Datblygiad Wylfa Newydd yn cyrraedd carreg filltir allweddol
Asesiad o Adweithydd Dŵr Berw Uwch y DU yn symud i’r cam nesaf
Wylfa Power Station
Mae’r datblygiad arfaethedig o orsaf niwclear newydd ar Ynys Môn wedi cyrraedd carreg filltir allweddol arall, meddai Ysgrifennydd Gwladol Cymru, David Jones heddiw (6 Ionawr), wrth iddo gael ei gyhoeddi fod yr asesiad o adweithydd niwclear arloesol wedi symud ymlaen i’r cam nesaf.
Ar hyn o bryd cynigir Adweithydd Dŵr Berw Uwch y DU (ABWR y DU) ar gyfer ei ddefnyddio yn Wylfa Newydd ar Ynys Môn ac Oldbury yn Swydd Gaerloyw. Mae’r broses yn rhan hanfodol o’r Asesiad Dyluniad Generig (GDA) sy’n mynd rhagddo ar hyn o bryd i sicrhau fod yr adweithydd yn cwrdd â safonau diogelwch llym.
Mae Ysgrifennydd Gwladol Cymru, David Jones, wedi nodi fod y cyhoeddiad yn gam sylweddol ymlaen ar gyfer datblygiad Wylfa Newydd sydd i ddod yn ganolbwynt Ynys Ynni Ynys Môn.
Dywedodd Mr Jones:
Rwyf i’n bersonol yn ystyried datblygiad niwclear newydd yn Wylfa Newydd ac ymrwymiad y Llywodraeth hon i ddyfodol ar gyfer niwclear yn y DU yn bwysig iawn.
Fodd bynnag, mae’n gwbl gywir i ddyluniad arfaethedig unrhyw adweithydd i’w adeiladu yn y wlad hon fod yn destun asesiadau diogelwch llym dan arweiniad y rheoleiddwyr annibynnol. Rwy’n hynod falch i weld fod y broses hon yn symud ymlaen i ail gam yr asesiad.
Mae Hitachi-GE Nuclear Energy wedi nodi’r cyhoeddiad drwy lansio gwefan newydd yn benodol ar gyfer egluro technoleg yr adweithydd ac yn gwahodd sylwadau ar y dyluniad fel rhan o raglen ymgysylltu â’r cyhoedd a rhanddeiliaid.
Mae’r cwmni mawr o Siapan eisoes wedi nodi ei ddull gweithredu cychwynnol o ran defnyddio cyflenwyr lleol a hyfforddi gweithwyr lleol, gan weithio gyda Horizon Nuclear Power i gyflawni gwaddol economaidd hirdymor yng Ngogledd Cymru.
Yn ystod ei daith fasnach i Asia ym Mawrth 2013, ymwelodd yr Ysgrifennydd Gwladol â Hitachi City yn Tokyo i glywed sut yr oedd cynlluniau i adeiladu gorsafoedd newydd yn mynd rhagddynt.
Ymwelodd Mr Jones â gorsaf niwclear Ohma sydd wrthi’n cael ei hadeiladu ar hyn o bryd. Yno, cyfarfu â’r perchnogion a’r gweithredwyr, J-Power a aeth ag ef ar daith o gwmpas y safle lle gwelodd drosto’i hun adweithydd dŵr berw uwch yn cael ei adeiladu.
Yn ystod yr ymweliad, manteisiodd Mr Jones ar y cyfle i drafod y cyfoeth o gyfleoedd a fyddai ar gael yn y gadwyn gyflenwi i gwmnïau yn y DU yn ystod cyfnod adeiladu’r adweithyddion niwclear arfaethedig.
Ychwanegodd:
Mae gan Ynys Môn eisoes lawer o fanteision o ran adeiladu gorsaf niwclear newydd, yn nhermau sgiliau rhagorol gweithlu presennol Wylfa, a brwdfrydedd y prentisiaid ifanc yng Nghanolfan Ynni Coleg Menai yn Llangefni.
Mae’r manteision all ddeillio i fusnesau lleol, a busnesau ledled Cymru, o fuddsoddiad Hitachi-GE yn y DU yn ddi-ben-draw. Mae’r cwmni eisoes wedi dweud ei fod disgwyl y bydd oddeutu 60% o’r gadwyn gyflenwi a fydd yn gysylltiedig ag adeiladu’r gorsafoedd niwclear yn gwmnïau o’r DU.
Rhaid i fusnesau Cymreig yn awr fod yn barod i fanteisio ar y cyfleoedd gwych a gyflwynir gan Wylfa Newydd a defnyddio’r profiad y byddant yn ei ennill fel ffordd o gael mynediad at farchnadoedd eraill.
NODIADAU I OLYGYDDION
-
Disgwylir i fuddsoddiad Hitachi-GE mewn gorsaf niwclear newydd ddod â rhwng 5,000 a 6,000 o swyddi adeiladu i Ogledd Cymru, yn ogystal â hyd at 1,000 o gyfleoedd gwaith o ansawdd uchel, gyda chyflogau da, pan fydd y safle’n weithredol.
-
Ym mis Ionawr 2013, gofynnodd yr Adran Ynni a Newid Hinsawdd (DECC) i’r rheoleiddwyr niwclear gychwyn trafodaethau ffurfiol â Hitachi-GE Nuclear Energy, Ltd., (Hitachi-GE) ynghylch Asesiad Dyluniad Generig (GDA) o Adweithydd Dŵr Berwedig Uwch (ABWR) y DU.
-
Mae Asesiad Dyluniad Generig (GDA) yn cael ei gynnal ar yr Adweithydd Dŵr Berw Uwch, y dyluniad mwyaf modern o adweithydd niwclear sydd ar hyn o bryd yn cael ei weithredu’n fasnachol yn unrhyw le yn y byd. Mae pedwar ABWR eisoes wedi’u hadeiladu yn Siapan, ac mae tri arall wrthi’n cael ei hadeiladu yn Siapan a Thaiwan.
-
Cynhelir y broses Asesiad Dyluniad Generig (GDA) ar y cyd gan y Swyddfa Rheoleiddio Niwclear (ONR) ac Asiantaeth yr Amgylchedd. Cwblheir y broses drwy gyhoeddi Cadarnhad o Dderbyn Dyluniad (DAC) a Datganiad o Dderbynioldeb y Dyluniad (SODA).
-
Mae’r wefan yn rhoi trosolwg o ddyluniad yr adweithydd ac yn amlinellu rhai o’i nodweddion allweddol. Mae’r safle hefyd yn rhoi cyfle i gyflwyno sylwadau neu gwestiynau am ddyluniad yr adweithydd, neu ar y cyflwyniadau y mae Hitachi-GE wedi eu gwneud i’r rheoleiddwyr.