Talu Yswiriant Gwladol Dosbarth 2 os nad ydych yn talu drwy Hunanasesiad
Trosolwg
Rydych yn talu cyfraniadau Yswiriant Gwladol Dosbarth 2 i helpu i fod yn gymwys i gael rhai budd-daliadau fel Pensiwn y Wladwriaeth os ydych yn hunangyflogedig.
Mae’r canllaw hwn hefyd ar gael yn Saesneg.
Mae’r rhan fwyaf o bobl yn talu’r cyfraniadau hyn fel rhan o’u bil treth Hunanasesiad neu mae eu cyfraniadau yn cael eu trin fel pe baent wedi’u talu.
Gallwch ddewis talu cyfraniadau Dosbarth 2 os yw’r canlynol yn wir:
- nid ydych yn talu drwy Hunanasesiad
- rydych am lenwi unrhyw fylchau yn eich cofnod Yswiriant Gwladol - gwirio’ch bod yn gymwys (yn agor tudalen Saesneg)
Gallwch hefyd ddewis talu oherwydd nad ydych yn gymwys i gael eich trin fel rhywun sydd wedi talu cyfraniadau Dosbarth 2. Mae hyn yn berthnasol os ydych chi’n un o’r canlynol:
- yn arholwr, safonwr, goruchwyliwr neu berson sy’n gosod cwestiynau arholiad
- yn weinidog yr efengyl nad yw’n cael cyflog na thâl
- yn berson sy’n gwneud buddsoddiadau – ond nid fel busnes a heb gael ffi na chomisiwn
- yn landlord ac yn gymwys i dalu Yswiriant Gwladol Dosbarth 2 (yn agor tudalen Saesneg)
Os na fyddwch yn talu drwy Hunanasesiad, bydd angen i chi gofrestru gyda Chyllid a Thollau EF (CThEF) i dalu cyfraniadau Dosbarth 2.
Mae yna ffordd wahanol o dalu os ydych chi’n gweithio neu’n byw dramor.
Cofrestru i dalu cyfraniadau Dosbarth 2
Gwiriwch sut i gofrestru gyda CThEF er mwyn talu.
Gallwch gofrestru ar unrhyw adeg, ond dylech wirio’r dyddiadau cau ar gyfer talu cyfraniadau Dosbarth 2 (yn agor tudalen Saesneg).
Ar ôl cofrestru
Unwaith y byddwch wedi cofrestru, bydd CThEF yn anfon cais am daliad atoch erbyn diwedd mis Hydref yn rhoi gwybod i chi faint i’w dalu.
Bydd y cais am daliad yn cynnwys cyfeirnod 18 digid o hyd y bydd ei angen arnoch er mwyn gwneud taliad.
Nid oes angen cyfeirnod 18 digid o hyd arnoch os ydych yn gweithio neu’n byw dramor.
Os, ar ôl cofrestru, nad ydych yn cael cais am daliad, cysylltwch â CThEF.
Pa mor hir mae taliadau’n ei gymryd
Bydd eich cais am daliad yn rhoi dyddiad cau i chi dalu CThEF.
Mae’r amser y mae angen i chi ei ganiatáu yn dibynnu ar eich dull o dalu.
Gallwch wneud taliadau sy’n cyrraedd ar yr un diwrnod neu’r diwrnod nesaf:
- drwy dalu drwy’ch cyfrif banc ar-lein
- drwy fancio ar-lein neu dros y ffôn (drwy Daliadau Cyflymach neu CHAPS)
- yn eich banc neu’ch cymdeithas adeiladu
Gallwch dalu cyn pen 3 diwrnod drwy ddefnyddio bancio ar-lein neu dros y ffôn (drwy Bacs) neu â siec drwy’r post.
Sicrhewch eich bod yn caniatáu 21 diwrnod gwaith i drefnu Debyd Uniongyrchol os nad ydych wedi trefnu un o’r blaen.
Os bydd y dyddiad cau ar ddiwrnod dros y penwythnos neu ar ŵyl y banc, gwnewch yn siŵr bod eich taliad yn dod i law CThEF erbyn y diwrnod gwaith olaf cyn hynny. Nid oes angen i chi wneud hyn os ydych chi’n talu gan ddefnyddio bancio ar-lein neu dros y ffôn Taliadau Cyflymach.
Os ydych yn methu’r dyddiad cau ar gyfer talu
Mae’n bosibl y bydd yn rhaid i chi dalu mwy i lenwi bylchau yn eich cofnod Yswiriant Gwladol os byddwch yn methu’r dyddiad cau y mae CThEF wedi’i roi i chi.
Bydd CThEF yn ysgrifennu atoch er mwyn rhoi gwybod i chi faint y mae angen i chi ei dalu.
Cadarnhad o’r taliad
Nid oes angen i chi gysylltu â CThEF i gadarnhau bod eich taliad wedi dod i law.
Bydd yn ymddangos ar eich cofnod Yswiriant Gwladol. Gall hyn gymryd hyd at 8 wythnos.