Cofrestru tir neu eiddo gyda Chofrestrfa Tir EF

Skip contents

Diweddaru neu gywiro’r gofrestr

Rhaid ichi ddweud wrth Gofrestrfa Tir EF os yw unrhyw beth yn y gofrestr yn newid neu’n anghywir.

Diweddaru neu gywiro cyfeiriadau cysylltu

Gallwch gofrestru hyd at 3 chyfeiriad (gan gynnwys cyfeiriadau ebost a chyfeiriadau heb fod yn y DU) gyda Chofrestrfa Tir EF ar gyfer pob eiddo.

I newid eich manylion cysylltu, neu fanylion perchnogion neu asiantau eraill, anfonwch gais i ddiweddaru cyfeiriad cyswllt perchnogion cofrestredig. Nid oes yn rhaid ichi dalu unrhyw beth i wneud hyn.

Newid eich enw

Rhaid ichi anfon cais i newid y gofrestr i Gofrestrfa Tir EF os ydych yn newid eich enw. Nid oes yn rhaid ichi dalu unrhyw beth i wneud hyn.

Mae’r ffordd rydych yn gwneud cais yn dibynnu ar y dogfennau y gallwch eu hanfon sy’n profi bod eich enw wedi newid. Caiff unrhyw dystysgrifau swyddogol a anfonwch eu dychwelyd atoch ar ôl i’r gofrestr gael ei diweddaru.

Defnyddiwch ffurflen gais AP1 os oes unrhyw un o’r dogfennau canlynol gennych:

  • copi swyddogol neu ardystiedig o dystysgrif sy’n dangos y newid enw, er enghraifft tystysgrif priodas neu bartneriaeth sifil
  • copi o weithred newid enw
  • datganiad o wirionedd
  • datganiad statudol wedi ei dyngu gerbron rhywun sy’n gallu cymryd llw

Rhaid ichi hefyd anfon prawf ychwanegol os nad ydych yn anfon tystysgrif neu os ydych yn defnyddio trawsgludwr (er enghraifft cyfreithiwr). Pan fyddwch yn anfon ffurflen AP1, dylech gynnwys:

  • ffurflen cadarnhau hunaniaeth wedi ei llenwi yn eich enw newydd
  • copi o ddogfen swyddogol yn eich enw blaenorol, er enghraifft pasbort, trwydded yrru neu fil cyfleustodau

Os ydych wedi newid eich rhywedd

Defnyddiwch ffurflen gais CNG os oes unrhyw un o’r dogfennau canlynol gennych:

  • tystysgrif cydnabod rhywedd
  • tystysgrif geni newydd
  • llythyr gan ymarferydd meddygol sy’n gweithio yn y DU (er enghraifft meddyg) yn cadarnhau eich bod wedi newid eich rhywedd

Anfonwch y ffurflen wedi ei llenwi ac un o’r dogfennau i’r cyfeiriad ar y ffurflen. Rhaid ichi anfon dogfennau gwreiddiol, nid copïau.

Os ydych yn anfon tystysgrif cydnabod rhywedd, ysgrifennwch ‘Preifat a chyfrinachol’ ar yr amlen.

Dychwelyd i’ch cyfenw gwreiddiol

I ddychwelyd i’ch cyfenw gwreiddiol ar ôl ysgariad neu ddiddymu partneriaeth sifil, anfonwch y canlynol i Gofrestrfa Tir EF:

Bydd Cofrestrfa Tir EF yn rhoi gwybod ichi os oes angen rhagor o wybodaeth arni.

Atal eich enw blaenorol rhag cael ei weld ar hen ddogfennau

Bydd eich enw blaenorol yn parhau i gael ei ddangos ar unrhyw ddogfennau a gafodd eu cwblhau gyda Chofrestrfa Tir EF cyn ichi newid eich enw. Ni ellir newid enwau blaenorol ond efallai y gallech eu hatal rhag cael eu copïo neu eu harchwilio trwy wneud cais i eithrio dogfen.

Y gost yw:

  • £12 y ddogfen ar gyfer ceisiadau electronig – dim ond busnesau a sefydliadau all wneud cais electronig, er enghraifft trawsgludwyr
  • £25 y ddogfen ar gyfer ceisiadau papur

Bydd yn rhaid ichi lenwi ffurflen EX1 a ffurflen EX1A.

Cwblhau morgais

Rhaid ichi ddweud wrth Gofrestrfa Tir EF os yw morgais ar eiddo cofrestredig wedi cael ei dalu (‘ei ryddhau’).

Fel arfer, bydd eich rhoddwr benthyg morgais yn gwneud hyn ichi yn awtomatig ond efallai y bydd yn anfon ffurflen ‘dileu arwystlon’ wedi ei llenwi atoch.

Pan fydd y ffurflen gennych, llenwch gais i ‘ddileu cofnodion yn ymwneud ag arwystlon’ a ffurflen cadarnhau hunaniaeth.

Anfonwch yr holl ffurflenni i’r Ganolfan Dinasyddion.

Bydd Cofrestrfa Tir EF yn diweddaru eich manylion ac yn dweud wrthych fod y gofrestr wedi cael ei diweddaru.

Newidiadau eraill

Trosglwyddo perchnogaeth eich eiddo os ydych:

  • wedi ei werthu
  • wedi ysgaru neu wahanu ac am dynnu perchennog i ffwrdd
  • wedi priodi ac am ychwanegu perchennog
  • wedi rhoi’r eiddo i rywun arall

Anfon eich ceisiadau

Anfonwch ffurflenni wedi eu llenwi i Ganolfan Dinasyddion Cofrestrfa Tir EF.

HM Land Registry
Citizen Centre
PO Box 74
Gloucester
GL14 9BB

Argraffu'r canllaw cyfan