Budd-dal Plant
Sut mae’n gweithio
Cewch Fudd-dal Plant os ydych yn gyfrifol am fagu plentyn sydd:
-
o dan 16 oed
-
o dan 20 os yw’n parhau ag addysg neu hyfforddiant cymeradwy
Dim ond un person all gael Budd-dal Plant ar gyfer plentyn.
Nid oes terfyn ar nifer y plant y gallwch hawlio ar eu cyfer.
Mae’r canllaw hwn hefyd ar gael yn Saesneg.
Drwy hawlio Budd-dal Plant, gallwch gael:
-
lwfans sy’n cael ei dalu i chi ar gyfer pob plentyn – byddwch fel arfer yn ei gael bob 4 wythnos
-
credydau Yswiriant Gwladol sy’n cyfrif tuag at eich Pensiwn y Wladwriaeth
-
rhif Yswiriant Gwladol ar gyfer eich plentyn heb iddo orfod gwneud cais am un – fel arfer, bydd yn cael y rhif ychydig cyn iddo droi’n 16 oed
Os byddwch yn dewis peidio â chael taliadau Budd-dal Plant, dylech fynd ati o hyd i wneud hawliad er mwyn cael y manteision eraill.
Budd-dal Plant a diogelu’ch Pensiwn y Wladwriaeth
Byddwch yn cael credydau Yswiriant Gwladol yn awtomatig os hawliwch Fudd-dal Plant a bod eich plentyn o dan 12 oed.
Mae’r credydau hyn yn cyfrif tuag at eich Pensiwn y Wladwriaeth fel nad oes gennych fylchau yn eich cofnod Yswiriant Gwladol os yw’r naill neu’r llall o’r canlynol yn berthnasol:
- nid ydych yn gweithio
- nid ydych yn ennill digon i dalu cyfraniadau Yswiriant Gwladol
Os nad oes angen y credydau Yswiriant Gwladol arnoch, mae’n bosibl y bydd eich teulu’n gymwys i gael y cymorth yn lle hynny. Gall naill ai:
- eich gŵr, eich gwraig neu’ch partner wneud cais i drosglwyddo’r credydau
- aelod gwahanol o’r teulu sy’n gofalu am eich plentyn wneud cais am gredydau Gofal Plant ar gyfer Oedolion Penodedig
Os bydd newid yn eich amgylchiadau
Mae’n rhaid i chi roi gwybod am unrhyw newid mewn amgylchiadau i’r Swyddfa Budd-dal Plant.