Budd-dal Plant
Yr hyn y byddwch yn ei gael
Mae 2 gyfradd Budd-dal Plant.
| Ar gyfer pwy mae’r lwfans | Cyfradd (wythnosol) |
|---|---|
| Y plentyn hynaf neu unig blentyn | £25.60 |
| Plant ychwanegol | £16.95 y plentyn |
Mae’n rhaid i chi gysylltu â’r Swyddfa Budd-dal Plant os bydd gormod o Fudd-dal Plant yn cael ei dalu i chi neu os na fydd digon ohono’n cael ei dalu i chi.
Bydd unrhyw daliadau Budd-dal Plant a gewch yn cyfrif tuag at y cap budd-daliadau. Os yw’r cap yn effeithio arnoch chi, byddwch yn dal i gael swm llawn eich taliadau Budd-dal Plant, ond efallai y caiff eich budd-daliadau eraill eu gostwng.
Os bydd teuluoedd yn gwahanu
Os bydd teulu’n gwahanu, cewch £25.60 yr wythnos ar gyfer y plentyn hynaf.
Os oes gennych 2 o blant a bod un yn byw gyda chi a’r llall yn byw gyda rhywun arall (er enghraifft, eich cyn-bartner), bydd y ddau ohonoch yn cael £25.60 yr wythnos yr un.
Os yw’r ddau ohonoch yn hawlio ar gyfer yr un plentyn, dim ond un ohonoch fydd yn cael Budd-dal Plant ar ei gyfer.
Os oes hawl gennych i Fudd-dal Plant ar gyfer unrhyw blant eraill, cewch £16.95 y plentyn.
Os bydd teuluoedd yn dod at ei gilydd
Os byddwch yn symud i fyw gyda phartner sydd hefyd yn hawlio Budd-dal Plant, byddwch yn cael £25.60 ar gyfer plentyn hynaf yr aelwyd. Cewch £16.95 ar gyfer unrhyw blant iau.
Gallwch chi a’ch partner hawlio ar gyfer gwahanol blant. Os ydych yn byw gyda’ch gilydd, ni all y ddau ohonoch hawlio ar y gyfradd uwch – mae’n bosibl y bydd yn rhaid i chi dalu rhan o’r arian yn ôl os byddwch yn gwneud hynny.
Mae’n rhaid i chi roi gwybod am newidiadau i’ch amgylchiadau teuluol.
Os ydych chi neu’ch partner yn ennill mwy na’r trothwy
Os yw’ch ‘incwm net wedi’i addasu’ chi, neu un eich partner, yn fwy na’r trothwy, efallai y bydd yn rhaid i chi dalu’r Tâl Treth Budd-dal Plant Incwm Uchel.
Eich incwm net wedi’i addasu yw cyfanswm eich incwm trethadwy cyn unrhyw lwfansau personol a llai pethau fel Rhodd Cymorth. Mae cyfanswm eich incwm trethadwy yn cynnwys llog o gynilion a difidendau.
Os oes angen i chi dalu’r tâl, rydych yn dal i allu cael y manteision eraill o Fudd-dal Plant megis credydau Yswiriant Gwladol. Ni fydd y tâl yn fwy na’r swm a gewch o daliadau Budd-dal Plant.
Cyfrifwch a yw’ch incwm net wedi’i addasu yn fwy na’r trothwy, gan ddefnyddio’r gyfrifiannell treth Budd-dal Plant (yn agor tudalen Saesneg). Os ydyw, bydd y gyfrifiannell hefyd yn rhoi gwybod i chi faint o dâl y bydd angen i chi ei dalu.
Os oes gennych chi a’ch partner incwm unigol sydd dros y trothwy, yna bydd y sawl sydd â’r incwm net wedi’i addasu uchaf yn gyfrifol am dalu’r tâl.
Os oes gennych chi, neu’ch partner, incwm unigol sydd o leiaf £20,000 uwchben y trothwy (o leiaf £10,000 uwchben y trothwy, cyn mis Ebrill 2024), codir yr un swm arnoch ag y byddwch yn ei wneud drwy daliadau Budd-dal Plant. Yn y pen draw, ni fydd gennych unrhyw arian ychwanegol o Fudd-dal Plant.
Bydd angen i chi lenwi Ffurflen Dreth Hunanasesiad bob blwyddyn dreth i dalu’r tâl.
Gallwch wneud hawliad ac optio allan o gael taliadau os nad ydych yn dymuno talu’r tâl. Byddwch yn dal i allu cael y manteision eraill a ddarperir gan Fudd-dal Plant, megis credydau Yswiriant Gwladol.