Chwilio am wybodaeth am dir ac eiddo
Dod o hyd i wybodaeth am eiddo yng Nghymru neu Loegr, hyd yn oed os nad ydych yn berchen arno.
Bydd angen ichi chwilio cofrestri gwahanol os yw’r eiddo yn yr Alban neu os yw’r eiddo yng Ngogledd Iwerddon.
Mae’r dudalen hon ar gael hefyd yn Saesneg (English).
Yr hyn y gallwch ei gael
Gallwch lawrlwytho copïau o grynodeb o’r eiddo, cynllun teitl a chofrestr teitl ar gyfer eiddo yn y gwasanaeth.
Cael crynodeb o’r eiddo
Mae crynodeb o’r eiddo’n cynnwys:
- cyfeiriad yr eiddo – y cyfeiriad a gedwir gan y Post Brenhinol
- y disgrifiad eiddo
- y ‘math o ddaliadaeth’ – y math o berchnogaeth sydd gan yr eiddo
- a oes unrhyw ‘gyfamodau cyfyngu’ – addewidion i beidio â gwneud rhai pethau gyda’r tir, fel peidio ag adeiladu ar ardal benodol
- a oes unrhyw ‘hawddfreintiau’ – hawliau un darn o dir dros ddarn arall, fel hawl tramwy
I gael manylion unrhyw ‘gyfamodau cyfyngu’ neu ‘hawddfreintiau’, bydd angen ichi brynu’r gofrestr teitl.
Cael cofrestr teitl
Mae’r gofrestr teitl fel arfer yn cynnwys:
- y rhif teitl
- pwy yw perchennog yr eiddo
- am faint y gwerthwyd yr eiddo ddiwethaf
- a oes gan yr eiddo forgais
- manylion unrhyw ‘gyfamodau cyfyngu’ – addewidion i beidio â gwneud rhai pethau gyda’r tir, fel peidio ag adeiladu ar ardal benodol
- manylion unrhyw ‘hawddfreintiau’ – hawliau un darn o dir dros ddarn arall, fel hawl tramwy
Mewn rhai achosion, ni fydd y gofrestr teitl yn cynnwys manylion y cyfamodau cyfyngu neu hawddfreintiau, ond bydd yn dweud pa ddogfennau sy’n gwneud hynny.
Cael cynllun teitl
Mae’r cynllun teitl yn cynnwys lleoliad yr eiddo a’i derfynau cyffredinol.
Chwilio am eiddo
Bydd angen ichi archebu copi swyddogol o’r gofrestr os oes angen ichi brofi perchnogaeth eiddo, er enghraifft ar gyfer achos llys.
Cyn i chi ddechrau
Bydd angen cyfeiriad ebost a cherdyn debyd neu gredyd arnoch i ddefnyddio’r gwasanaeth hwn.
Darllen canllaw ar gael gwybodaeth am eiddo a thir, gan gynnwys ffynonellau eraill o wybodaeth.
Ffïoedd
| Y gost | |
|---|---|
| Crynodeb o’r eiddo | Am ddim |
| Cofrestr teitl | £3 |
| Cynllun teitl | £3 |
Ni ellir lawrlwytho rhai cynlluniau teitl ar-lein – bydd yn rhaid ichi eu cael trwy’r post. Y gost yw £7 y ddogfen.
Cymorth
Cysylltwch â Chofrestrfa Tir EM os oes angen:
- cymorth i ddefnyddio’r gwasanaeth arnoch, er enghraifft os ydych yn cael problemau wrth lawrlwytho gwybodaeth neu wrth ddefnyddio’ch cyfrif
- cymorth gyda rhywbeth arall, er enghraifft gyda therfynau eich eiddo neu newid yr enw ar eich cofnod eiddo
Gallwch gael adroddiad ar risg llifogydd ar gyfer eiddo yn Lloegr gan Asiantaeth yr Amgylchedd.