Is-sistema tar-Renju Unit ta' immigrazzjoni bbażata fuq il-punti: Introduzzjoni għaċ-ċittadini tal-UE

Question

Accepted Answer

Find out about what you’ll need to do before you leave for the UK because of coronavirus (COVID-19).

Ħarsa Ġenerali

Ir-Renju Unit ħareġ mill-Unjoni Ewropea fil-31 ta’ Jannar 2020.

Jekk int ma kontx residenti fir-Renju Unit qabel il-31 ta’ Diċembru 2020 u m’għandekx drittijiet taħt il-Ftehim dwar il-Ħruġ, tkun teħtieġ tissodisfa rekwiżiti speċifiċi sabiex taħdem jew tistudja fir-Renju Unit mill-1 ta’ Jannar 2021. Teħtieġ ukoll tgħaddi minn verifiki rilevanti, inklużi verifiki tar-Renju Unit dwar kriminalità. Tista’ tkompli żżur ir-Renju Unit għal massimu ta’ 6 xhur mingħajr ma tapplika għal viża u tista’ tieħu sehem f’firxa wiesgħa ta’ attivitajiet, inkluż għat-turiżmu, biex iżżur lill-familja u l-ħbieb, għal studju fuq terminu qasir u attivitajiet relatati man-negozju, bħal avvenimenti u konferenzi. Il-lista sħiħa ta’ attivitajiet permessi għall-viżitaturi hija disponibbli fuq GOV.UK.

L-istatus taċ-ċittadini Irlandiżi jibqa’ protett bħala parti mill-arranġamenti taż-Żona Komuni għall-Ivvjaġġar. Għaldaqstant, iċ-ċittadini Irlandiżi ma jeħtiġux permess biex jiġu fir-Renju Unit (ħlief f’numru ta’ ċirkostanzi limitat ħafna), u b’riżultat ta’ dan, mhumiex eliġibbli biex japplikaw taħt is-sistema l-ġdida ta’ immigrazzjoni bbażata fuq il-punti.

Innota li “ċittadini tal-UE” msemmija f’din il-gwida għandha tinftiehem li tinkludi ċittadini tal-UE, taż-ŻEE u tal-Iżvizzera.

EU Settlement Scheme

Jekk kont residenti fir-Renju Unit sal-31 ta’ Diċembru 2020, int u l-familja tiegħek għandkom tapplikaw għall-EU Settlement Scheme biex tkomplu tgħixu fir-Renju Unit wara t-30 ta’ Ġunju 2021. Id-data ta’ skadenza biex tapplika hija t-30 ta’ Ġunju 2021.

Kif tapplika permezz tas-sistema ta’ immigrazzjoni bbażata fuq il-punti

Jekk eliġibbli, għandek tibda l-applikazzjoni tiegħek fuq GOV.UK. Tkun teħtieġ turi li tissodisfa l-kriterji rilevanti u tikseb l-għadd ta’ punti meħtieġa għall-viża li qed tapplika għaliha. Hemm gwida dettaljata disponibbli għal kull rotta fuq GOV.UK.

Bħala parti mill-applikazzjoni tiegħek, teħtieġ tivverifika l-identità tiegħek. Il-biċċa l-kbira tan-nies jistgħu jagħmlu dan permezz ta’ smartphone, permezz tal-app “UK Immigration: ID Check”, bħala parti mill-applikazzjoni online. Dawn li ma jistgħux jużaw l-app “UK Immigration: ID Check” ikunu meħtieġa jattendu Ċentru għall-Applikazzjonijiet għal Viża (Visa Application Centre). Hemm aktar informazzjoni disponibbli dwar il-proċess tal-applikazzjoni fuq GOV.UK.

Tkun teħtieġ tħallas miżata tal-applikazzjoni u, jekk se tiġi fir-Renju Unit għal aktar minn 6 xhur, jista’ jkun li jkollok tħallas il-Ħlas Addizzjonali tal-Immigrazzjoni għall-Kura tas-Saħħa (Immigration Health Surcharge), biex tkun tista’ taċċessa s-Servizz tas-Saħħa Nazzjonali (NHS) tar-Renju Unit.

Iż-żminijiet għall-ipproċessar tal-applikazzjonijiet ivarjaw skont il-viża li qed tapplika għaliha u s-servizz disponibbli. Għandek tapplika u tirċievi konferma li rnexxielek qabel ma tivvjaġġa lejn ir-Renju Unit.

Sabiex taħdem fir-Renju Unit

Viża għal Ħaddiem b’Ħiliet (Skilled Worker visa)

Biex tkun eliġibbli għar-rotta ta’ Ħaddiem b’Ħiliet, trid turi:

li għandek offerta tax-xogħol minn sponsor liċenzjat mill-Home Office fil-livell ta’ ħila meħtieġ
li se titħallas il-limitu bażi tas-salarju minimu rilevanti mill-isponsor tiegħek (normalment £25,600 jew ir-rata attwali għall-impjieg partikolari tagħhom, skont liema hija l-ogħla)
li taf titkellem bl-Ingliż f’livell intermedju ta’ B1 (abbażi tal-Qafas Komuni Ewropew ta’ Referenza għal-Lingwi)

Applika għal visa għal Ħaddiem b’Ħiliet fuq GOV.UK.

