Gweinidogion Swyddfa Cymru yn nodi Diwrnod Cofio’r Holocost
Stephen Crabb, Jenny Randerson ac Alun Cairns yn coffáu Diwrnod Cofio’r Holocost.
![](https://assets.publishing.service.gov.uk/government/uploads/system/uploads/image_data/file/35618/s300_s300_hmd-candle.jpg)
Heddiw (27 Ionawr) bydd Gweinidogion Swyddfa Cymru Stephen Crabb, Alun Cairns a Jenny Randerson yn nodi Diwrnod Cofio’r Holocost. Mae’n 70 mlynedd eleni ers rhyddhau pobl o wersyll Auschwitz-Birkenau ac yn 20 mlynedd ers hil-laddiad Srebrenica, Bosnia.
Bydd Stephen Crabb ac Alun Cairns yn llofnodi Llyfr Ymrwymiad Ymddiriedolaeth Addysg yr Holocost yn Nhŷ’r Cyffredin sy’n cael ei lofnodi gan gannoedd o Aelodau Seneddol bob blwyddyn fel addewid i frwydro yn erbyn rhagfarn a chasineb.
Bydd Jenny Randerson yn mynychu digwyddiad Diwrnod Cofio’r Holocost yn Neuadd Ganolog San Steffan.
Dywedodd Stephen Crabb, Ysgrifennydd Cymru:
Mae hwn yn gyfle pwysig i gofio’r sawl a ddioddefodd yn yr Holocost a’r sawl a oroesodd, a sicrhau nad ydynt yn mynd yn angof.
Yn drist iawn, fel y mae digwyddiadau diweddar wedi dangos, mae agweddau gwrth-Iddewiaeth a chulni o fathau eraill yn dal i fodoli heddiw, a byddwn yn gofyn i bobl ym mhob cwr o Gymru nodi’r diwrnod ac ymuno yn y frwydr yn erbyn rhagfarn, anoddefgarwch ac eithafiaeth.
Mae’n ddyletswydd ar bob un ohonom i godi llais a herio gwahaniaethu ac erledigaeth pan fyddwn yn gweld hynny.
Yr wythnos diwethaf, cyfarfu Mr Crabb â’r Rabi Michael Rose yn Synagog Unedig Caerdydd i drafod y bygythiad a wynebir yn sgil eithafiaeth ac i weld sut y gall Llywodraeth y DU weithio â sefydliadau i helpu i warchod pobl yng Nghymru. Hefyd, bu Mr Crabb mewn gwasanaeth aml-ffydd yn sir Benfro i nodi 70 mlynedd ers rhyddhau pobl o wersyll Auschwitz-Birkenau.
Dywedodd Gweinidog Swyddfa Cymru, Jenny Randerson:
Ar Ddiwrnod Cofio’r Holocost, rydym yn cofio dioddefaint a llofruddiaeth miliynau o Iddewon ac eraill a fu farw yn y getos ac yn y gwersylloedd lladd dan law’r Natsïaid.
Rhaid i ni gofio hefyd y bobl a ddioddefodd mewn achosion eraill o hil-laddiad ym mhob cwr o’r byd gan gynnwys y miloedd a laddwyd yng nghyflafan Srebrenica.
Mae’n rhaid i ni gofio’r digwyddiadau erchyll hyn er mwyn deall yn well beth sy’n gallu digwydd pan na fyddwn yn mynd i’r afael â chasineb a rhagfarn, ac yn gadael i gasineb ac anoddefgarwch ennill tir.
Dywedodd Gweinidog Swyddfa Cymru, Alun Cairns:
Wrth i ni goffáu Diwrnod Cofio’r Holocost a’r bobl sydd wedi dioddef ac wedi goroesi achosion o hil-laddiad ym mhob cwr o’r byd, mae’n bwysig ein bod yn cadw eu hanes yn fyw ac yn parhau i weithio i greu cymdeithas fwy cyfiawn.
Mae llawer o bobl wedi dianc rhag cael eu herlid ac wedi ymgartrefu yng Nghymru. Felly, mae dyletswydd ar bob un ohonom i sylweddoli bod gennym rôl i’w chwarae o ran meithrin goddefgarwch a dealltwriaeth ar draws ein cymunedau.
Mae’n hollbwysig bod y gwersi a ddysgwyd o’r Holocost yn cael eu dysgu heddiw ac i genedlaethau’r dyfodol er mwyn sicrhau na fydd hyn byth yn digwydd eto.