Cofrestru tir neu eiddo gyda Chofrestrfa Tir EF

Cofrestru am y tro cyntaf

Rhaid i dir neu eiddo gael ei gofrestru am y tro cyntaf os yw’n ddigofrestredig pan fyddwch yn cymryd perchnogaeth ohono neu’n ei forgeisio.

Hyd yn oed os nad oes yn rhaid ichi gofrestru, mae cofrestru’n wirfoddol:

yn rhoi prawf o berchnogaeth ichi
yn helpu i warchod eich tir rhag twyll
yn ei gwneud yn haws i newid, gwerthu neu roi eich eiddo i rywun arall yn y dyfodol

Gallwch gofrestru eiddo eich hunan neu gael cyfreithiwr neu drawsgludwr i wneud hynny ichi.

Chwiliwch y gofrestr i wneud yn siwr nad yw’ch eiddo’n gofrestredig eisoes. Rhaid ichi drosglwyddo perchnogaeth o eiddo cofrestredig.
Gwnewch gais am chwiliad o’r Adran Pridiannau Tir i chwilio yn erbyn yr holl berchnogion blaenorol er 1925. Bydd yr Adran Pridiannau Tir yn anfon y canlyniadau atoch.
Cwblhewch gais am gofrestriad cyntaf.
Paratowch gynllun wrth raddfa yn dangos ble mae’r tir wedi’i amlinellu os nad yw wedi’i ddangos yn y gweithredoedd.
Dewiswch y ffurflenni y mae eu hangen arnoch yn dibynnu ar eich amgylchiadau a llenwch 2 gopi o’r ffurflen rhestr o ddogfennau.
Dewiswch y ffi gofrestru gywir – mae hyn yn dibynnu ar werth eich eiddo.
Anfonwch eich dogfennau, ffurflenni a’r ffi i Gofrestrfa Tir EF.

Dylech gynnwys yr un ffurflenni ag a ddefnyddir wrth gofrestru am y tro cyntaf a ffurflen ‘trosglwyddo teitl cofrestredig cyfan’.

Dylech gynnwys yr un ffurflenni ag a ddefnyddir wrth gofrestru am y tro cyntaf a chynnwys naill ai:

ffurflen ‘cydsynio i deitl cofrestredig cyfan’ wedi’i llenwi – rhaid i’r ysgutor lenwi’r ffurflen hon os oedd yr eiddo yn enw unig berchennog cofrestredig ac mae wedi cael ei adael ichi mewn ewyllys
ffurflen ‘trosglwyddo teitl cofrestredig cyfan’ wedi’i llenwi – rhaid i’r perchennog sy’n goroesi lenwi’r ffurflen hon os oedd yn gydberchennog ac rydych yn etifeddu cyfran o’r eiddo

Cysylltwch â Chofrestrfa Tir EF os nad ydych yn siwr pa ffurflen y mae ei hangen arnoch.

Efallai y bydd angen ichi anfon y canlynol hefyd:

ffurflen ‘prawf hunaniaeth’ os nad ydych yn weithiwr proffesiynol cyfreithiol, ee trawsgludwr
ffurflen ‘buddion datgeladwy’ os oes buddion digofrestredig yn yr eiddo sydd heb eu nodi yn y gweithredoedd (ee prydles tymor byr neu hawl meddiannaeth) – darllenwch y cyfarwyddyd manwl ar hawliau digofrestredig gan Gofrestrfa Tir EF
tystysgrif Ffurflen Trafodiad Tir gan CThEF os ydych wedi talu Toll Stamp
copi ardystiedig o’r brydles, os ydych yn gwneud cais i gofrestru tir neu eiddo prydlesol