Taflen ffeithiau gwaith a ganiateir
Diweddarwyd 8 Ebrill 2024
© Hawlfraint y Goron 2024
Mae'r cyhoeddiad hwn wedi'i drwyddedu o dan delerau Trwydded Agored y Llywodraeth v3.0 ac eithrio ble nodir yn wahanol. I weld y drwydded hon, ewch i nationalarchives.gov.uk/doc/open-government-licence/version/3 neu ysgrifennwch at y Tîm Polisi Gwybodaeth, Yr Archifau Gwladol, Kew, Llundain TW9 4DU, neu anfonwch e-bost at: psi@nationalarchives.gov.uk.
Lle byddwn wedi nodi unrhyw wybodaeth am hawlfraint trydydd parti, bydd angen i chi gael caniatâd gan ddeiliaid yr hawlfraint dan sylw.
Mae'r cyhoeddiad hwn ar gael yn https://www.gov.uk/government/publications/employment-and-support-allowance-permitted-work-form/660c95aa-d8ef-430c-bc9c-ca1b627c6529
1. Beth yw gwaith a ganiateir?
Gall gwaith a ganiateir eich helpu i ddysgu sgiliau newydd, adeiladu eich hyder a dechrau meddwl am fathau o waith y gallech eu gwneud.
Os oes gennych anabledd, salwch, neu gyflwr iechyd efallai y gallwch wneud rhywfaint o waith a chadw eich taliadau a chredydau Yswiriant Gwladol am Lwfans Cyflogaeth a Chymorth (ESA).
Mae gwaith a ganiateir yn golygu y gallwch:
- gweithio am lai nag 16 awr yr wythnos
- ennill dim mwy na £183.50 bob wythnos, ar ôl didynnu treth ac Yswiriant Gwladol
- cael eich swm arferol o fudd-dal
- adeiladu eich sgiliau a’ch profiad
- cael eich cefnogi tra’ch bod yn gweithio - rydym yn galw hyn yn waith a ganiateir â chymorth.
Nid oes cyfyngiad ar nifer yr wythnosau y gallwch wneud gwaith a ganiateir neu waith a ganiateir â chymorth.
2. Gwaith a ganiateir â chymorth
Mae gwaith a ganiateir â chymorth i bobl sydd ag anabledd, salwch neu gyflwr iechyd na allant weithio mwy nag ychydig oriau bob wythnos. Goruchwylir y gwaith gan weithiwr cymorth proffesiynol. Gweithiwr cymorth proffesiynol yw rhywun sy’n gweithio i fudiad cyhoeddus neu wirfoddol.
3. Beth mae rhaid i chi ei wneud os ydych eisiau gweithio
Cyn i chi ddechrau unrhyw waith, mae rhaid i chi lenwi ffurflen gwaith a ganiateir PW1W a’i phostio i’r cyfeiriad ar frig unrhyw lythyrau ESA rydym wedi eu hanfon atoch. Peidiwch â mynd â’r ffurflen hon i’ch swyddfa Canolfan Byd Gwaith.
Os ydych yn credu bod y gwaith rydych am ei wneud yn waith a ganiateir â chymorth, mae rhaid i’ch gweithiwr cymorth proffesiynol lenwi ei adran ar y ffurflen gwaith a ganiateir PW1W.
Byddwn yn dweud wrthych os yw’r gwaith rydych am ei wneud yn bodloni amodau gwaith a ganiateir. Os ydych yn gwneud gwaith nad yw’n bodloni’r amodau, gallech golli’ch budd-dal.
Os na allwch ddweud wrthym cyn i chi ddechrau gweithio, bydd rhaid i chi lenwi ffurflen gwaith a ganiateir PW1W a’i hanfon yn ôl ar unwaith.
I gael copi o’r ffurflen gwaith a ganiateir PW1W, ewch i www.gov.uk a chwiliwch am PW1W neu ein ffonio ar 0800 169 0310.
Mae rhaid i chi ddweud wrth y Ganolfan Byd Gwaith ar unwaith am unrhyw waith rydych yn ei wneud. Os na wnewch hyn, efallai y telir gormod o ESA i chi. Efallai y bydd rhaid i chi dalu hwn yn ôl a thalu cosb hefyd.
4. Sut gall gwaith a ganiateir newid eich budd-daliadau eraill?
Os ydych yn cael budd-dal arall oherwydd nad ydych yn gweithio (er enghraifft Cymhorthdal Incwm, Budd-dal Tai neu Ostyngiad Treth y Cyngor), efallai y bydd eich budd-dal yn cael ei leihau neu ei atal os byddwch yn gwneud unrhyw waith. Siaradwch â’ch anogwr gwaith yn y Ganolfan Byd Gwaith cyn i chi ddechrau unrhyw waith.
Os ydych yn cael Budd-dal Tai neu Ostyngiad Treth y Cyngor a’ch bod yn ystyried dechrau gwaith a ganiateir, mae rhaid i chi siarad â’ch awdurdod lleol ar unwaith, oherwydd gallai’r swm a gewch newid.
I gysylltu â’ch awdurdod lleol ewch i www.gov.uk/find-local-council
5. Pam mae angen gwybodaeth bersonol ar DWP a sut rydym yn ei thrin
Rydym yn trin gwybodaeth bersonol yn ofalus. Gallwn ei ddefnyddio at unrhyw un o’n dibenion. I ddysgu mwy am hawliau gwybodaeth a sut rydym yn defnyddio gwybodaeth, ewch i www.gov.uk/dwp/siarter-gwybodaeth-bersonol.