Budd-dal Plant os ydych yn symud i’r DU

Mae angen i bawb fodloni’r rheolau cymhwystra er mwyn hawlio Budd-dal Plant. Os ydych yn symud i’r DU o dramor, bydd angen i chi hefyd brofi bod y canlynol yn wir:

  • rydych yn byw yn y DU fel eich prif gartref – ac eithrio cyfnodau byr, megis mynd ar wyliau (yn y rhan fwyaf o achosion, mae’n rhaid i’ch plentyn fyw gyda chi)
  • mae gennych yr hawl i breswylio (yn agor tudalen Saesneg) yn y DU

Os oes gennych statws preswylydd ‘sefydlog’ drwy’r Cynllun Preswylio’n Sefydlog i Ddinasyddion yr UE, rydych yn gymwys i gael Budd-dal Plant. Os oes gennych statws preswylydd ‘cyn-sefydlog’, bydd yn rhaid i chi wirio’r rheolau cymhwystra ychwanegol.

Mae’r canllaw hwn hefyd ar gael yn Saesneg.

Nid yw’ch plentyn yn byw gyda chi yn y DU

Fel arfer, ni fyddwch yn gymwys os ydych yn dod o’r tu allan i’r UE, y Swistir, Norwy, Gwlad yr Iâ neu Liechtenstein, ac nad yw’ch plentyn yn byw gyda chi.

Os yw’ch plentyn yn byw mewn gwlad yn yr UE, Norwy, Gwlad yr Iâ neu Liechtenstein (yr AEE), neu’r Swistir

Mae’n bosibl y byddwch yn gymwys i gael Budd-dal Plant os yw’r naill neu’r llall yn wir:

Mae’n rhaid eich bod chi, neu’ch partner, naill ai’n talu Yswiriant Gwladol yn y DU (os ydych yn gyflogedig neu’n hunangyflogedig) neu’n cael un o’r budd-daliadau canlynol:

  • Lwfans Ceisio Gwaith newydd (JSA)
  • Lwfans Cyflogaeth a Chymorth (ESA) ar sail cyfraniadau
  • Pensiwn y Wladwriaeth
  • budd-daliadau gweddwon
  • Taliad Cymorth Profedigaeth
  • Budd-dal Analluogrwydd
  • Budd-dal Anabledd Anafiadau Diwydiannol
  • Lwfans Anabledd Difrifol
  • Tâl Mamolaeth Statudol (SMP)

Rydych yn ‘destun rheolaeth mewnfudo’

Fel arfer, ni allwch hawlio Budd-dal Plant os ydych yn ‘destun rheolaeth mewnfudo’, sy’n golygu bod y naill neu’r llall yn berthnasol:

  • mae angen caniatâd arnoch i gyrraedd neu i aros yn y DU ac nid oes gennych y caniatâd hwnnw
  • mae gennych ganiatâd i gyrraedd neu i aros yn y DU ar yr amod nad ydych yn cael mynediad at arian cyhoeddus

Ceir eithriadau os ydych yn dod o’r gwledydd canlynol:

  • Albania, Moroco, San Marino, Tunisia neu Dwrci, ac yn gweithio yn y DU
  • rydych yn dod o wlad sydd â chytundeb â’r DU ynghylch Budd-dal Plant

Dyma’r gwledydd sydd â chytundeb â’r DU:

  • Barbados
  • Bosnia a Herzegovina
  • Canada
  • Ynysoedd y Sianel
  • Israel
  • Kosovo
  • Mauritius
  • Montenegro
  • Seland Newydd
  • Gogledd Macedonia
  • Serbia