Mae Llywodraeth y DU yn dod â pheth o’r band eang cyflymaf sydd ar gael ar y farchnad i 37,000 o gartrefi gwledig yng
Ni fydd gartrefi a busnesau ledled Cymru bellach yn gorfod ymgodymu â chyflymderau rhyngrwyd araf wrth i Lywodraeth y DU garlamu ymlaen i gyflwyno cysylltedd gigabit.
New Project Gigabit contracts worth over £289 million.
- Mae tua 37,000 o adeiladau anodd eu cyrraedd ledled Cymru a oedd yn ymlafnio gyda band eang araf i gael mynediad at gyflymderau hynod o gyflym, gan helpu i chwalu rhwystrau rhag cael cyfleoedd a rhoi mynediad gwell i bobl at wasanaethau ar-lein hanfodol fel gofal iechyd ac addysg.
- Mae contractau newydd gan Lywodraeth y DU gwerth tua £79 miliwn wedi’u llofnodi i ddod â rhwydweithiau a all drosglwyddo data ar gyfradd gigabit i ardaloedd mwy anghysbell ar draws Gogledd a De-orllewin Cymru
- Mae’r cyllid yn rhan o genhadaeth Llywodraeth y DU i roi diwedd ar drafferthion band eang gwael ledled Prydain Fawr, ac mae gwaith eisoes ar y gweill i uwchraddio dros filiwn o adeiladau.
Ni fydd tua 37,000 o gartrefi a busnesau ledled Cymru bellach yn gorfod ymgodymu â chyflymderau rhyngrwyd araf wrth i Lywodraeth y DU garlamu ymlaen i gyflwyno cysylltedd gigabit.
Bydd rhai o’r cymunedau mwyaf ynysig yng Nghymru yn elwa o fynediad at rai o’r cyflymderau band eang gorau ar y farchnad, gan gael gwell mynediad at wasanaethau yn cynnwys gofal iechyd gartref drwy ymgynghoriadau rhithiol a monitro o bell, yn ogystal â galwadau fideo o ansawdd uchel, a fydd yn helpu pensiynwyr i fynd i’r afael ag unigrwydd. Bydd hefyd yn cefnogi busnesau i dyfu a gwasanaethu eu cwsmeriaid yn well ar-lein ac yn helpu pobl ifanc i gael gwell cychwyn mewn bywyd drwy gael mynediad at addysg ar-lein a’r adnoddau i wneud cais am swyddi a chael cyfweliad.
Mae Prosiect Gigabit yn chwarae rhan allweddol mewn cynlluniau i sbarduno twf economaidd a chwalu rhwystrau rhag cyfleoedd fel rhan o Gynllun y Llywodraeth ar gyfer Newid. Gyda gwell cyflymderau rhyngrwyd ar draws y wlad, bydd cymunedau a fyddai fel arall yn cael eu gadael ar ôl gyda rhwydweithiau band eang hen ffasiwn yn gallu manteisio i’r eithaf ar yr hyn sydd gan y byd digidol i’w gynnig.
Bydd trefi a phentrefi gwledig, gan gynnwys Betws-y-Coed, Llangollen, Ynys Môn yng Ngogledd Cymru, yn ogystal â Thalacharn, Llangwm a Nantgaredig yn Ne-orllewin Cymru, yn cael mynediad at gysylltiad gigabit, gan fod contract newydd – gwerth tua £79 miliwn – wedi cael ei lofnodi gan Lywodraeth y DU a’r darparwr teleathrebu Openreach.
Dywedodd y Gweinidog Teleathrebu, Syr Chris Bryant:
I deuluoedd a busnesau ledled Cymru wledig, bydd ymladd gyda’u cymdogion am led band yn perthyn i’r gorffennol cyn bo hir, diolch i’r rhaglen hon gan Lywodraeth y DU sy’n dod â rhyngrwyd cyflym i ardaloedd gwledig.
Bydd band eang gwell nid yn unig yn gwella ansawdd bywyd degau o filoedd o gartrefi a busnesau ledled Cymru wledig, fel yn Sir y Fflint a Chonwy, ond bydd hefyd yn ein helpu i roi terfyn ar wahaniaethau rhwng ardaloedd trefol a gwledig, gan wneud Prydain yn lle tecach i bawb.
Mae’r siroedd a fydd yn elwa o’r contractau yn cynnwys Sir y Fflint, Wrecsam, Sir Ddinbych, Conwy, Ynys Môn a Gwynedd.
