Dechrau arni
Sut i ddewis y feddalwedd rydych am ei defnyddio a chofrestru.
Cyn ui chi allu defnyddio’r cynllun Troi Treth yn Ddigidol ar gyfer Treth Incwm, mae angen i chi sicrhau eich bod yn gymwys i gofrestru’n wirfoddol eleni. Mae angen i chi hefyd benderfynu pa feddalwedd rydych am ei defnyddio.
Bydd eich asiant (os oes gennych un) yn gallu gwneud llawer o hyn i chi.
Mae’n rhaid i chi wirio a ydych yn gymwys i’n helpu gyda phrofi’r cynllun Troi Treth yn Ddigidol ar gyfer Treth Incwm.
Pan fyddwch yn cofrestru, gofynnir rhai cwestiynau i chi. Bydd hyn yn cadarnhau a allwch wirfoddoli i’n helpu i brofi a datblygu’r gwasanaeth.
Mae’n rhaid i chi ddefnyddio meddalwedd sy’n cydweddu â’r cynllun Troi Treth yn Ddigidol ar gyfer Treth Incwm.
Mae yna nifer o ddarparwyr meddalwedd trydydd parti y gallwch ddewis ohonynt.
Gallwch awdurdodi asiant i weithredu ar eich rhan ar gyfer unrhyw wasanaeth Troi Treth yn Ddigidol. Unwaith y bydd eich asiant wedi’i awdurdodi, bydd yn gallu gwneud y canlynol:
- cofrestru’ch busnes
- defnyddio meddalwedd i greu a chadw cofnodion digidol ar eich rhan
- defnyddio meddalwedd i weld, golygu ac anfon eich data atom
Os ydych eisoes wedi awdurdodi’ch asiant i weithredu ar eich rhan ar gyfer Hunanasesiad, ni fydd angen i chi ei ailawdurdodi ar gyfer y cynllun Troi Treth yn Ddigidol ar gyfer Treth Incwm.
Os ydych am gofrestru’n wirfoddol i helpu i brofi’r gwasanaeth ym mlwyddyn dreth 2024 i 2025, dylech geisio cofrestru rhwng mis Ebrill a mis Mehefin 2024. Mae hyn yn golygu y gallwch brofi’r gwasanaeth am gylchred treth lawn cyn iddo ddod yn orfodol.
Mae’n dal i fod yn bosibl cofrestru yn ddiweddarach yn y flwyddyn os ydych wedi bod yn cadw cofnodion digidol a gallwch gyflwyno diweddariadau chwarterol yn ôl-weithredol.
Mae sut i gofrestru yn dibynnu a ydych yn unigolyn neu’n asiant:
- os ydych yn unigolyn, cofrestrwch ar gyfer y cynllun Troi Treth yn Ddigidol ar gyfer Treth Incwm
- os ydych yn asiant, cofrestrwch eich cleient ar gyfer y cynllun Troi Treth yn Ddigidol ar gyfer Treth Incwm (yn agor tudalen Saesneg)
Os oes gennych fwy nag un busnes
Mae’n rhaid i chi ddefnyddio’r cynllun Troi Treth yn Ddigidol ar gyfer Treth Incwm ar gyfer pob masnach a busnes (er enghraifft, os ydych yn landlord ac yn adeiladwr).
Mae’n rhaid i chi hefyd gadw cofnodion ar wahân a gwneud cyflwyniadau ar wahân ar gyfer pob busnes.
Os ydych yn cael incwm o eiddo gan fwy nag un eiddo, bydd pob eiddo sydd:
- yn y DU yn cael ei drin fel un ‘busnes eiddo yn y DU’
- y tu allan i’r DU yn cael ei drin fel un ‘busnes eiddo tramor’
Os ydych chi’n berchen ar eiddo dramor mewn mwy nag un wlad
Mae angen i chi gadw cofnodion digidol ar wahân ar gyfer pob gwlad rydych chi’n cael incwm o eiddo ohoni.
Mae angen i chi awdurdodi’ch meddalwedd sy’n cydweddu drwy nodi’ch Dynodydd Defnyddiwr (ID) a’ch cyfrinair ar gyfer Porth y Llywodraeth yn eich meddalwedd a dilyn y cyfarwyddiadau. Gallwch ofyn i’ch darparwr meddalwedd sut i wneud hyn.
Mae’n rhaid i chi ddefnyddio’r ID Defnyddiwr ar gyfer Porth y Llywodraeth a gawsoch pan wnaethoch gofrestru ar gyfer y naill neu’r llall o’r canlynol:
- Hunanasesiad
- cyfrif gwasanaethau asiant, os ydych yn asiant
Mae angen i chi ailwneud y broses awdurdodi meddalwedd bob 18 mis. Dylai’ch meddalwedd eich atgoffa chi i wneud hyn.