Ysgrifennydd Gwladol Cymru yn cynnal derbyniad i ddathlu Cronfa Cefn Gwlad y Tywysog
David Jones yn tynnu sylw at waith Cronfa Cefn Gwlad y Tywysog yng Nghymru
Welsh countryside
I nodi dechrau Wythnos Genedlaethol Cefn Gwlad (14eg i 20fed Gorffennaf 2014) cynhelir derbyniad yn San Steffan i dynnu sylw at waith Cronfa Cefn Gwlad y Tywysog yng Nghymru. Bydd y digwyddiad yn cael ei gynnal gan David Jones, AS, Ysgrifennydd Gwladol Cymru ac Ymddiriedolwr Cronfa Cefn Gwlad y Tywysog, yr Arglwydd Curry o Kirkhale.
Ers lansio’r Gronfa yn 2010 mae wedi darparu grantiau i gefnogi naw o brosiectau yng Nghymru a bydd cynrychiolydd o bedwar o’r rhain yn y Derbyniad. Mae 92 o brosiectau wedi cael eu cefnogi’n genedlaethol ac mae dros £3.8 miliwn wedi cael ei roi i helpu ein cymunedau gwledig, ein ffermwyr a’n pobl ifanc.
Mae Cronfa Cefn Gwlad y Tywysog hefyd wedi rhoi cyllid brys i ffermwyr yng Nghymru, yn enwedig ffermwyr mynydd a gollodd nifer fawr o ddefaid a’u hŵyn wrth i luwchfeydd eira trychinebus effeithio ar rannau o Gymru.
Dywedodd David Jones, Ysgrifennydd Gwladol Cymru:
Rwyf wrth fy modd fy mod yn cael cynnal y derbyniad yn Nhŷ Gwydyr heno (14 Gorffennaf) sy’n rhoi cyfle gwerthfawr i amlygu gwaith ardderchog Cronfa Cefn Gwlad y Tywysog.
Mae eu gwaith yn cefnogi amrywiaeth o brosiectau allweddol yng Nghymru, gan gynnwys prentisiaethau a hyfforddiant i bobl ifanc, cefnogaeth ymarferol a bugeiliol i ffermwyr, cymorth busnes i fenywod a phrosiectau i addysgu plant ysgol.
Dywedodd Helen Aldis, Rheolwr Cronfa Cefn Gwlad y Tywysog:
Mae Cymru yn ardal wledig bwysig iawn i’r Gronfa. Rydyn ni’n chwilio am ragor o brosiectau i’w helpu yn y rhanbarth – yn ogystal â chysylltu â chwmnïau yng Nghymru i edrych sut gallan nhw ymuno â ni a chefnogi ein gwaith.
Y materion mae Cronfa Cefn Gwlad y Tywysog yn mynd i’r afael â nhw: mae incwm ffermio isel, dirywiad mewn cymunedau gwledig, mynediad i hyfforddiant ar gyfer pobl ifanc ac ynysu gwledig i gyd yn faterion mawr yng Nghymru. Rydym wedi ymrwymo i gefnogi prosiectau sy’n mynd i’r afael â’r rhain.
Cafodd Cronfa Cefn Gwlad y Tywysog ei sefydlu gan Ei Uchelder Brenhinol Tywysog Cymru i gefnogi’r llu o sefydliadau ac unigolion hynod sy’n gweithio’n ddiflino i gadw ffermwyr yn ffermio a’n cymunedau gwledig yn fyw.
Gwybodaeth bellach:
- Cafodd Cronfa Cefn Gwlad y Tywysog ei sefydlu gan Ei Uchelder Brenhinol Tywysog Cymru sydd wedi ymrwymo ers tro byd i gefnogi ardaloedd gwledig sydd dan bwysau ym Mhrydain.
- Cafodd ei sefydlu gan Fusnes yn y Gymuned ym mis Gorffennaf 2010. Hyd yn hyn mae wedi rhoi dros £3.8 miliwn mewn grantiau sydd wedi cael eu dosbarthu i dros 90 o brosiectau ar draws y wlad, gan roi budd uniongyrchol i 64,000 o bobl.
- Mae’r prosiectau sydd wedi cael cyllid yn amrywio o brentisiaethau i gyw ffermwyr mynydd, hyfforddiant i bobl ifanc i gael cyflogaeth yn yr economi wledig, cynlluniau cludiant cymunedol mewn ardaloedd gwledig ynysig a phrosiectau i addysgu plant ysgol ynghylch o ble daw eu bwyd a pham bod cefn gwlad yn bwysig.
