Pensiwn y Wladwriaeth os ydych yn ymddeol dramor
Gwneud cais am Bensiwn y Wladwriaeth dramor
Gallwch wneud cais am Bensiwn y Wladwriaeth dramor os ydych wedi talu digon o gyfraniadau Yswiriant Gwladol y DU i fod yn gymwys.
Efallai y byddwch hefyd yn gymwys os rydych wedi byw neu weithio dramor.
Dylech gael Rhagolwg Pensiwn y Wladwriaeth os ydych angen darganfod faint o Bensiwn y Wladwriaeth y gallech ei gael.
Mae’r canllaw hwn hefyd ar gael yn Saesneg (English)
Gwneud cais
Rhaid i chi fod o fewn 4 mis i’ch oedran Pensiwn y Wladwriaeth i wneud cais.
I wneud cais am eich pensiwn, gallwch naill ai:
- gysylltu â’r Ganolfan Bensiwn Ryngwladol
- anfon y ffurflen gais ryngwladol i’r Ganolfan Bensiwn Ryngwladol (mae’r cyfeiriad ar y ffurflen)
Os ydych hefyd am wneud cais am bensiwn y wladwriaeth o wlad arall
Efallai y gallwch wneud un cais i’r Ganolfan Bensiwn Ryngwladol neu’r wlad rydych yn byw ynddi. Yna gellir dweud wrth gynlluniau pensiwn y wladwriaeth mewn gwledydd eraill rydych wedi byw neu weithio ynddynt eich bod wedi gwneud cais.
Os dywedir wrthynt, bydd y cynlluniau eraill hynny’n rhoi gwybod i chi os ydych yn gymwys. Ni fydd angen i chi wneud ceisiadau ar wahân iddynt.
Mae hyn yn berthnasol i gynlluniau pensiwn y wladwriaeth yn:
- yr Ardal Economaidd Ewropeaidd (AEE) – mae hyn yn cynnwys unrhyw wlad yn yr UE yn ogystal â Norwy, Gwlad yr Iâ a Liechtenstein
- y Swistir
- unrhyw wlad sydd â chytundeb nawdd cymdeithasol gyda’r DU, ar wahân i Canada a Seland Newydd
Os ydych yn byw yn un o’r gwledydd hyn a’ch bod yn gymwys i gael pensiwn y wladwriaeth yno, gwnewch gais i’w cynllun pensiwn y wladwriaeth. Byddant yn trosglwyddo eich manylion i:
- y Deyrnas Unedig
- cynlluniau pensiwn y wladwriaeth eraill yn yr AEE neu’r Swistir, os gwnaethoch gais yno
Fel arall, pan fyddwch yn gwneud cais i’r Ganolfan Bensiwn Ryngwladol, byddant yn trosglwyddo’ch manylion i holl gynlluniau pensiwn y wladwriaeth ar y rhestr.
Os ydych chi am wneud cais am bensiynau’r wladwriaeth o unrhyw wledydd eraill sydd heb gael eu henwi, gan gynnwys Canada a Seland Newydd, gwnewch gais i’w cynlluniau pensiwn ar wahân.
Os ydych yn byw rhan o’r flwyddyn dramor
Mae’n rhaid i chi ddewis ym mha wlad rydych am i’ch pensiwn gael ei dalu ynddi. Ni allwch gael eich talu mewn un wlad am ran o’r flwyddyn ac un arall am weddill y flwyddyn.
Cyfrifon banc y gellir talu eich pensiwn iddynt
Gellir talu eich Pensiwn y Wladwriaeth i:
- fanc yn y wlad rydych yn byw ynddi
- banc neu gymdeithas adeiladu yn y DU
Gallwch ddefnyddio:
- cyfrif yn eich enw chi
- cyfrif ar y cyd
- cyfrif rhywun arall - os oes gennych eu caniatâd ac yn cadw at delerau ac amodau’r cyfrif
Byddwch angen rhif cyfrif banc rhyngwladol (IBAN) a rhifau cod adnabod banc (BIC) os oes gennych gyfrif tramor.
Byddwch yn cael eich talu mewn arian lleol - gallai’r swm a gewch newid oherwydd cyfraddau cyfnewid.
Pryd fyddwch yn cael eich talu
Gallwch ddewis cael eich talu bob 4 neu 13 wythnos.
Os yw eich Pensiwn y Wladwriaeth o dan £5 yr wythnos, byddwch yn cael eich talu unwaith y flwyddyn ym mis Rhagfyr.
Oedi i daliadau o amgylch gwyliau ffederal yr Unol Daleithiau
Os ydych yn byw dramor a bod eich taliad yn ddyledus yn yr un wythnos â gwyliau ffederal yr Unol Daleithiau, gallai gyrraedd un diwrnod yn hwyr. Mae hyn oherwydd bod cwmni o’r Unol Daleithiau yn prosesu’r taliadau hyn.