Talu Yswiriant Gwladol Dosbarth 3 gwirfoddol
Sefydlu taliadau rheolaidd
Os ydych chi’n gwybod y bydd gennych fylchau yn eich cofnod Yswiriant Gwladol yn y flwyddyn dreth bresennol, gallwch wneud taliadau rheolaidd i dalu am y diffyg.
Gallwch wneud un o’r canlynol:
- talu drwy Ddebyd Uniongyrchol
- gwneud taliadau chwarterol (bob 3 mis)
Talu drwy Ddebyd Uniongyrchol misol
Gallwch ond defnyddio Debyd Uniongyrchol i wneud cyfraniadau Yswiriant Gwladol Dosbarth 3 gwirfoddol ar gyfer y flwyddyn dreth bresennol (6 Ebrill 2024 i 5 Ebrill 2025) a’r dyfodol.
I drefnu taliadau misol, lawrlwythwch y ffurflen gais i wneud taliadau rheolaidd (CA5603) a’i hanfon at Gyllid a Thollau EF (CThEF). Mae’r cyfeiriad ar y ffurflen.
Dylech ganiatáu 21 diwrnod i drefnu Debyd Uniongyrchol newydd.
Bydd CThEF yn anfon llythyr atoch yn rhoi gwybod i chi swm y taliadau a fydd yn cael eu cymryd, a phryd y bydd hynny’n digwydd.
Bydd y taliadau’n ymddangos ar eich cyfriflen fel ‘HMRC NI-DD’.
Fel arfer bydd eich taliadau yn dechrau ym mis Mai. Gallwch dalu ôl-ddyledion ar gyfer y flwyddyn dreth bresennol drwy eich taliad cyntaf os ydych yn trefnu’r Debyd Uniongyrchol ar ôl mis Mai.
Os nad ydych wedi defnyddio’ch Debyd Uniongyrchol am 2 flynedd neu fwy, gwiriwch â’ch banc ei fod wedi’i drefnu o hyd.
Rhoi’r gorau i’ch taliadau Debyd Uniongyrchol
Gallwch ganslo eich Debyd Uniongyrchol ar unrhyw adeg.
Bydd CThEF yn rhoi’r gorau i gasglu taliadau pan fyddwch chi’n naill neu’r llall o’r canlynol:
- rydych yn ddigon hen i gael eich Pensiwn y Wladwriaeth
- rydych wedi talu’r swm mwyaf a ganiateir o gyfraniadau gwirfoddol
Gwneud taliadau chwarterol
Os ydych am dalu’n chwarterol, gallwch wneud un o’r canlynol:
- defnyddio’r ffurflen gais i wneud taliadau rheolaidd (CA5603), dewiswch daliadau chwarterol, ac yna ei hanfon drwy’r post i’r cyfeiriad ar y ffurflen
- ffonio CThEF a rhowch wybod eich bod am wneud taliadau chwarterol
Bydd CThEF yn anfon cais am daliad atoch bob mis Gorffennaf, Hydref, Ionawr ac Ebrill.
Rhoi’r gorau i’ch taliadau chwarterol
Gallwch gysylltu â CThEF (yn agor tudalen Saesneg) a gofyn iddynt roi’r gorau i’ch taliadau ar unrhyw adeg.
Bydd CThEF yn rhoi’r gorau i anfon ceisiadau am daliad pan fyddwch yn ddigon hen i gael Pensiwn y Wladwriaeth.
Ar ôl i chi dalu
Bydd eich cofnod Yswiriant Gwladol a’ch cyfrif treth personol yn cael eu diweddaru ar ôl i CThEF gael y taliad. Gall hyn gymryd hyd at 8 wythnos.