Xogħol b’Ħiliet: viża għas-Saħħa u l-Kura (Health and Care visa)

Jekk int taħdem f’okkupazzjoni tas-saħħa eliġibbli u għandek offerta tax-xogħol mill-NHS, mis-settur tal-kura soċjali jew minn impjegaturi u organizzazzjonijiet li jipprovdu servizzi lill-NHS, taf titkellem bl-Ingliż u tissodisfa l-kriterji tar-rotta għal Ħaddiem b’Ħiliet, tista’ tapplika għal viża għas-Saħħa u l-Kura biex tiġi fir-Renju Unit mal-familja tiegħek.

Hemm dħul rapidu, b’miżati tal-applikazzjoni mraħħsin u appoġġ apposta permezz tal-proċess tal-applikazzjoni. Jekk int eliġibbli biex tapplika għal Viża għas-Saħħa u l-Kura, int eżenti wkoll milli tħallas il-Ħlas Addizzjonali tal-Immigrazzjoni għall-Kura tas-Saħħa. Ħaddiema fruntaliera fis-settur tas-saħħa u l-kura soċjali li mhumiex eliġibbli biex japplikaw għall-Viża għas-Saħħa u l-Kura jkollhom iħallsu l-Ħlas Addizzjonali tal-Immigrazzjoni għall-Kura tas-Saħħa u jistgħu jibbenefikaw minn skema ta’ rimborż fejn jitħallsu lura.

Applika għal viża għas-Saħħa u l-Kura fuq GOV.UK.

Talent Globali

Il-viża għal Talent Globali (Global Talent visa) tippermetti lil dawk b’ħiliet ta’ livell għoli ħafna biex jiġu fir-Renju Unit mingħajr offerta għal xogħol. Din il-viża hija maħsuba għal mexxejja rikonoxxuti, u l-mexxejja ta’ għada fix-xjenza, ix-xjenzi umanistiċi, l-inġinerija, l-arti (inkluż films, disinn tal-moda u arkitettura) u t-teknoloġija diġitali, fejn il-ħiliet uniċi tal-individiwi jarrikkixxu l-għarfien, l-ekonomija u s-soċjetà tar-Renju Unit. L-aqwa xjentisti u riċerkaturi jibbenefikaw minn proċess ta’ approvazzjoni aktar rapidu bħala parti minn skema STEM rapida.

Applika għal viża għal Talent Globali fuq GOV.UK.

Rotot alternattivi għal viża tax-xogħol u okkupazzjonijiet speċjalizzati

Hemm firxa ta’ rotot għal viża oħrajn disponibbli biex taħdem fir-Renju Unit, bħal viżi għal Start-up u Innovaturi (Start-up and Innovator visas). Hemm ukoll rotot għal viża għal okkupazzjonijiet aktar speċjalizzati, inklużi ministri tar-reliġjon, persuni sportivi u persuni kreattivi.

Sabiex tistudja fir-Renju Unit

Rotta għall-Istudenti (Student Route)

Biex tkun eliġibbli għar-rotta għall-istudenti, teħtieġ turi:

li ġejt offrut post fuq kors minn sponsor tal-Istudenti liċenzjat mill-Home Office
li kapaċi titkellem, taqra, tikteb u tifhem bl-Ingliż
li għandek biżżejjed flus biex tappoġġja lilek innifsek u tħallas għall-kors tiegħek
li ġenwinament għandek l-intenzjoni li tistudja fir-Renju Unit Hemm rotta għal Studenti Tfal (Child Student route) separata għal studenti tfal li għandhom bejn 4 u 17-il sena li jixtiequ jistudjaw fi skola indipendenti.

Tista’ tapplika għal Viża għall-Istudenti (Student visa) fuq GOV.UK.

Viża għall-Gradwati (Graduate visa)

Jekk jirnexxielek tlesti lawrea f’livell ta’ Baċellerat jew ogħla fir-Renju Unit, tkun tista’ tapplika għal viża għall-Gradwati biex tgħix u taħdem, jew biex tfittex xogħol, għal perjodu massimu ta’ sentejn (3 snin għal studenti tal-PhD) wara li tlesti l-istudji tiegħek.

Il-viża għall-Gradwati se tiftaħ fis-sajf 2021 għall-istudenti internazzjonali li kienu sponsorjati minn sponsor tal-Istudenti liċenzjat mill-Home Office li għandu rekord tajjeb ta’ konformità mar-rekwiżiti tal-immigrazzjoni tal-Gvern tar-Renju Unit.