Mae’r cyhoeddiad yn rhan o bedwar contract newydd gwerth dros £289 miliwn y mae’r llywodraeth wedi’u llofnodi i ddarparu band eang a all drosglwyddo data ar gyfradd gigabit i tua 131,000 o gartrefi a busnesau ychwanegol ar draws Cymru a Lloegr.
Mae’r contractau diweddaraf yn ychwanegu at y 96,600 yn fras o adeiladau sydd eisoes ar fin elwa o dan gytundeb Llywodraeth y DU gydag Openreach, gan ddod â’r cyfanswm hyd yma i tua 227,600 o adeiladau. Bydd y cytundeb a gyhoeddwyd ym mis Awst 2024 yn golygu bod hyd at £800 miliwn o gyllid ar gael i foderneiddio seilwaith band eang mewn ardaloedd gwledig yng Nghymru, Lloegr a’r Alban, gan roi terfyn ar broblemau byffro i lawer o gymunedau anghysbell.
Ar draws y DU, mae contractau Prosiect Gigabit bellach yn cyflwyno cysylltedd gigabit i dros 1.1 miliwn o adeiladau anodd eu cyrraedd – ffigur a fydd yn parhau i godi yn y misoedd i ddod, gan ddiwallu’r galw am gysylltedd dibynadwy, ysgogi economïau gwledig a lleihau gwahaniaethau rhanbarthol.
I gartrefi, mae band eang sy’n gallu trosglwyddo data ar gyfradd gigabit yn darparu cyflymderau uwch a llai o golli cysylltiad, sy’n golygu y gellir manteisio ar weithio o bell ac addysg ar-lein. Yn wahanol i rwydweithiau copr traddodiadol, ni fydd cysylltiadau gigabit yn arafu yn ystod oriau brig, sy’n golygu dim mwy o ymladd gyda chymdogion am led band. Mae rhwydweithiau gigabit yn gallu delio â dros gant o ddyfeisiau ar unwaith heb unrhyw byffro, sy’n golygu bod y teulu cyfan yn gallu syrffio, ffrydio a lawrlwytho yn ddi-dor ar yr un pryd.
Dywedodd Jo Stevens, Ysgrifennydd Gwladol Cymru:
Yn sgil y buddsoddiad hwn gan Lywodraeth y DU, bydd miloedd yn rhagor o bobl a busnesau ledled Cymru yn gallu manteisio ar fand eang cyflym iawn.
Ein prif flaenoriaeth yw sbarduno twf economaidd parhaus. I gyflawni hyn, mae’n hanfodol bod pob rhan o Gymru yn cael darpariaeth lawn mor gyflym â phosibl i hybu cynhyrchiant yn ein holl gymunedau.
Ledled y DU, mae dros filiwn o adeiladau anodd eu cyrraedd eisoes yn gallu manteisio ar gynlluniau uwchraddio diolch i fuddsoddiad gan Lywodraeth y DU. Mae dros 85 y cant o’r wlad nawr yn gallu manteisio ar gysylltiadau gigabit, gan roi’r DU mewn sefyllfa gref i gyrraedd targed y llywodraeth o ddarpariaeth gigabit lawn erbyn 2030.
Mae dwsinau o gontractau Prosiect Gigabit sy’n werth dros £2.2 biliwn o fuddsoddiad bellach wedi cael eu llofnodi gyda dros 10 o wahanol gyflenwyr i gyflawni’r gwaith uwchraddio, gan gynnwys llawer o ddarparwyr band eang annibynnol, llai.
Dywedodd Clive Selley, Prif Weithredwr Openreach:
Mae ein rhwydwaith band eang Ffeibr Llawn newydd nawr yn cyrraedd dros hanner yr holl eiddo yn y DU, ac rydyn ni’n hyderus y gallwn gyrraedd cymaint â 30 miliwn o adeiladau erbyn diwedd y ddegawd, a chymryd bod yr amodau rheoleiddio a buddsoddi iawn yn bodoli. Mae hyn yn llwyddiant ym maes seilwaith ym Mhrydain, a dywed arbenigwyr y bydd yn rhoi hwb o £73 biliwn i gynhyrchiant ac yn dod â llu o fanteision cymdeithasol ac amgylcheddol i’r wlad. Rydyn ni’n credu bod pawb yn haeddu mynediad at fand eang cyflym a dibynadwy, ac rydyn ni’n falch y bydd y bartneriaeth hon yn helpu i ymestyn ein rhwydwaith gwibgyswllt, hynod ddibynadwy i ardaloedd a fyddai fel arall yn cael eu gadael ar ôl gan y sector preifat.
DIWEDD