen Saesneg)
• stopio cael help gyda chostau gofal plant

Dylech roi gwybod am y newidiadau hyn cyn pen 1 mis er mwyn gwneud yn siŵr eich bod yn cael popeth y mae gennych hawl iddo. Fel arfer, ni ellir ôl-ddyddio taliadau ymhellach na hyn.

Does dim rhaid i chi roi gwybod i CThEF os ydych chi neu aelod o’ch teulu wedi cael eich trosglwyddo o fudd-dal anabledd sy’n bodoli eisoes i Daliad Anabledd Oedolion neu Daliad Anabledd Plant, oni bai bod swm yr arian a gewch yn newid.

Dylech hefyd roi gwybod i CThEF os ydych yn newid:

• manylion banc – gallwch roi gwybod am hyn hyd at 30 diwrnod cyn iddo ddigwydd
• cyfeiriad – arhoswch hyd nes eich bod wedi symud cyn rhoi gwybod i CThEF
• darparwr gofal plant
• eich rhywedd

Sut i roi gwybod

Gallwch roi gwybod am y rhan fwyaf o newidiadau drwy’r gwasanaeth ar-lein neu drwy ap CThEF. Gallwch wylio fideo ynghylch sut i reoli’ch credydau treth gan ddefnyddio’r ap (yn agor tudalen Saesneg).

Newidiadau na allwch roi gwybod amdanynt ar-lein

Ni allwch ddefnyddio’r gwasanaeth ar-lein nac ap CThEF i roi gwybod am newidiadau mewn perthynas â’r canlynol:

• pa mor aml rydych eisiau cael eich talu
• newidiadau nad ydynt wedi digwydd eto (heblaw am newidiadau mewn costau gofal plant presennol hyd at wythnos ymlaen llaw)

Gallwch roi gwybod am y newidiadau hyn a newidiadau eraill dros y ffôn neu drwy’r post.

Cyn i chi ddechrau

Gwnewch yn siŵr bod gennych gymaint o wybodaeth â phosibl am y newid mewn amgylchiadau. Er enghraifft, os ydych wedi newid swyddi, bydd angen dyddiadau eich cyflogaeth arnoch a’ch cyfeirnod TWE ar gyfer y ddwy swydd.

Bydd angen i chi fewngofnodi er mwyn defnyddio’r gwasanaeth hwn. Os nad oes gennych fanylion mewngofnodi eisoes, byddwch yn gallu eu creu.

Cewch wybod pan fyddwch yn mewngofnodi a oes angen i chi brofi pwy ydych. Mae hyn er mwyn cadw’ch manylion yn ddiogel ac, fel arfer, bydd angen i chi ddefnyddio ID ffotograffig fel pasbort neu drwydded yrru i wneud hynny.

Bydd mewngofnodi hefyd yn actifadu’ch cyfrif treth personol – gallwch ddefnyddio hwn i wirio a rheoli’ch cofnodion gyda CThEF.

Pam mae’ch credydau treth yn newid

Bydd eich taliadau’n dod i ben os:

• rydych chi neu’ch partner yn hawlio Credyd Cynhwysol (hyd yn oed os na chaiff eich hawliad ei gymeradwyo)

• gwnaethoch hawlio fel person sengl ac rydych yn dechrau byw gyda phartner

• gwnaethoch hawlio fel cwpl ac rydych wedi gwahanu o’ch partner

Gall eich taliadau ostwng neu ddod i ben os yw’r canlynol yn berthnasol:

• mae’ch incwm yn codi mwy na £2,500 – rhowch wybod am hyn ar unwaith i ostwng y swm sydd wedi’i ordalu i chi

• nid ydych wedi adnewyddu’ch hawliad

• mae’ch hysbysiad o ddyfarniad yn dangos eich bod wedi cael eich gordalu

• rydych wedi stopio fod yn gymwys ar gyfer yr elfen anabledd o’ch hawliad credyd treth

• mae’ch plentyn erbyn hyn yn 16 oed, yn 18 oed neu’n 19 oed ac nid ydych wedi rhoi gwybod i CThEF ei fod mewn addysg neu hyfforddiant cymeradwy (yn agor tudalen Saesneg)

• mae’ch costau gofal plant yn gostwng

Gall eich taliadau godi os yw’r canlynol yn berthnasol:

• mae’ch incwm yn gostwng mwy na £2,500

• mae’ch budd-daliadau’n dod i ben neu’n gostwng

• rydych yn dechrau bod yn gymwys ar gyfer yr elfen anabledd o gredydau treth

• rydych yn cael plentyn

• mae’ch costau gofal plant yn codi