Gwneud cais ar-lein am Lwfans Priodasol

Mae’r Lwfans Priodasol yn gadael i chi drosglwyddo £1,260 o’ch Lwfans Personol i’ch gŵr, eich gwraig neu’ch partner sifil. Mae gwneud cais am Lwfans Priodasol yn rhad ac am ddim.

Gall hyn ostwng treth eich priod neu bartner sifil hyd at £252 bob blwyddyn dreth (6 Ebrill i 5 Ebrill y flwyddyn nesaf).

Gallwch elwa o’r Lwfans Priodasol os yw pob un o’r canlynol yn gymwys:

rydych yn briod neu mewn partneriaeth sifil
nid ydych yn talu Treth Incwm neu mae’ch incwm o dan eich Lwfans Personol (fel arfer £12,570)
mae’ch partner yn talu Treth Incwm ar y gyfradd sylfaenol, sydd fel arfer yn golygu bod incwm eich partner rhwng £12,571 a £50,270 cyn iddo gael Lwfans Priodasol

Gallwch ddarllen rhagor am sut i wneud cais a’r hyn sy’n digwydd nesaf.

Gallwch ôl-ddyddio’ch hawliad i gynnwys unrhyw flwyddyn dreth ers 5 Ebrill 2020 pan oeddech yn gymwys i gael y Lwfans Priodasol. Os bu farw eich partner ers hynny, gallwch hawlio o hyd – ffoniwch Wasanaeth Cwsmeriaid Cymraeg CThEF.

Os ganed o leiaf un ohonoch cyn 6 Ebrill 1935, efallai y byddwch yn talu llai o dreth fel pâr drwy wneud cais am Lwfans Pâr Priod yn hytrach na Lwfans Priodasol.

Mae’r gwasanaeth hwn hefyd ar gael yn Saesneg.

Cyn i chi wneud cais

Bydd angen eich rhif Yswiriant Gwladol a rhif Yswiriant Gwladol eich partner arnoch er mwyn defnyddio’r gwasanaeth hwn.

Os ydych wedi dod i’r DU, ac nad ydych yn bwriadu gweithio nac astudio, ni allwch gael rhif Yswiriant Gwladol. I wneud cais am Lwfans Priodasol, ffoniwch Wasanaeth Cwsmeriaid Cymraeg CThEF.

Bydd angen i chi fewngofnodi er mwyn defnyddio’r gwasanaeth hwn. Os nad oes gennych fanylion mewngofnodi eisoes, byddwch yn gallu eu creu.

Cewch wybod pan rydych yn mewngofnodi a oes angen i chi brofi pwy ydych. Mae hyn er mwyn cadw’ch manylion yn ddiogel ac, fel arfer, bydd angen i chi ddefnyddio ID ffotograffig fel pasbort neu drwydded yrru i wneud hynny.