Cael help ariannol gyda thâl statudol
Os na allwch fforddio gwneud taliadau
Gallwch wneud cais am daliad ymlaen llaw gan Gyllid a Thollau EF (CThEF) os na allwch fforddio gwneud taliadau statudol.
Sut i wneud cais am daliad ymlaen llaw
Gwnewch gais ar-lein i gael taliad ymlaen llaw (yn agor tudalen Saesneg) ar gyfer:
- Tâl Mamolaeth Statudol (SMP)
- Tâl Tadolaeth Statudol
- Tâl Mabwysiadu Statudol
- Tâl Statudol ar y Cyd i Rieni (ShPP)
Gallwch wneud cais hyd at 4 wythnos cyn y dyddiad yr hoffech gael y taliad cyntaf – os byddwch yn gwneud cais yn gynharach, efallai y bydd CThEF yn anfon eich cais yn ôl atoch.
Mae ffordd wahanol o wneud cais am daliad ymlaen llaw ar gyfer Tâl Statudol Rhieni mewn Profedigaeth.
Gellir codi cosb arnoch (o hyd at £3,000 y cyflogai ar gyfer pob blwyddyn dreth) os ydych yn cynnwys gwybodaeth anghywir yn eich cais.
Ad-dalu’ch taliad ymlaen llaw
Anfonwch Grynodeb o Daliadau’r Cyflogwr (yn agor tudalen Saesneg) (EPS) ar gyfer pob cyfnod cyflog rydych yn adennill taliadau statudol – hyd yn oed os cawsoch daliad ymlaen llaw gan CThEF er mwyn talu taliadau statudol i’ch cyflogeion.
Os yw’r taliadau statudol rydych yn eu hadennill yn fwy na’ch didyniadau TWE ar gyfer y mis hwnnw, bydd CThEF yn defnyddio’n awtomatig yr hyn sy’n weddill i ostwng yr hyn sy’n ddyledus gennych ar eich taliad ymlaen llaw.
Enghraifft
Mae gennych £2,500 mewn didyniadau TWE i’w talu ar ôl anfon eich Cyflwyniad Taliadau Llawn (yn agor tudalen Saesneg) (FPS).
Rydych yn adennill £3,000 mewn taliadau statudol yn eich Crynodeb o Daliadau’r Cyflogwr.
Bydd eich taliad ymlaen llaw yn gostwng £500 (£3,000 llai £2,500).
Ar ddiwedd y cyfnod y mae’r taliad ymlaen llaw yn ei gwmpasu, os oes arnoch unrhyw beth i CThEF o hyd, talwch CThEF erbyn dyddiad talu arferol y mis hwnnw.
Cyllid ymlaen llaw ar gyfer blynyddoedd treth blaenorol
I wneud cais am gyllid ymlaen llaw ar gyfer taliad statudol sy’n ymwneud â blwyddyn dreth flaenorol nad ydych wedi’i dalu eto, ysgrifennwch i CThEF.
Cyllid a Thollau EF / HM Revenue and Customs
Trysorlys Corfforaethol / Corporate Treasury
BX9 1BG
Yr hyn i’w gynnwys yn eich cais
Bydd angen eich gwybodaeth cyfrif CThEF arnoch, gan gynnwys eich cyfeirnod Swyddfa Gyfrifon a’ch cyfeirnod TWE.
Gallwch ddod o hyd i’r rhain naill ai:
- yn eich cyfrif ar-lein CThEF
- ar y llythyr a anfonodd CThEF atoch pan wnaethoch gofrestru fel cyflogwr
Manylion eich cais:
- enw a rhif Yswiriant Gwladol y cyflogai rydych yn gwneud y taliadau statudol iddo
- y dyddiad y dechreuodd y cyflogai gyflogaeth gyda chi (yn achosion TUPE (yn agor tudalen Saesneg) y dyddiad y dechreuodd gyflogaeth gyda’r busnes, nid y dyddiad y gwnaethoch gymryd drosodd)
- y dyddiadau y mae eich cais yn ymwneud â nhw
- manylion unrhyw ostyngiad i’ch taliadau misol neu chwarterol rydych wedi’i wneud
- y cyfanswm y mae gennych hawl i’w adennill
- y swm rydych yn hawlio cyllid ymlaen llaw ar ei gyfer
Gwybodaeth benodol ar gyfer y taliad statudol perthnasol:
- ar gyfer tâl mamolaeth a thâl mabwysiadu, y dyddiad geni neu fabwysiadu disgwyliedig
- ar gyfer tâl tadolaeth, y dyddiad geni neu fabwysiadu gwirioneddol
- ar gyfer tâl mabwysiadu, p’un a yw’r mabwysiadu yn y DU neu dramor
- ar gyfer Tâl Tadolaeth Statudol Ychwanegol, y dyddiad y mae’r fam neu’r mabwysiadwr ar y cyd yn dychwelyd i’r gwaith ac yn rhoi’r gorau i gael Tâl Mamolaeth Statudol, Lwfans Mamolaeth neu Dâl Mabwysiadu Statudol
Dylech hefyd gynnwys y canlynol:
- y dyddiad y dechreuodd eich busnes (yn achosion TUPE (yn agor tudalen Saesneg), y dyddiad y dechreuodd y busnes, nid y dyddiad y gwnaethoch gymryd drosodd)
- eich manylion cyswllt – er enghraifft, eich enw a rhif ffôn
- manylion y cyfrif banc yr hoffech i CThEF wneud taliad iddo – dylech gynnwys y cod didoli, enw’r cyfrif, a rhif y cyfrif (neu rif rôl y gymdeithas adeiladu)
Os ydych yn ansolfent
Bydd CThEF yn talu Tâl Mamolaeth Statudol, Tâl Tadolaeth Statudol, Tâl Mabwysiadu Statudol neu Dâl Rhieni Mewn Profedigaeth os oedd eich cyflogeion yn cael y taliadau hyn pan ddaethoch yn ansolfent.
Bydd CThEF hefyd yn talu tâl mamolaeth i gyflogeion beichiog sydd wedi mynd heibio i’r wythnos gymhwysol ond sydd heb ddechrau cael SMP.
Mae’n rhaid i chi (neu rywun arall fel y gweinyddwr neu’r datodwr) gysylltu â Gwasanaeth Cwsmeriaid Cymraeg CThEF er mwyn rhoi gwybod i CThEF eich bod yn ansolfent.
Gwasanaeth Cwsmeriaid Cymraeg CThEF
Ffôn: 0300 200 1900
Dydd Llun i ddydd Gwener, 8:30am i 5pm
Dysgwch am gostau galwadau
Mae’n rhaid i chi hefyd ddweud wrth eich cyflogai i gysylltu â Gwasanaeth Cwsmeriaid Cymraeg CThEF.