Cadarnhau eich sefyllfa Treth Incwm yn derfynol
Sut i gyflwyno’ch Ffurflen Dreth Hunanasesiad wrth wirfoddoli i ddefnyddio’r cynllun Troi Treth yn Ddigidol ar gyfer Treth Incwm.
Unwaith eich bod chi wedi gwneud yr holl addasiadau i’ch incwm a threuliau busnes, bydd angen i chi gadarnhau eich sefyllfa o ran Treth Incwm yn derfynol am y flwyddyn.
Mae’n rhaid i chi anfon gwybodaeth at CThEF am y ffynonellau incwm personol sydd gennych, fel incwm o gynilion neu ddifidendau cyn cadarnhau’ch sefyllfa o ran Treth Incwm yn derfynol.
Unwaith y byddwch wedi rhoi gwybod i CThEF am eich holl incwm trethadwy am y flwyddyn, gallwch gyflwyno’ch Ffurflen Dreth derfynol.
Pan fyddwch yn cyflwyno’ch Ffurflen Dreth, byddwch yn datgan y canlynol:
- bod yr wybodaeth a roddwyd gennych yn gywir ac yn gyflawn
- eich bod chi wedi cadarnhau eich sefyllfa o ran Treth Incwm yn derfynol ar gyfer y flwyddyn dreth
Gallwch gyflwyno’ch Ffurflen Dreth derfynol trwy eich meddalwedd sy’n cydweddu â’r cynllun Troi Treth yn Ddigidol ar gyfer Treth Incwm os yw’r naill neu’r llall o’r canlynol yn wir:
- gallwch gyflwyno data ar eich holl ffynonellau incwm personol trwy eich meddalwedd
- nid oes gennych unrhyw ffynonellau incwm personol i’w datgan
Am weddill blwyddyn dreth 2024 i 2025 a blwyddyn dreth 2025 i 2026 sydd i ddod, ni fydd modd i chi ddefnyddio’ch cyfrif ar gyfer gwasanaethau ar-lein CThEF i gyflwyno’ch ffynonellau incwm personol. Mae hyn er mwyn ein helpu ni i brofi beth yw’r dyluniad gorau i gwsmeriaid.
Os nad yw’ch meddalwedd yn cefnogi cyflwyno’ch ffynonellau incwm personol ar hyn o bryd, dylech wirio a fydd darparwr y feddalwedd yn ychwanegu’r gallu hwn at eich meddalwedd sy’n cydweddu.
Os na fydd yn gwneud hynny, gallwch wneud y naill neu’r llall o’r canlynol:
-
dewis meddalwedd ychwanegol neu feddalwedd arall sy’n cydweddu a fydd yn cefnogi cyflwyno’ch ffynonellau incwm personol
-
cysylltu â Gwasanaeth Cwsmeriaid Cymraeg CThEF am arweiniad
Mae’n rhaid i chi gyflwyno’ch Ffurflen Dreth derfynol erbyn 31 Ionawr yn dilyn diwedd y flwyddyn dreth berthnasol. Os byddwch yn methu’r dyddiad cau ar gyfer cyflwyno, yna byddwch yn agored i bwynt cosb am gyflwyno’n hwyr. Unwaith eich bod chi wedi cyrraedd trothwy nifer y pwyntiau cosb, yna daw’r gosb yn un ariannol.
Yna, bydd yr wybodaeth a ddarperir yn cael ei defnyddio i gynhyrchu eich bil treth Hunanasesiad terfynol ar gyfer y flwyddyn dreth honno.
Os na fyddwch yn talu’ch bil treth Hunanasesiad erbyn y dyddiad cau perthnasol, efallai y bydd angen i chi dalu cosb am dalu’n hwyr. Ni fydd y cynllun Troi Treth yn Ddigidol ar gyfer Treth Incwm yn newid y ffordd rydych yn talu treth na’r dyddiadau cau ar gyfer taliadau.