Cofrestru ar gyfer TAW
Newid eich manylion
Mae’n rhaid i chi gadw’ch manylion cofrestru TAW yn gyfredol. Mae rhai newidiadau’n golygu bod yn rhaid i chi ganslo’ch cofrestriad TAW neu drosglwyddo’ch cofrestriad TAW.
Rhowch wybod i Gyllid a Thollau EF (CThEF) cyn pen 30 diwrnod os bydd unrhyw newidiadau i’r canlynol:
- enw, enw masnachu neu brif gyfeiriad eich busnes
- y cyfrifydd neu’r asiant sy’n delio â’ch TAW
- aelodau partneriaeth, neu enw neu gyfeiriad cartref unrhyw un o’r partneriaid
Efallai y bydd yn rhaid i chi dalu cosb os na rowch wybod i CThEF am newidiadau cyn pen 30 diwrnod.
Diweddaru manylion yn eich cyfrif ar-lein
Defnyddiwch eich cyfrif ar-lein i ddiweddaru’r canlynol:
- eich enw a chyfeiriad cyswllt
- eich manylion banc ar gyfer ad-daliadau
- dyddiadau cau ar gyfer Ffurflenni TAW (oni bai bod gennych gyfnod treth ansafonol)
- aelodau partneriaeth
Mewngofnodi i’ch cyfrif TAW ar-lein.
Os na allwch ddefnyddio’r cyfrif ar-lein
Cysylltwch â CThEF i roi gwybod am y newid.
Newid manylion partner mewn partneriaeth
Mae’n rhaid i chi anfon ffurflen VAT2 i’r Gwasanaeth Cofrestru TAW er mwyn rhoi gwybod am unrhyw newidiadau i fanylion partner megis enw neu gyfeiriad.
Newid enw’ch cwmni
Os yw enw eich cwmni’n newid, mae pwy sydd angen i chi roi gwybod iddo yn gallu amrywio. Mae’n dibynnu a oes gennych Rif Cofrestru’r Cwmni (CRN) neu a ydych wedi cofrestru ar gyfer Hunanasesiad.
Os oes gennych CRN, rhowch wybod i Dŷ’r Cwmnïau. Bydd Tŷ’r Cwmnïau yn rhoi gwybod i CThEF.
Os ydych wedi cofrestru ar gyfer Hunanasesiad, rhowch wybod i Wasanaeth Cwsmeriaid Cymraeg CThEF.
Bydd eich cyfrif treth busnes yn dangos enw newydd y cwmni cyn pen 15 diwrnod.
Os ydych dramor, cysylltwch â CThEF i ddiweddaru enw eich cwmni.
Newid eich manylion banc
Mae’n rhaid i chi roi gwybod i CThEF o leiaf 14 diwrnod ymlaen llaw os ydych yn newid eich manylion banc.
Os ydych yn talu’ch TAW drwy Ddebyd Uniongyrchol, bydd angen i chi roi gwybod i’ch banc hefyd. Peidiwch â gwneud hyn yn y 5 diwrnod banc cyn neu ar ôl dyddiad dyledus eich Ffurflen TAW – gallai olygu y byddwch yn talu ddwywaith.
Os ydych yn defnyddio’r Cynllun Cyfrifyddu Blynyddol (yn agor tudalen Saesneg), mae’n rhaid i chi ysgrifennu at yr Uned Gofrestru ar gyfer Cyfrifyddu Blynyddol (yn agor tudalen Saesneg) er mwyn newid manylion eich Debyd Uniongyrchol. Cofiwch gynnwys eich rhif cofrestru.
Os byddwch yn cymryd cyfrifoldebau TAW rhywun arall drosodd
Mae’n rhaid i chi roi gwybod i CThEF cyn pen 21 diwrnod os byddwch yn cymryd drosodd gyfrifoldebau TAW rhywun sydd wedi marw neu sy’n sâl ac nad yw’n gallu rheoli ei faterion ei hun.
I roi gwybod i CThEF, bydd angen i chi wneud y ddau beth canlynol:
- cofrestru ar gyfer TAW ar-lein
- llenwi a phostio ffurflen VAT68 – dylech gynnwys manylion dyddiad y farwolaeth neu’r dyddiad y dechreuodd y salwch
Os ydych yn rhoi gwybod am salwch, mae angen i chi gynnwys copi o’r Pŵer Atwrnai gyda ffurflen VAT68.
Os ydych yn ymarferwr ansolfedd
Os ydych yn ymarferydd ansolfedd gweithredol ac am newid manylion cofrestru TAW, mae’n rhaid i chi gysylltu â CThEF.
Os byddwch yn ymuno â grŵp TAW
Os ydych yn ymuno â grŵp TAW, mae’n rhaid i’r grŵp lenwi ffurflen VAT50-51. Bydd angen i chi ddefnyddio rhif cofrestru TAW y grŵp unwaith y byddwch wedi ymuno ag ef. Dylai’r grŵp TAW roi gwybod i CThEF am yr aelod newydd.