- Yn ogystal â’r broses ymgeisio arferol, mae’r Gronfa hefyd yn gweithredu cronfa frys pan fydd yr angen yn codi.
- Mae’r holl brosiectau’n canolbwyntio ar gefnogi’r bobl sy’n gofalu am ein cefn gwlad ac yn gwneud iddo weithio.
Mae Prosiectau Cronfa Cefn Gwlad y Tywysog yn cynnwys:
Addysg Ffermio a Chefn Gwlad:
Nod FACE yw addysgu plant a phobl ifanc am fwyd a ffermio mewn cefn gwlad cynaliadwy. Gan gynrychioli 13,250 o athrawon a 129 o ffermwyr mae’n elusen genedlaethol. Mae FACE wedi cael grant ychwanegol o £150,000 dros ddwy flynedd i ymestyn y rhaglen ‘Mae Cefn Gwlad yn Bwysig’, drwy ymweliadau â ffermydd neu weithgareddau yn yr ysgol fel tyfu neu goginio bwyd ffres.
Rhwydwaith Cymuned Ffermio:
Mae’r Rhwydwaith Cymuned Ffermio yn darparu cefnogaeth ymarferol a bugeiliol i helpu ffermwyr i ganfod ffordd gadarnhaol ymlaen drwy eu problemau. Mae’r prosiect yn delio â’r cyfle i gynnal ffermio Prydeinig yn yr ardaloedd sydd â’r angen mwyaf. Mae cyllid wedi cael ei ddarparu i gynyddu’r ymwybyddiaeth o’u gwasanaethau yng Nghymru drwy gynhyrchu llenyddiaeth yn Gymraeg ac yng Nghaint, Swydd Henffordd, a Swydd Gaergrawnt. Mae’r grant yn golygu bod mwy o fusnesau ffermio wedi cael eu cefnogi.
Pub is the Hub
Wedi’i sefydlu gan Ei Uchelder Brenhinol Tywysog Cymru, mae The Pub is the Hub yn hwyluso prosiectau drwy annog a helpu trwyddedeion a chymunedau i gysylltu a rhannu eu profiadau a chydweithio i gefnogi a chynnal eu gwasanaethau lleol. Mae grant y Gronfa wedi golygu bod modd cyflwyno’r rhaglen hon yng Nghymru, gyda’r targed o gynghori 92 o gymunedau.
WiRE
Mae Menywod mewn Mentrau Gwledig yn sefydliad cenedlaethol sy’n cefnogi menywod gwledig sy’n berchen ar fusnes neu sydd eisiau cychwyn busnes ac mae’n darparu cymorth busnes a chyngor ar gychwyn busnes. Mae grant Cronfa Cefn Gwlad y Tywysog wedi cefnogi eu Rhaglen Arwain Rhwydwaith. Eu nod yw datblygu sgiliau arwain arweinwyr rhwydwaith sy’n darparu cyngor ‘ar lawr gwlad’.
Dyma’r cwmnïau sy’n cefnogi’r Gronfa: Asda, Aquascot, Barbour, Barclays, Booths, Coutts, Dairy Crest, Dalehead Foods, Dovecote Park, Duchy Original, Ginsters, HSBC, Hunter, Jordans & Ryvita, Kerry Foods, Land Rover, Lloyds, McDonald’s, Marks & Spencer, Moy Park, Musto, Produce World, Strutt & Parker, United Biscuits a Waitrose.
Mae’r cyhoedd yn gallu rhoi arian ar-lein yn Virgin Giving, yn Swyddfa’r Post neu drwy Neges Destun. Tecstiwch PCF i 70300 a bydd £3 yn cael ei roi i Gronfa Cefn Gwlad y Tywysog.
Yn ystod Wythnos Genedlaethol Cefn Gwlad, mae Cronfa Cefn Gwlad y Tywysog yn annog pawb i fynd allan am dro a mwynhau a gwerthfawrogi cefn gwlad.
Dysgwch fwy am The Prince’s Countryside Fund
Image courtesy of Justin Norris on Flickr, used under Creative Commons.
Updates to this page
Diweddarwyd ddiwethaf ar 14 July 2014 + show all updates
-
Added translation
-
First published.