Anfon diweddariadau chwarterol
Sut a phryd i anfon diweddariad-au chwarterol, yn seiliedig ar eich cyfnod cyfrifyddu.
Bob 3 mis, bydd eich meddalwedd sy’n cydweddu yn adio’ch cofnodion digidol at ei gilydd i greu cyfansymiau ar gyfer pob categori incwm a threuliau. Gelwir y crynodebau hyn yn ddiweddariadau chwarterol.
Ar ôl cyflwyno diweddariad, byddwch yn gallu gweld amcangyfrif o’ch bil treth ar gyfer incwm eich busnes yn eich meddalwedd sy’n cydweddu.
Nid oes angen i chi wneud unrhyw addasiadau cyfrifyddu na threth cyn anfon diweddariad, ond mae croeso i chi wneud os hoffech i’ch bil treth amcangyfrifedig fod yn gywirach.
Os ydych wedi dewis cadw cofnodion digidol o ffynonellau incwm personol yn eich meddalwedd, efallai y byddwch yn gallu rhoi gwybod amdanynt yn ystod y flwyddyn dreth ond ni fyddant yn cael eu cynnwys yn eich diweddariadau chwarterol.
Ar ôl i’ch meddalwedd sy’n cydweddu cael ei hawdurdodi, bydd angen i chi anfon diweddariadau atom ar gyfer pob ffynhonnell incwm busnes bob 3 mis. Bydd eich meddalwedd yn rhoi gwybod i chi bryd a sut i anfon diweddariadau.
Gallwch anfon diweddariadau yn amlach – er enghraifft, os ydych am ddeall sut mae derbyniadau neu dreuliau busnes sylweddol yn effeithio ar eich bil treth amcangyfrifedig. Bydd y rhan fwyaf o feddalwedd sy’n cydweddu yn caniatáu i chi anfon diweddariad ar unrhyw ddiwrnod.
Os nad ydych yn disgwyl y bydd gennych unrhyw drafodion ychwanegol i’w cofnodi, gallwch anfon diweddariad hyd at 10 diwrnod cyn diwedd y cyfnod diweddaru. Er enghraifft, os ydych yn mynd ar wyliau ac yn gwybod na fyddwch yn gweithio am weddill y cyfnod.
Ar ôl i bob cyfnod o 3 mis ddod i ben, mae angen i chi anfon eich diweddariad cyn pen mis. Os na fyddwch yn ei anfon erbyn y dyddiad cau hwn, efallai y bydd yn rhaid i chi dalu cosb am gyflwyno’n hwyr. Nid yw’r cosbau hyn yn berthnasol yn ystod y cyfnod profi.
Mae hyn yn golygu, yn ystod y cyfnod profi, gallwch gofrestru ran o’r ffordd drwy’r flwyddyn dreth a ni chodir unrhyw gosbau arnoch am gyflwyno diweddariadau chwarterol ar ôl y dyddiadau cau. Gallwch ddarllen rhagor am ‘dal i fyny’ yn adran ‘Rhagarweiniad’ yr arweiniad hwn.
Mae’r cyfnodau diweddaru safonol yn seiliedig ar y flwyddyn dreth, a rhoddir y dyddiadau cau yn y tabl canlynol.
| Cyfnod diweddaru | Dyddiad cau diweddaru |
|---|---|
| 6 Ebrill hyd at 5 Gorffennaf | 5 Awst |
| 6 Gorffennaf hyd at 5 Hydref | 5 Tachwedd |
| 6 Hydref hyd at 5 Ionawr | 5 Chwefror |
| 6 Ionawr hyd at 5 Ebrill | 5 Mai |
Fel arall, gallwch ddewis defnyddio cyfnodau diweddaru calendr sy’n dod i ben ar ddiwrnod olaf y mis. Gall hyn wneud cadw cofnodion yn haws i chi os nad yw’ch cyfnod cyfrifyddu yn cyd-fynd â’r flwyddyn dreth.
Mae’n rhaid i chi ddewis cyfnodau diweddaru calendr yn eich meddalwedd sy’n cydweddu cyn i’r diweddariad cyntaf gael ei wneud.
Bydd angen i chi fodloni’r un dyddiadau cau â chyfnodau diweddaru safonol.
Bydd cyfnodau diweddaru calendr yn parhau i fod yn berthnasol oni bai eich bod yn penderfynu newid yn ôl i gyfnodau diweddaru safonol.
Os byddwch yn dewis dychwelyd i gyfnodau diweddaru safonol, mae angen i chi ddewis cyfnodau diweddaru safonol yn eich meddalwedd sy’n cydweddu cyn i’r diweddariad cyntaf gael ei wneud ar gyfer y flwyddyn dreth.
| Cyfnod diweddaru | Dyddiad cau diweddaru |
|---|---|
| 1 Ebrill i 30 Mehefin | 5 Awst |
| 1 Gorffennaf i 30 Medi | 5 Tachwedd |
| 1 Hydref i 31 Rhagfyr | 5 Chwefror |
| 1 Ionawr i 31 Mawrth | 5 Mai |
Ar ôl i chi gyflwyno’ch diweddariad chwarterol terfynol ar gyfer y flwyddyn dreth, dylech wirio a oes angen i chi wneud unrhyw addasiadau i’ch incwm busnes.